LUKU 22 - Bokobaru Bible

Lɛ́kpakↄ̃sↄ̃na Yesuzi

¹ Burɛdi Sɛ́sɛ'ɛ̃zɛ̃sai zĩbaa kɛ̀ wè be Banlaa kà kĩi.

² Sa'orikinↄ kↄ̃n ludayãdannɛrinↄↄ e zɛ́ wɛtɛɛ wà Yesu dɛ, zaakɛ aↄ̃ↄe vĩa kɛɛ gbɛ̃nↄnɛ.

Yudasi bↄna Yesu kpɛɛ

³ Ben Setãn gɛ̃̀ Yudasi kɛ̀ wè benɛ Isikariↄti guu, gↄ̃ↄn kuri awɛɛplaaanↄ dokemɛ.

⁴ Ben Yudasi gàa à lɛ́ kpàkↄ̃sↄ̃ kↄ̃n sa'orikinↄ kↄ̃n Luda ua dãkpari gbɛ̃nsinↄ dian é kɛ nà à Yesu kpáḿma.

⁵ Aↄ̃ pↄↄ kɛ̀ nna, ben aↄ̃ lɛdolɛ kɛ̀ wà ↄↄ kpáa.

⁶ À zɛ̀o, ben èe zɛ́ wɛtɛɛ à Yesu kpáḿma parii mìkpɛɛ.

Banla pↄ́ble kɛkɛna

⁷ Burɛdi Sɛ́sɛ'ɛ̃zɛ̃sai zĩbaa gurↄↄ kà, gurↄↄ kɛ̀ wè Banla sãnɛ bↄ̀rↄ kòto kpá.

⁸ Ben Yesu Pita kↄ̃n Yohanao zĩ̀ à bè: À gá Banla pↄ́bleyã kɛkɛwe.

⁹ Ben aↄ̃ à là wà bè: Ń yezi wà kɛkɛ mámɛ?

¹⁰ Ben à wèńla à bè: Tó a gaa wɛ́tɛ guu, gↄ̃gbɛ̃ ke é daalɛ à í sɛna looo. À tɛ́zi ai ua kɛ̀ eé gɛ̃n.

¹¹ À o ua pì bɛdeenɛ, Dannɛri bè mán pitakii kún, guu kɛ̀ é Banla pↄ́ blen kↄ̃n a ìbanↄo?

¹² Eé kpɛ́ musu bíta kɛ̀ wà kɛ̀kɛ ↄdↄaare. À pↄ́bleyã kɛkɛ gwe.

¹³ Kɛ̀ aↄ̃ gàa, aↄ̃ↄ è lán Yesu òńnɛ nà, ben aↄ̃ Banla pↄ́bleyã kɛ̀kɛ gwe.

Dii pↄ́blee

¹⁴ Kɛ̀ à gurↄↄ kà, Yesu mↄ̀ à vɛ̃̀ɛ gwe kↄ̃n a zĩ̀rinↄ lɛdo.

¹⁵ Ben à bèńnɛ: Banla pↄ́blee kɛ̀ blenaao nii e ma dɛɛ maamaa ai màgↄ̃ gá nawɛ̃a kɛ,

¹⁶ zaakɛ mɛ́ɛ ooare, mɛ́ ble dↄro ai kpata kɛ̀ bↄ̀ Luda kiia gá bↄo gupuraaa, gbasa zĩbaa yãpura gá mↄ́.

¹⁷ Kɛ̀ à togoo sɛ̀, à Luda sáabu kpà, ben à bè: À sí à dↄdↄkↄ̃nɛ,

¹⁸ zaakɛ mɛ́ɛ ooare, mɛ́ geepi'i mi dↄro ai kpata kɛ̀ bↄ̀ Luda kiia gá bↄo gupuraaa.

¹⁹ Kɛ̀ à burɛdi sɛ̀, ben à aubarika dàn à lìkↄ̃rɛ à kpàḿma à bè: Ma mɛ̀ kɛ̀ má kpà a yãnzin yɛ̀, àgaegↄ̃ beee kɛɛ ma yã dↄnaagu yãnzi.

