MAAKU 12 - Bokobaru Bible

Geepi líkpɛ ayakɛrinↄ

¹ Ben Yesu fɛ̀ɛ èe yãlɛɛkↄ̃zińnɛ à bè: Gbɛ̃ke bé à geepi líkpɛ bà à kara lìgazi, à wɛ̀ɛ yↄ̃̀ geepi'ifɛ̃kii ũ à búdãkpagba dà, ben à bú pì nà ayakɛrinↄnɛ ń ↄzĩ, ben à fɛ̀ɛ táo.

² Kɛ̀ geepizↄ̃gurↄↄ kà, ben à a zĩ̀ri zĩ̀ ayakɛri pìnↄa, lɛ à a geepi bɛɛ pì sí.

³ Ben ayakɛri pìnↄ à kũ̀ wà à gbɛ̃̀, aↄ̃ à gbàrɛ ↄkori.

⁴ Ben à ɛ̀ara à zĩ̀ri pãnde zĩ̀ dↄ. Ben aↄ̃ gbɛ̃ beee lɛ̀ a mìa aↄ̃ wí dàa.

⁵ A ɛ̀ara à gbɛ̃ pãnde zĩ̀ dↄ, ben aↄ̃ gbɛ̃ beee dɛ̀. Lɛn à gbɛ̃ pãndenↄ zĩ̀ lɛ pari, wà ń gbɛ̃kenↄ gbɛ̃̀ wà ń gbɛ̃kenↄ dɛ̀.

⁶ À nɛ́gↄ̃gbɛ̃ mɛ̀n do yenzidee bé à gↄ̃̀nɛ sa, ben à à zĩ̀ zãa à bè: Aↄ̃é ma nɛ́ yã da.

⁷ Ben ayakɛri pìnↄ bèkↄ̃nɛ: Túbiblerin yɛ̀. À tó wà à dɛ, à túbi é gↄ̃ wa pↄ́ ũ.

⁸ Ben aↄ̃ à kũ̀ aↄ̃ à dɛ̀, ben aↄ̃ à gɛ̀ sɛ̀ wà bↄ̀o buraa guu.

⁹ Tↄ̀! Bↄ́n buradee pì é kɛɛ? Eé mↄ́ à ayakɛri pìnↄ dɛdɛ à buraa pì na gbɛ̃ pãndenↄnɛ ń ↄzĩ.

¹⁰ Ée Luda yã kɛ̀ kyó kɛroo? Gbɛ̀ kɛ̀ kpɛ́borinↄ pã kpàzi bé à gↄ̃̀ kpɛ́ gooda gbɛ̀ mìdee ũ.

¹¹ Dii bé à beee kɛ̀, ben à kɛ̀we yãbↄnsaɛ ũ.

¹² Ben aↄ̃ zɛ́ wɛ̀tɛ wà à kũ, zaakɛ aↄ̃ dↄ̃̀ kɛ̀ ń yãnzin à yãlɛkↄ̃zina pì òzi, mↄde aↄ̃ vĩa kɛ̀ pariinɛ, ben aↄ̃ à tò gwe aↄ̃ tà.

Bɛ'ↄↄkpana Sizaa yã

¹³ Ben wà Farisi kenↄ kↄ̃n Hɛrↄdu gbɛ̃nↄ zĩ̀ Yesu kiia ↄ̃ndↄ̃ↄo, lɛ wà à kũ a yã'ona guu.

¹⁴ Kɛ̀ aↄ̃ kà, ben aↄ̃ bènɛ: Dannɛri, wá dↄ̃ kɛ̀ gbɛ̃ yãpuradeen n ũ. Nɛɛ̀ gbɛ̃ wɛ́ɛ gwaro, nɛɛ̀ gbɛ̃ gwena gwaro, nɛɛ̀ Luda zɛ́ dańnɛ súusu. À zɛ́ vĩ wà bɛ'ↄↄ kpá Sizaaↄ́, ke à zɛ́ vĩro? Wà kpáan yↄ́, ke wàton kpáaro?

