SAAMUNƆ 109 - Bokobaru Bible

Sa zaaa ona ibɛɛnɛ
Dauda lɛ̀.

¹ Luda, ḿbe mɛɛ̀ n táaki lɛ́, ǹtongↄ̃ yĩtɛnaro.

² Zaakɛ gbɛ̃ zaa bↄnkpɛɛdeenↄ è ma yaka, aↄ̃è lɛ́ bↄ wà ɛgɛyã dima.

³ Aↄ̃è ligamazi kↄ̃n zangu yão, aↄ̃è swèe kɛmao pↄ́ke wíwinnɛna sai.

⁴ Aↄ̃è yenzi sↄkpamɛ kↄ̃n yãdimmanao, baa kɛ̀ mɛɛ̀ adua kɛńnɛ.

⁵ Aↄ̃è à maaa fĩa bomɛ kↄ̃n à zaaao, yenzi sↄ̃, kↄ̃n zanguo.

⁶ Ǹ Setãn swi kɛa, ǹ à kpakↄ̃zi kↄ̃n Ibilisio.

⁷ Ǹ tó yãkpaɛ à ble, ǹ tó à aduakɛna kɛnɛ taari ũ.

⁸ À wɛ̃̀ndi gↄ̃ kusu, gbɛ̃ pãnde gↄ̃ à gɛ̃ɛ ũ.

⁹ À nɛ́nↄ gↄ̃ de sai, à naↄ̃ gↄ̃ gyaanↄↄ ũ.

¹⁰ À nɛ́nↄ gↄ̃ likↄ̃azↄ̃rinↄ ũ wàgↄ̃ baa kɛɛ, wàgↄ̃ ń kpakɛɛ ń bɛ zĩnↄ guu.

¹¹ À fĩadee à pↄ́nↄ nakↄ̃a píngi, gbɛ̃ zĩ̀tↄnↄ à zĩ àre ble.

¹² Gbɛ̃ke tón gbɛ̃kɛɛ kɛnɛro, wàton à nɛ́ kɛ̀ à tònↄ wɛ̃nda boro.

¹³ À boriinↄ kaatɛ, aↄ̃ tↄ́ tóngↄ̃ kú borii kɛ̀ aↄ̃é fɛɛnↄ tɛ́ro.

¹⁴ À dezinↄ zaakɛna yã gↄ̃ dↄ Diin, ǹton tó à da durun kɛ̃a zikiro.

¹⁵ Aↄ̃ durun gↄ̃ dↄn Diin, aↄ̃ yã sã gbɛ̃nↄn anduna guu.

¹⁶ Zaakɛ èe dↄn à gbɛ̃kɛɛ kɛ gbɛ̃kenɛro, è wɛ́ɛ tã takaasideenↄa kↄ̃n wɛ̃ndadeenↄ kↄ̃n pↄsiadeenↄo ai gɛ̀wãan.

¹⁷ À ye sa zaa onnɛnazi, ǹ tó à wí à musu. Sa maa onnɛna è kánɛro, ǹ tó aubarika kɛo zã̀.

¹⁸ À lɛ́kɛnnɛna dà lán uta bà, à à mɛ̀ yàku lán í bà, à gɛ̃̀ à wánↄn lán nↄ́si bà.

¹⁹ Kana pì gↄ̃ daàla lán uta bà, àgↄ̃ dↄ à pii lán asaa bà.

²⁰ Dii fĩa bo ma yãdimmarinↄnɛ lɛ kↄ̃n gbɛ̃ kɛ̀ aↄ̃è yã zaaa o ma musunↄo.

²¹ Dii Gbãapingide, ǹ ma wɛ̃nda gwa n tↄ́ yãnzi, ǹ ma bↄ n maakɛ kↄ̃n n gbɛ̃kɛɛo yãnzi.

²² Zaakɛ takaaside wɛ̃ndadeen ma ũ, ma pↄↄ yàka búgubugu.

²³ Mɛ́ɛ gɛ̃tɛɛ lán uusiɛ ↄra bà, má dɛ lán kwaa kɛ̀ ĩa e sɛɛ bà.

²⁴ Lɛ́yina tò ma gbá è sí sɛ́ dↄro, ma yãyã ma gↄ̃ wↄ̀ↄzↄgↄ.

²⁵ Ma gↄ̃ yáadↄzipↄ ũ ma yãdimmarinↄnɛ, aↄ̃è ma gwa wà mì gbãkɛ.

²⁶ Ǹ dↄmalɛ, Dii ma Luda, ǹ ma mì sí n gbɛ̃kɛ yãnzi,

²⁷ lɛ aↄ̃ dↄ̃ kɛ̀ n ↄↄ bé à kɛ̀, ḿbe Dii, n kɛnamɛ.

²⁸ Baa tó aↄ̃ ma ka, nɛ́ aubarika damagu, tó aↄ̃ fɛ̀ɛmazi, wí é ń kũ, mapi n zↄ̀bleri mɛ́ pↄnnaa kɛ.

²⁹ Tↄ́ zaaa gↄ̃ ma yãdimmarinↄnɛ uta ũ, aↄ̃ wí da ń zĩndaa lán gumusu bà.

³⁰ Mɛ́ Dii sáabu kpá kↄ̃n kòto gbãaao, mɛ́ à táaki lɛ́ pari kakↄ̃ana guu.

³¹ Zaakɛ è zɛ kↄ̃n wɛ̃ndadeenↄ, è ń sí gbɛ̃ kɛ̀ aↄ̃è yã vɛ̃ɛḿmanↄa.

Lean sinn:

Ceanglaichean taic

Sanasan