²⁰ Kɛ̀ aↄ̃ pↄ́ blè wà yã̀a, à togoo pì sɛ̀ lɛ dↄ à bè: Ma aru kɛ̀ eé bↄɛareen yɛ̀, Luda bà kuuna kↄ̃n gbɛ̃nↄo dufu aru ũ.

²¹ Ma bↄnkpɛɛdee ↄↄ kúmao taaguu,

²² zaakɛ Gbɛ̃ntee Nɛ́ é kpá guuzi lán Ludaa dìɛnɛ nàmɛ. Wãiyoo gbɛ̃ kɛ̀ eé à kpáḿma pì.

²³ Ben aↄ̃ nà kↄ̃ lalanaa wà bè: Wa dé bé eé yã beee kɛɛ?

Dɛnla yã

²⁴ Ben lɛokpakↄ̃a fɛ̀ɛ ń tɛ́, kɛ̀ aↄ̃ↄ yezi wà dↄ̃ ń gbɛ̃ kɛ̀ dɛ a daala.

²⁵ Ben Yesu bèńnɛ: Bori pãnde kínanↄ è gbãaa ble ń gbɛ̃nↄa, gbãadeenↄ sↄ̃ è ń zĩnda sísi yãmaakɛrinↄ.

²⁶ Mↄde àton kɛ lɛro. Séde gbɛ̃ kɛ̀ bíta a tɛ́ gↄ̃ dɛ lán gbɛ̃ kɛ̀ kɛ̃sãazii bà. Séde a dↄn'aɛdee gↄ̃ dɛ lán gbɛ̃ kɛ̀ èe zĩi kɛɛaree bà.

²⁷ Pↄ́bleri kↄ̃n zĩ̀rio, aↄ̃ dé bé à bítaa? Pↄ́blerinloo? Mapi sↄ̃ má kú a tɛ́ lán zĩ̀ri bàmɛ.

²⁸ Gbɛ̃ kɛ̀ zɛ̀mao ma nawɛ̃akɛna guunↄn a ũ.

²⁹ Lán ma De ma kpa kpatan nà, lɛn mɛ́ a kpá kpatan lɛ se,

³⁰ é pↄ́ blemao ma kpatan, é vɛ̃ɛ kíblekitan àgↄ̃ yã gↄ̃gↄ̃ↄ kↄ̃n Isaraili bori mɛ̀n kuri awɛɛplaaanↄnɛ.

Yesu gĩakɛ à dↄ̃ yã kɛ́ Pita é kɛ

³¹ Simↄ, Simↄ, ǹ ma. Setãn zɛ́ wɛ̀tɛ à a fãfã lán wè pↄ́wɛɛ fãfã nà.

³² Ben ma adua kɛ̀nnɛ lɛ ma náanɛ kɛ̀ ń vĩi tón kɛ̃sãmmaro. Tó n liara n suma, ǹ n gbɛ̃nↄ gba gbãaa.

³³ Pita bènɛ: Dii, má sì wà ma da kpɛ́siaan mà ganyo.

³⁴ Yesu bè: Pita, mɛ́ɛ oonnɛ, ai koo gↄ̃ gá lɛ́ zu gbã̀a, nɛ́ lɛ́ sɛ́mazi gɛ̃̀n aagↄ̃.

³⁵ Ben à ń lá à bè: Kɛ̀ ma a zĩ ↄↄsↄ kↄ̃n bↄ̀kↄlogommao kↄ̃n kyateenↄ sai, pↄ́ke kɛ̃̀sãawaↄ́? Ben aↄ̃ bè: Auo.

³⁶ Ben à bèńnɛ: Tia sa gbɛ̃ kɛ̀ ↄↄsↄ vĩ, à sɛ́. Lɛmɛ dↄ kↄ̃n bↄ̀kↄlogommao. Gbɛ̃ kɛ̀ fɛ̃ɛdaa vĩ sↄ̃ro, à a uta yá à lú.