¹⁵ Yesu ń mↄnafikikɛɛ dↄ̃̀ḿma, ben à bèńnɛ: Bↄ́yãnzin ée ma yↄ̃ↄ ée gwaazi? À mↄ́ ↄↄ pì dooo mà gwa.

¹⁶ Kɛ̀ aↄ̃ↄ kpàa, ben à bèńnɛ: Dé mì wɛ̃zãn yɛ̀ kↄ̃n à tↄ́o? Aↄ̃ wèàla wà bè: Siza pↄ́mɛ.

¹⁷ Ben Yesu bèńnɛ: À pↄ́ kɛ̀ dɛ Siza pↄ́ ũ kpá Sizaa, à pↄ́ kɛ̀ dɛ Luda pↄ́ ũ kpá Ludaa. À yã bↄ̀ ń saɛ.

Gɛ̀nↄ fɛɛna yã

¹⁸ Ben Sadusi kɛ̀ aↄ̃è be gɛ̀nↄ è fɛɛroonↄ mↄ̀ Yesu kiia, aↄ̃ à gbèka wà bè:

¹⁹ Dannɛri, Musa òwe a takada guu à bè, tó gbɛ̃ gà à a naↄ̃ tòn nɛ́'isai, à dãaro gyaanↄↄ pì sɛ́, lɛ à nɛ́ borii dato a vĩ̀inɛ.

²⁰ Tↄ̀! Dedↄ̃nkↄ́deenↄↄ kuu gↄ̃ↄn swɛɛplaa. Woru nↄↄ sɛ̀, ben à gà nɛ́'isai.

²¹ Ben Sabi nↄↄ pì sɛ̀ dↄ, ben à gà à nↄↄ pì tò nɛ́'isai. Ben Biↄ kɛ̀ lɛ dↄ

²² ai à gàa pɛ́ ń swɛɛplaadeea. Aↄ̃ píngi gà nɛ́'isai. Aↄ̃ píngi gbɛran nↄↄ pì gà se.

²³ Gɛ̀nↄ fɛɛgurↄↄ zĩ aↄ̃ dé bé eégↄ̃ nↄↄ pì vĩi? Zaakɛ aↄ̃ gↄ̃ↄn swɛɛplaaa ń píngi aↄ̃ à dↄ̃̀ nↄↄ ũmɛ.

²⁴ Ben Yesu wèńla à bè: A Luda yã kↄ̃n a gbãaao dↄ̃sai yãnzin a sãsãziroo?

²⁵ Tó gɛ̀nↄ fɛ̀ɛ, aↄ̃é nↄↄ sɛ́ro, aↄ̃é zã kɛro, weégↄ̃ kuu lán malaikanↄↄ kuu nà ludambɛmɛ.

²⁶ Gɛ̀nↄ fɛɛna yã musu, ée Musa takada kyó kɛroo? Gura kɛ̀ à gyanto yã òn Luda bènɛ ambe Ibraĩ kↄ̃n Isaakuo kↄ̃n Yakubuo Luda ũ.

²⁷ Luda è kɛ gɛ̀nↄ Luda ũro, gbɛ̃ bɛ̃ɛnↄ Ludamɛ. A sãsã à kɛ̀ bíta.

Dokayã kɛ̀ dɛńlaa

²⁸ Ludayãdannɛri kee kú gwe, à lɛokpakↄ̃a kɛ̀ aↄ̃ↄe kɛɛ mà. Kɛ̀ à è Yesu yã wèńla maamaa, ben à sↄ̃̀zi à à là à bè: Dokayã kparee bé à dɛ à kpaaanↄla píngii?

²⁹ Yesu wèàla à bè: Yã kɛ̀ dɛńlaan yɛ̀: Isarailinↄ à swã kpá. Dii wa Ludan Dii ũ ado.

³⁰ Ǹgↄ̃ ye Dii n Ludazi kↄ̃n nↄ̀sɛo do kↄ̃n n niniio píngi kↄ̃n n laasuuo píngi n gbãa lɛ́n.

