MATIU 2 - Bokobaru Bible

Sↄsↄnɛyãdↄ̃rinↄ mↄna Yesu gwa

¹ Wà Yesu ì Bɛtɛlɛmu Yudea bùsun kí Hɛrↄdu gurↄ. Ben sↄsↄnɛyãdↄ̃rinↄ bↄ̀ ↄfãntɛ̃bↄɛ kpa, aↄ̃ mↄ̀ Yerusalɛmu,

² aↄ̃ gbɛ̃nↄ là wà bè: Nɛ́ kɛ̀ wà ì Yudanↄ kína ũu kú máa? Wa à sↄsↄnɛ è ↄfãntɛ̃bↄɛ kpa, ben wa mↄ kúɛnɛ.

³ Kɛ̀ kí Hɛrↄdu yã pì mà, à bídi kɛ̀ kↄ̃n Yerusalɛmudeenↄ ń píngi.

⁴ À Yuda sa'orikinↄ kↄ̃n ludayãdannɛrinↄ kàkↄ̃a ń píngi, ben à ń lá guu kɛ̀ weé Mɛsaya in.

⁵ Aↄ̃ wèàla wà bè: Bɛtɛlɛmumɛ zaa Yudea bùsun. Zaakɛ lán annabi kɛ̃̀ nàn yɛ̀:

⁶ Bɛtɛlɛmu kɛ̀ kú Yudanↄ bùsun, ń kɛ̃sãna Yuda wɛ́tɛnↄziro fá. Zaakɛ n guun kína é bↄn, kɛ̀ eé dↄ ma gbɛ̃ Isarailinↄnɛ aɛ.

⁷ Ben Hɛrↄdu sↄsↄnɛyãdↄ̃rinↄ sìsi asii guu, à sↄsↄnɛ pì bↄgurↄ sãnsãn gbèkaḿma.

⁸ Ben à ń gbarɛ Bɛtɛlɛmu à bè: À gá à nɛ́ pì baaru gbekagbeka kↄ̃n làakario. Tó a à è, à mↄ́ à omɛ, mapi se, mɛ́ gá kúɛnɛ.

⁹ Kɛ̀ aↄ̃ kína yã mà, ben aↄ̃ dà zɛ́n. Ben sↄsↄnɛ kɛ̀ aↄ̃ↄ è ↄfãntɛ̃bↄɛ kpa yãa pì dↄ̀ńnɛ aɛ dↄ ai à gàa à zɛ̀ nɛ́ pì kúkiila.

¹⁰ Kɛ̀ aↄ̃ sↄsↄnɛ pì è, aↄ̃ pↄↄ kɛ̀ nna maamaa.

¹¹ Aↄ̃ gɛ̃̀ kpɛ́n, aↄ̃ nɛ́ pì è kↄ̃n a da Mariamao, ben aↄ̃ kùɛ wà dↄnzi kɛ̀nɛ. Ben aↄ̃ ń auziki àkpatinↄ wɛ̃̀wɛ̃, aↄ̃ à gbà vura kↄ̃n tuaetitio kↄ̃n lí'ↄ gũ nnannaao.

¹² Ludaa òńnɛ nanaa guu kɛ̀ aↄ̃ton bↄɛ Hɛrↄdu kiiaro, ben aↄ̃ tà ń bùsun kↄ̃n zɛ́ pãndeo.

Gana kↄ̃n Yesuo Igipiti

¹³ Aↄ̃ tana gbɛra Dii malaika bↄ̀ à mↄ̀ Yusufuzi nanaa guu à bè: Ǹ fɛɛ ǹ nɛ́ pì sɛ́ kↄ̃n a dao, ǹ bàa lɛ́ ǹ gáńyo Igipiti, nɛ́gↄ̃ kú gwe ai mà mↄ́ mà yã onnɛ dↄ, zaakɛ Hɛrↄdu é nɛ́ pì wɛtɛ à dɛmɛ.

¹⁴ Ben Yusufu fɛ̀ɛ gwãavĩ, à nɛ́ pì sɛ̀ kↄ̃n a dao, à gàańyo Igipiti.

¹⁵ À kú gwe ai Hɛrↄdu gàa à gào. Beee kɛ̀, lɛ yã kɛ̀ Dii ò annabi gãzĩ kɛ yãnzimɛ, à bè: Ma a nɛ́ gbɛ̀sɛ Igipiti.

Nɛ́gↄ̃gbɛ̃nↄ dɛdɛna

¹⁶ Kɛ̀ Hɛrↄdu è sↄsↄnɛyãdↄ̃rinↄ ↄ̃ndↄ̃ↄ kɛ̀azi, ben à pↄ fɛ̃̀ maamaa. À sↄsↄnɛ bↄgurↄↄ taka dↄ̃ yã kɛ̀ à gbèka sↄsↄnɛyãdↄ̃ri pìnↄa yãnzi, ben à gbɛ̃nↄ zĩ̀ aↄ̃ nɛ́gↄ̃gbɛ̃ kɛ̀ aↄ̃ kà wɛ̃̀ plaaa ke kɛ̀ aↄ̃ kɛ̃̀sãzinↄ dɛ̀dɛ Bɛtɛlɛmu kↄ̃n a buraanↄ píngi.

¹⁷ Yã kɛ̀ annabi Yɛrɛmaya ò kɛ̀ sa, à bè:

¹⁸ Wà wii gbãaa mà Rama, wèe ↄ́ↄ dↄↄ, wèe wii pɛɛ. Rasɛli e a nɛ́nↄ ↄ́ↄ dↄↄ, à gì agbaa mazi, zaakɛ aↄ̃ↄ kuu dↄro.

Suna Igipitio

¹⁹ Kɛ̀ Hɛrↄdu gà, ben Dii malaika bↄ̀ à mↄ̀ Yusufuzi Igipiti nanaa guu

²⁰ à bè: Ǹ fɛɛ ǹ nɛ́ pì sɛ́ kↄ̃n a dao, ǹ táńyo Isarailinↄ bùsun, zaakɛ gbɛ̃ kɛ̀ aↄ̃ↄe wɛtɛɛ wà nɛ́ pì wɛ̃̀ndi bↄↄnↄ gàga.

²¹ Ben à fɛ̀ɛ à nɛ́ pì sɛ̀ kↄ̃n a dao, à tàńyo Isarailinↄ bùsun.

²² Kɛ̀ à mà Akɛlau bé èe kí blee Yudea a de Hɛrↄdu gɛ̃ɛ ũ, gwe vɛ̃ɛna vĩa à kũ̀. Luda yã ònɛ nanaa guu, ben à tà Galili bùsun,

²³ à gàa à vɛ̃̀ɛ wɛ́tɛ kɛ̀ wè be Nazarɛti. Lɛn yã kɛ̀ annabinↄↄ ò pàpa lɛ, kɛ̀ aↄ̃ bè: Weé à sísi Nazarɛti gbɛ̃.