³⁷ Mɛ́ɛ ooare, séto yã kɛ̀ wà kɛ̃̀ Luda yãn ma musu papa kɛ̀ wà bè: Wà à dìɛ dↄ̃nkↄ̃ kↄ̃n taarikɛrinↄ. Yã kɛ̀ wà kɛ̃̀ ma musu pì bé èe kɛɛ sa.

³⁸ Aↄ̃ bè: Dii, fɛ̃ɛda mɛ̀n plaan yɛ̀. Ben à bèńnɛ: Beee mↄ̀.

Yesu aduakɛna zaa Kùkpɛ sĩ̀sĩgɛɛzi

³⁹ Yesu bↄ̀ à gàa Kùkpɛ sĩ̀sĩgɛɛzi lán è kɛ nà. À ìbanↄↄ tɛ́zi.

⁴⁰ Kɛ̀ à kà guu kɛ̀ èe gaan, à bèńnɛ: À adua kɛ lɛ àton fu yↄ̃agwanaaro.

⁴¹ Ben à kɛ̃̀ḿma à kà lán wè gbɛ̀ zu à lɛ́ɛ zaka bà. Ben à kùɛ à adua kɛ̀

⁴² à bè: Baa, tó ń yezi, ǹ togo'i kɛ̀ síma, mↄde èe kɛ ma pↄyeziyãnlo, séde n pↄ́.

⁴³ Ben malaika bↄ̀ ludambɛ à mↄ̀zi à à gbà gbãaa.

⁴⁴ Kuuna wɛ́ɛtãmma guu èe adua kɛɛ kↄ̃n aĩao. Ben à ísimma e tↄ̃ↄ tↄↄtɛa lán arutↄ̃na bà.

⁴⁵ Kɛ̀ à adua kɛ̀, à fɛ̀ɛ à lìara à sù à a ìbanↄ lè, aↄ̃ↄe ii oo kↄ̃n pↄsiaao.

⁴⁶ Ben à bèńnɛ: À kɛ̀ dia ée ii oo? À fɛɛ à adua kɛ lɛ àton fu yↄ̃agwanaaro.

Yesu kũna

⁴⁷ Kɛ̀ à kpɛ́ èe yã oo, ben wà kà paripari. Gbɛ̃ kɛ̀ wè benɛ Yudasi, à ìba gↄ̃ↄn kuri awɛɛplaaanↄ doke bé à dↄ̀ńnɛ aɛ. Kɛ̀ à sↄ̃̀zi lɛ à lɛ́ pɛ́a,

⁴⁸ ben Yesu bènɛ: Yudasi, lɛ́pɛnaan nɛ́ Gbɛ̃ntee Nɛ́ kpáoḿmaↄ́?

⁴⁹ Kɛ̀ gbɛ̃ kɛ̀ aↄ̃ↄ kú kↄ̃n Yesuonↄ yã kɛ̀ èe mↄↄ è aↄ̃ bè: Dii, wà ń lɛ́lɛ kↄ̃n fɛ̃ɛdaaon yↄ́?

⁵⁰ Ben aↄ̃ gbɛ̃ doo sa'oriki ìsi zĩ̀ri lɛ̀ à à swã ↄplakpapↄ gò.

⁵¹ Ben Yesu bè: À beee tó. Kɛ̀ à ↄ kɛ̀ à swãa, ben à kɛ̀ a gbɛ̀n.

⁵² Ben à bè sa'orikinↄ kↄ̃n Luda ua dãkparinↄ kↄ̃n gbɛ̃nsi kɛ̀ aↄ̃ mↄ̀zinↄnɛ: A mↄmazi kↄ̃n fɛ̃ɛdaanↄ kↄ̃n gònↄ lán kpãi wɛ́ɛdewɛn ma ũu bàↄ́?