³¹ À plaadeen yɛ̀: Ǹgↄ̃ ye n gbɛ̃daaazi lán n zĩnda wɛ̃̀ndi bà. Dokayã kee dɛ beeenↄlaro.

³² Ben ludayãdannɛri pì bènɛ: Yã maamɛ, dannɛri. N yãpuraa ò, n bè Luda mɛ̀n domɛ, à pãndee kuuro, sé àpi.

³³ Yena Ludazi kↄ̃n nↄ̀sɛo do kↄ̃n n laasuuo píngi n gbãa lɛ́n kↄ̃n yena n gbɛ̃daaazi lán n zĩnda wɛ̃̀ndi bào dɛ sa'opↄ kɛ̀ wè ká tɛ́n à tɛ́ kũla kↄ̃n sa'ona bori sãnda píngio.

³⁴ Kɛ̀ Yesu è à yã wèala kↄ̃n làakario, à bènɛ: Gɛ̃na kpata kɛ̀ bↄ̀ Luda kiia guu zã̀nyoro. Zaa gurↄ beeea gbɛ̃kee e gà à yãke laa dↄro.

Mɛsaya bori yã

³⁵ Yesu ɛ̀ara èe yã daańnɛ Luda ua guu, ben à gbɛ̃nↄ là à bè: À kɛ̀ dia ludayãdannɛrinↄ è be Dauda boriin Mɛsaya ũu?

³⁶ Kɛ̀ Luda Nini dìdi Daudaa, à bè: Dii bè ma diinɛ à vɛ̃ɛ a ↄplaazi ai àgↄ̃ à ibɛɛnↄ káɛnɛ a gbá gĩzĩ.

³⁷ Kɛ̀ Dauda bènɛ Dii, à kɛ̀ dia eégↄ̃ dɛ à borii ũ dↄↄ? Ben parii e à yã maa pↄnnaao.

Ludayãdannɛrinↄ kↄ̃n Farisinↄ mↄnafiki

³⁸ À yãdannɛna guu à bè: À làakari kɛ ludayãdannɛrinↄzi. Aↄ̃ègↄ̃ ye tɛtɛnazi kↄ̃n uta ìsinↄ dana, lɛ wàgↄ̃ ì kpákpaaḿma yàranↄa.

³⁹ Aↄ̃ègↄ̃ wɛtɛɛ wà vɛ̃ɛ aduakɛkpɛ vɛ̃ɛki maaanↄ guu kↄ̃n zĩbaa vɛ̃ɛki maaanↄ.

⁴⁰ Aↄ̃è adua gbã̀a kɛ lɛ gbɛ̃nↄ ń e yãnzi, ben aↄ̃è gyaanↄnↄ kpɛ́ síḿma. Aↄ̃ wɛ́ɛtãmma égↄ̃ pãsĩpãsĩ dɛ gbɛ̃ píngi pↄ́la.

Gyaanↄ takaasidee gbaa

⁴¹ Ben Yesu vɛ̃̀ɛ Luda ua guu ↄↄdakii aɛ, èe gbɛ̃nↄ gwaa lán aↄ̃ↄe ↄↄ daan nà. Ɔↄde sànↄↄ e ↄↄ bíta daan.

⁴² Ben gyaanↄ takaasidee mↄ̀ à kↄbↄ plaaa dàn, èe ká sue doro.

⁴³ Ben Yesu a ìbanↄ kàkↄ̃a à bèńnɛ: Yãpuraan mɛ́ɛ ooare, gyaanↄ takaasidee kɛ̀ ↄↄ dà ↄↄdakii guu dɛ gbɛ̃ píngila.

⁴⁴ Zaakɛ aↄ̃ ↄↄ sà guun aↄ̃ bↄ̀n wà kàn ń píngi. Nↄgbɛ̃ kɛ̀ sↄ̃, à takaasikɛɛ guun pↄ́ kɛ̀ à vĩ à pↄ́ bleon à dàn píngi.