SAAMUNƆ 103 - Bokobaru Bible

Luda gbɛ̃kɛɛ

Dauda lɛ̀.

¹ Ma swɛ̃̀, ǹ Dii sáabu kpá, ma baabↄ píngi, ǹ à tↄ́ kɛ̀ kú adona bↄ.

² Ma swɛ̃̀, ǹ Dii sáabu kpá, ǹton sã à yãmaakɛna kenlo.

³ È ma taarinↄ kɛ̃mɛ píngi, è ma kɛ̃kↄ̃a kↄ̃n ma gyãanↄ píngi.

⁴ È ma wɛ̃̀ndi bↄ gɛ̀wãan, è à nnaa dialɛmɛ a gbɛ̃kɛ kↄ̃n a wɛ̃ndao guu.

⁵ È tó pↄ́ maaa kɛ̀ má yezinↄ mↄ́ma, lɛ ma gↄ̃kparɛkɛɛ e àgↄ̃ dufu lán kúu pↄ́ bà.

⁶ Dii è yã kɛ a zɛ́a, è tó yã bↄ kↄ̃n gwenawɛ̃ndadeenↄo nna.

⁷ À tò Musa a pↄyeziyã dↄ̃̀, à a yãbↄnsaɛnↄ ↄ̀dↄa Isarailinↄnɛ.

⁸ Dii sùu vĩ kↄ̃n wɛ̃ndaao, à pↄↄ è fɛ̃ kpaaro, à gbɛ̃kɛ bíta maamaa.

⁹ Eé ń taari e gɛ̃̀n baaagↄ̃ro, eé pↄfɛ̃ da a nↄ̀sɛn gurↄ píngiro.

¹⁰ È yã kɛwe lán wa durunnↄↄ dɛ nàro, è fĩa bowe lán wa zãzãanↄↄ dɛ nàro.

¹¹ Lán ludambɛ lezĩ kà nà kↄ̃n tↄↄtɛo, lɛn à gbɛ̃kɛɛ bíta lɛ kↄ̃n à vĩakɛrinↄ.

¹² Lán ↄfãntɛ̃bↄɛ kpaa zã̀ kↄ̃n a gɛ̃kpɛn kpaao nà, lɛn è wa taarinↄ kɛ̃wa lɛ.

¹³ Lán de è wɛ̃nda dↄ̃ a nɛ́nↄnɛ nà, lɛn Dii è a vĩakɛrinↄ wɛ̃nda gwa lɛ,

¹⁴ Zaakɛ à dↄ̃ pↄ́ kɛ̀ à wa kɛo, à dↄ̀n kɛ̀ bùsun wa ũ.

¹⁵ Gbɛ̃ntee wɛ̃̀ndi kusu lán sɛ̃̀ bà, ègↄ̃ gakui vĩ gurↄ plaa lán lávu bà.

¹⁶ Tó ĩa pàa, è gɛ̃tɛ, guu kɛ̀ à kún pì è dↄ à yãn dↄro.

¹⁷ Dii ègↄ̃ gbɛ̃kɛɛ vĩ kↄ̃n a vĩakɛrinↄ zaa káaku ai gurↄ píngi, è à maaa kɛ ń nɛ́nↄnɛ kↄ̃n ń dionↄ,

¹⁸ gbɛ̃ kɛ̀ zɛ̀ kↄ̃n à bà kuunańyo yão bensↄ̃ aↄ̃ yã kɛ̀ à dìɛnↄ kũnanↄ.

¹⁹ Dii a kpata dìɛ musu, à gbãaa vĩ gbɛ̃ píngia.

²⁰ À Dii sáabu kpá, amↄa à malaikanↄ, a gbãadee kɛ̀ eè à yã ma à zĩi kɛanↄ.

²¹ À Dii sáabu kpá, a ludambɛ zĩ̀kpɛɛnↄ a píngi, à zĩkɛri kɛ̀ eè à pↄyeziyã kɛɛnↄ.

²² À Dii sáabu kpá, amↄa à pↄ́kɛnanↄ a píngi guu kɛ̀ èe kí bleennↄ baama píngi. Ma swɛ̃̀, ǹ Dii sáabu kpá.