SAAMUNƆ 106 - Bokobaru Bible

Isarailinↄ ń durunnↄ ona Ludanɛ

¹ Aleluya! À Dii sáabu kɛ, zaakɛ à maa, à gbɛ̃kɛɛ yãana vĩro.

² Dé bé eé fↄ̃ à Dii yãbitakɛnanↄ oo? Dé bé eé fↄ̃ à à táaki lɛ́ píngii?

³ Aubarikadeenↄn gbɛ̃ kɛ̀ aↄ̃è yã kɛ a zɛ́anↄ ũ, kɛ̀ aↄ̃è yã maaa kɛ gurↄ píngi.

⁴ Tó nɛ́ɛ à nnaa kɛɛ n gbɛ̃nↄnɛ, ǹ tó ma yã gↄ̃ dↄngu, Dii, tó nɛ́ɛ ń mì sii, ǹ ma wɛ́ɛ gwa,

⁵ lɛ ma baka e àgↄ̃ kú n gbɛ̃nↄ nnamanan, mà pↄnnaa kɛ kↄ̃n borii kɛ̀ n ń sɛ́nↄ, lɛ mɛ́ n táaki lɛ́ n gbɛ̃ pìnↄ tɛ́.

⁶ Wa durun kɛ̀ lán wa dezinↄ bà, wa taari kɛ̀ wa yã zaaa kɛ̀.

⁷ Kɛ̀ wa dezinↄ kú Igipiti, aↄ̃ↄe Dii dabuyãkɛnanↄ yã daro, gbɛ̃kɛyã parii kɛ̀ à kɛ̀ńnɛnↄ sã̀ńgu, ben aↄ̃ swãgbãaa kɛ̀ Isia Tɛ̃aa saɛ.

⁸ Baa kↄ̃n beeeo à ń mì sì a tↄ́ yãnzi, lɛ à à gbãa bíta ↄdↄa.

⁹ À kpã̀kɛ̃ Isia Tɛ̃aazi, ben gukori bↄ̀, à gɛ̃̀ńyo à wɛ̀ɛn, aↄ̃ bikũ̀ lán wà be gbáan bà.

¹⁰ À ń bↄ́ ń ibɛɛnↄ ↄzĩ, à ń sí ń zangurinↄ gbãaaa.

¹¹ Í dà ń wɛdɛrinↄla, baa aↄ̃ gbɛ̃ mɛ̀n do èe bↄro.

¹² Ben aↄ̃ à yã kɛ̀ à ò sì, aↄ̃ à táaki lɛ̀.

¹³ Mↄde à yãkɛnanↄ sã̀ńgu gↄ̃ↄ, ben aↄ̃ↄe zɛ lɛ à lɛ́ daḿmaro.

¹⁴ Aↄ̃ pↄ́ble pãnde ni dɛ̀ gbáan, ben aↄ̃ Dii yↄ̃̀ wà gwà sɛ̃̀tɛ gwe.

¹⁵ À pↄ́ kɛ̀ aↄ̃ wɛ́ɛ kɛ̀a kpàḿma, ben à mɛ̀'ibabagyãa zĩ̀ḿma.

¹⁶ Aↄ̃ nↄ̀sɛgↄ̃aanↄ kpà kↄ̃n Musao bùran kↄ̃n Aruna kɛ̀ kú adona Diinɛo.

¹⁷ Tↄↄtɛ pàra à Datani mↄ̀, à sìkↄ̃rɛ Abiramua kↄ̃n a gbɛ̃nↄ.

¹⁸ Tɛ́ fɛ̀ɛ aↄ̃ ìbanↄ tɛ́, tɛ́nɛnɛ gbɛ̃ zaaanↄ blè.

¹⁹ Aↄ̃ mↄ̀ pì zaa Orɛbu lán zùswaree bà, aↄ̃ dↄnzi kɛ̀ ń tãa kɛ̀ aↄ̃ↄ pìnɛ.

²⁰ Aↄ̃ Luda Gakuide lendee kpà kↄ̃n zù sɛ̃̀sori takao.

²¹ Aↄ̃ sã̀ Luda ń mìsiri yãn, kɛ̀ à yã bítanↄ kɛ̀ńnɛ zaa Igipiti,

²² kɛ̀ à dabuyãnↄ kɛ̀ Hamu boriinↄ bùsun, kɛ̀ à naasiyãnↄ kɛ̀ Isia Tɛ̃aazi.

²³ Beee yãnzin à bè é a gbɛ̃nↄ kaatɛ, ben Musa kɛ̀ à à sɛ̀ kpànɛ, à tò à pↄↄ kpàɛ, èe gàa à ń kaatɛro.

