SAAMUNƆ 10 - Bokobaru Bible

Wɛ́ɛkɛna Ludaa à yãkpaɛ kɛ gbɛ̃nteenↄnɛ

¹ Dii, bↄ́yãnzi ń zɛna zã̀azãzi? À kɛ̀ dia nɛɛ̀ n zĩnda utɛ nawɛ̃akɛgurↄ?

² Gbɛ̃ zaaa è gbãasaidee wɛtɛ à dɛ wadakɛɛ guu, è mↄnafiki kɛnɛ à à kũ.

³ Gbɛ̃ zaaa è a pↄ́nidɛnanↄ ĩa dã, è sãnkarade sáabu kpá è Dii tↄ́ zaaa sí.

⁴ Gbɛ̃ zaaa wada bé à tò è Dii kii wɛtɛro, à Luda laasuu vĩro.

⁵ Yã kɛ̀ è kɛ píngi è bↄnɛ maamɛ, è a zĩnda kaara, è n doka daro, è lɛ́zukii kɛ a ibɛɛnↄa.

⁶ È be é kpágularo, égↄ̃ kú pↄnnaan wahaa sai.

⁷ Ɛgɛ kↄ̃n gbɛ̃kanao kↄ̃n yã pãsĩo à lɛ́ pà, kisia yã kↄ̃n yã zaaao bé ègↄ̃ daa à lɛ́n.

⁸ È naɛ taarisaideenɛ lakutu kpɛɛ lɛ à e à à dɛ asii guu, è mìzaadee kpákpa gusaɛ.

⁹ È naɛ gbɛ̃nↄnɛ asii guu lán músu bà, è naɛ lákpɛn lɛ à e à gbãasaide kũ. Tó à à kũ̀, è à gáɛ kↄ̃n a bào.

¹⁰ Gbɛ̃ kɛ̀ à lè à kũ̀ ègↄ̃ daɛna sↄ̀rↄrↄ, gbãaa bé à à nɛ̀.

¹¹ Gbɛ̃ zaaa è be Luda è yã tàasi kɛro, è ↄ kú a wɛ́ɛamɛ è guu ero.

¹² Dii, ǹ fɛɛ ǹ mↄ́ kↄ̃n n gbãaao, Luda, ǹgↄ̃ takaasideenↄ tàasi kɛɛ.

¹³ Luda, bↄ́yãnzin gbɛ̃ zaaa è dↄkɛnyo lɛzi? È be a swɛ̃̀ guu nɛ́ ĩa daawaro.

¹⁴ Baa kↄ̃n beeeo nɛɛ̀ gbɛ̃nↄ yã'ↄ̃amma e sãnsãn, nɛɛ̀ ń pↄsia yã da lɛ ǹ e ǹ ↄ daḿma. Gbãasaidee è a zĩnda kpámma, tonɛ kɛ̀ gwàri vĩroo dↄnlɛrin n ũ.

¹⁵ Ǹ gbɛ̃ zaaanↄ kↄ̃n gbɛ̃ pãsĩnↄ gã̀sã ɛ́ńnɛ, ǹ ń yã zaaa kɛ̀ aↄ̃ↄe daa wà dↄ̃roo wí ń musu.

¹⁶ Dii ègↄ̃ kí blee gurↄ píngi, à yãdarisaideenↄ é kaatɛ à bùsun.

¹⁷ Dii è takaasideenↄ wɛ́ɛkɛna sí, è ń gba swɛ̃̀, è swã kpá ń wiipɛnazi.

¹⁸ È zɛ kↄ̃n tonɛ kɛ̀ gwàri vĩroonↄ kↄ̃n gbɛ̃ kɛ̀ wèe wɛ́ɛ tãaḿmanↄ, lɛ gbɛ̃ntee kɛ̀ dɛ bùsuti ũ tón tó swɛ̃̀ kɛ̃ gbɛ̃nↄn dↄro yãnzi.

« Roimhe

Air adhart »

Lean sinn:

Ceanglaichean taic

Sanasan