NAANA 11 - Bokobaru Bible

Babɛli kpɛ́didikↄ̃ana

¹ Anduna píngi guu boriyã mɛ̀n doomɛ, yã dↄ̃nkↄ̃n wè o.

² Lán gbɛ̃nↄↄ e sↄ̃ki kpákpaa ↄfãntɛ̃bↄɛ kpa nà, kɛ̀ aↄ̃ kà Babilↄnia bùsu gusararaan, ben aↄ̃ vɛ̃̀ɛ gwe.

³ Aↄ̃ bèkↄ̃nɛ: Wà gá wà kúnku bↄ wà kpáta maamaa. Kúnkun ń gbɛ̀ ũ, kↄntaan ń siminti ũ.

⁴ Ben aↄ̃ bè: Wà wɛ́tɛdaa káɛ wà kpɛ́didikↄ̃ana bo à mìsↄ̃ntɛ̃ zↄ̃ ludambɛɛa. Wà wa zĩnda tↄ́ bↄ lɛ wàtongↄ̃ fãakↄ̃ana doodo anduna guuro yãnzi.

⁵ Ben Dii pìta à wɛ́tɛdaa pì gwà kↄ̃n kpɛ́ lezĩ kɛ̀ gbɛ̃nteenↄ bòo.

⁶ Ben à bè: Aↄ̃ píngi ń borii dↄ̃nkↄ̃mɛ, yã dↄ̃nkↄ̃n aↄ̃è o, ben yã kɛ̀ aↄ̃ↄe bↄↄon yɛ̀ↄ́? Yã kɛ̀ aↄ̃ à laasuu lɛ̀ tia sa aↄ̃é kɛmɛ, pↄ́ke é kpáńnɛ à kɛna guu dↄro.

⁷ Wà pita wà gá gwe wà ń yã yãkↄ̃tɛńnɛ lɛ aↄ̃ton kↄ̃ yã ma dↄro.

⁸ Ben Dii ń fãakↄ̃a gwe doodo anduna guu píngi, ben aↄ̃ ń wɛ́tɛda kaɛna tò.

⁹ Beee yãnzin wà tↄ́ kpà wɛ́tɛ pìnɛ Babɛli, zaakɛ gwen Dii tò anduna bori píngi yã bↄ̀n. Zaa gwemɛ à ń fãakↄ̃a anduna guu píngi.

Sɛmu kↄ̃n Terao boriinↄ

¹⁰ Sɛmu boriinↄ yãn yɛ̀. Sɛmu wɛ̃̀ basↄↄrodee guun à Apasada ì ídana andunalaa gbɛra wɛ̃̀ plaa.

¹¹ À gbɛra à kɛ̀ wɛ̃̀ wàa plaa kpɛ́ basↄↄro a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

¹² Apasada wɛ̃̀ baaakuri asↄↄrodee guun à Sela ì.

¹³ À gbɛra à kɛ̀ wɛ̃̀ wàa plaa kↄ̃n aagↄ̃ↄo a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

¹⁴ Sela wɛ̃̀ baaakuridee guun à Eberu ì.

¹⁵ À gbɛra à kɛ̀ wɛ̃̀ wàa plaa kↄ̃n aagↄ̃ↄo a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

¹⁶ Eberu wɛ̃̀ baaakuri awɛɛsiigↄ̃dee guun à Pɛlɛgi ì.

¹⁷ À gbɛra à kɛ̀ wɛ̃̀ wàa plaa kↄ̃n baaakurio a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

¹⁸ Pɛlɛgi wɛ̃̀ baaakuridee guun à Rɛu ì.

¹⁹ À gbɛra à kɛ̀ wɛ̃̀ wàa do akuri dosai a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

²⁰ Rɛu wɛ̃̀ baaakuri awɛɛplaadee guun à Serugu ì.

²¹ À gbɛra à kɛ̀ wɛ̃̀ wàa do awɛɛswɛɛplaa a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

²² Serugu wɛ̃̀ baaakuridee guun à Nao ì.

²³ À gbɛra à kɛ̀ wɛ̃̀ wàa do a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

²⁴ Nao wɛ̃̀ baaakuri dosaidee guun à Tera ì.

²⁵ À gbɛra à kɛ̀ wɛ̃̀ baswɛɛdo dosai a nɛ́ pãndenↄ ì dↄ gↄ̃gbɛ̃nↄ kↄ̃n nↄgbɛ̃nↄo.

²⁶ Tera kɛ̀ wɛ̃̀ baaagↄ̃ akuri, ben à Abramu kↄ̃n Nao kↄ̃n Aranao ì.

²⁷ Tera boriinↄ yãn yɛ̀. Tera Abramu kↄ̃n Nao kↄ̃n Aranao ì, ben Arana Lutu ì.

²⁸ Arana gà a de Tera wáa zaa Urumɛ Kaladia bùsun, guu kɛ̀ wà à ìn.

²⁹ Abramu kↄ̃n Nao nↄↄ sɛ̀. Abramu naↄ̃ tↄ́n Sarai, Nao naↄ̃ sↄ̃ tↄ́n Milika, Arana nɛ́. Arana pì bé à Isika ì dↄ.

³⁰ Sarai sↄ̃ pãaamɛ, èe nɛ́ iro.

³¹ Ben Tera a nɛ́ Abramu kↄ̃n a dio Lutuo kↄ̃n Abramu naↄ̃ Saraio sɛ̀ bↄna Uru, Kaladia bùsun, aↄ̃ↄe gaa Kanaa bùsun. Kɛ̀ aↄ̃ kà Arana, aↄ̃ vɛ̃̀ɛ gwe.

³² Tera wɛ̃̀ wàa do asↄↄrodee guun à gà zaa Arana.