²⁴ Aↄ̃ kya kà bùsu nidee mↄ̀n, aↄ̃ gì Dii yã náanɛ kɛzi.

²⁵ Aↄ̃ yãbuu tã̀ ń bisakutaanↄ guu, aↄ̃ↄe dↄ Dii yãziro.

²⁶ Ben à ↄ dↄ̀ à la dàńnɛ à bè, é tó aↄ̃ gaga gbáan,

²⁷ é tó aↄ̃ boriinↄ gaga boriinↄ tɛ́, é ń fãakↄ̃a bùsunↄ guu.

²⁸ Aↄ̃ dↄ̀ Peo tãazi, aↄ̃ pↄ́ kɛ̀ wà saa òo pↄ́gɛnↄa blè.

²⁹ Aↄ̃ yãkɛnanↄ Dii pↄↄ fɛ̃̀, ben gagyãa sìńgu.

³⁰ Finɛasi fɛ̀ɛ à yã pì mì zↄ̃̀, ben gyãa pì zɛ̀.

³¹ Ben Dii tò yã bↄ̀o nna, à bà kúo ai à boriia.

³² Aↄ̃ Dii pↄↄ fɛ̃̀ Mɛriba í kiia, ben yã bↄ̀ Musao zaa aↄ̃ yãnzi.

³³ Zaakɛ aↄ̃ à nↄ̀sɛ yàka, ben à yã ò laasuulɛna sai.

³⁴ Aↄ̃ↄe bùsu pì deenↄ kaatɛ lán Dii dìɛńnɛ nàro.

³⁵ Aↄ̃ yã̀kↄ̃tɛ kↄ̃n borii pìnↄ, aↄ̃ ń fɛɛakaara zɛ́kpaɛ sɛ̀.

³⁶ Aↄ̃ dↄ̀ ń tãanↄzi, ben yã pì gↄ̃̀ńnɛ takutɛɛ ũ.

³⁷ Aↄ̃ ń nɛ́gↄ̃gbɛ̃nↄ kɛ̀ sa'opↄ ũ, aↄ̃ saa ò tãanↄa kↄ̃n ń nɛ́nↄgbɛ̃nↄo.

³⁸ Aↄ̃ taarisaideenↄ kòto kpàkpa, aↄ̃ nɛ́gↄ̃gbɛ̃nↄ kↄ̃n ń nɛ́nↄgbɛ̃ pìnↄ. Aↄ̃ saa òńyo Kanaa bùsu tãanↄa, ben aↄ̃ bùsu pì gbãsĩ kɛ̀.

³⁹ Aↄ̃ gbãsĩ lɛ̀ ń yãkɛnanↄ yãnzi, aↄ̃ gↄ̃̀ náanɛsaideenↄ ũ ń yãkɛnanↄa.

⁴⁰ Ben Dii pↄfɛ̃ fɛ̀ɛńzi, à ye gbɛ̃ kɛ̀ à ń sɛ́nↄ kãzi dↄro.

⁴¹ À ń ná boriinↄnɛ ń ↄzĩ, ben aↄ̃ zangurinↄ kí blè ń musu.

⁴² Aↄ̃ ibɛɛnↄ gbãaa mↄ̀ńnɛ, aↄ̃ ↄ tↄ̃̀ḿma.

⁴³ Ègↄ̃ ń bↄↄ gɛ̃̀n baaagↄ̃, mↄde aↄ̃ zɛ̀ kↄ̃n ń swãgbãakɛnao, ben aↄ̃ sↄ̃̀ɛ ń durun yãnzi.

⁴⁴ Baa kↄ̃n beeeo tó à ń wiii mà, è ń nawɛ̃akɛna yã da.

⁴⁵ Aↄ̃ yãnzi è dↄ a bà kuunańyo yãn, è a nↄ̀sɛ liɛ a gbɛ̃kɛ bíta yãnzi.

⁴⁶ À tò gbɛ̃ kɛ̀ aↄ̃ ń kũkũ zĩ̀zↄ ũunↄ ń wɛ̃nda gwà.

⁴⁷ Dii wa Luda, ǹ wa mì sí! Ǹ wa bↄɛ boriinↄ tɛ́ ǹ wa kakↄ̃a, lɛ wà n tↄ́ kɛ̀ kú adona bↄ wà ĩa dã kↄ̃n n táakilɛnao.

⁴⁸ Aubarikade Dii, Isarailinↄ Luda zaa káaku ai gurↄ píngi! Gbɛ̃ píngi be aami! Aleluya!