⁵³ Lán guu e dↄↄ nà mɛɛ̀gↄ̃ kúao Luda ua, ben ée ↄ kɛmaro. Mↄde gurↄↄ kɛ̀ dɛ a pↄ́ ũmɛ, gusia kíblena gurↄↄmɛ.

Pita lɛ́sɛna Yesuzi

⁵⁴ Kɛ̀ aↄ̃ Yesu kũ̀ wà sùo, aↄ̃ gàao sa'oriki ìsi bɛ. Pita tɛ́ ń kpɛɛ kãaa.

⁵⁵ Kɛ̀ wà tɛ́ lè ua gura, wà kàɛ wà lìgazi, ben Pita mↄ̀ à sↄ̀tↄ ń tɛ́.

⁵⁶ Zↄ̀nↄkpare ke à è, ben à wɛ́ɛ pɛ̀a à bè: Gbɛ̃ kɛ̀kii kúo sↄ̃ nɛ́.

⁵⁷ Ben à lɛ́ sɛ̀zi à bè: Nↄgbɛ̃, má à dↄ̃ro.

⁵⁸ Kɛ̀ à kɛ̀ saa féte gbɛ̃ pãnde à è, ben à bè: Mpi se, aↄ̃ gbɛ̃ doon n ũ. Ben Pita bè gↄ̃gbɛ̃ pìnɛ: Mámbeero!

⁵⁹ Kɛ̀ gurↄ zaka gɛ̃̀tɛ lán awa doo bà, gbɛ̃ pãnde nàkↄ̃rɛa à bè: Yãpura gbɛ̃ kɛ̀kii kúomɛ, zaakɛ Galili gbɛ̃mɛ.

⁶⁰ Ben Pita bè: Má dↄ̃ yã kɛ̀ ń tɛ́aro. Zaa gwe gↄ̃ↄ kɛ̀ èe yã oo, ben koo lɛ́ zù.

⁶¹ Dii lìɛ à wɛ́ɛ pɛ̀ Pitaa, ben yã kɛ̀ à ò dↄ̀ Pitan kɛ̀ à bè, ai koo gↄ̃ gá lɛ́ zu gbã̀a, eé lɛ́ sɛ́azi gɛ̃̀n aagↄ̃.

⁶² Ben Pita bↄ̀ bàazi à pↄsia ↄ́ↄ dↄ̀.

Yesu fabona

⁶³ Gbɛ̃ kɛ̀ aↄ̃ↄe Yesu dãkpaanↄ à fabò aↄ̃ à gbɛ̃̀.

⁶⁴ Aↄ̃ pↄ́ yìnɛ a uua, ben aↄ̃ↄe à lalaa wà bè: Ǹ annabikɛyã o, dé bé à n lɛɛ?

⁶⁵ Dↄkɛona guu aↄ̃ yã pari pãndenↄ ònɛ dↄ.

Yuda gbɛ̃nsinↄ yãkpaɛkɛna kↄ̃n Yesuo

⁶⁶ Kɛ̀ guu dↄ̀, Yuda gbɛ̃nsinↄ kↄ̃ kàkↄ̃a, sa'orikinↄ kↄ̃n ludayãdannɛrinↄ ń píngi, ben aↄ̃ Yesu sɛ̀ wà gàao ń yãkpaɛkɛkiia.

⁶⁷ Ben aↄ̃ à là wà bè: Mɛsayan n ũↄ́? Ǹ owe. À wèńla à bè: Tó má òare, é síro.

⁶⁸ Tó ma yãke làawa sↄ̃, é wero.

⁶⁹ Zaa tia la Gbɛ̃ntee Nɛ́ égↄ̃ vɛ̃ɛna Luda Gbãade ↄplaazi.

⁷⁰ Ben baade píngi bè: Ase Luda Nɛ́n n ũↄ́? Ben à wèńla à bè: Lán á ò nà, mámbe à ũ.

⁷¹ Ben aↄ̃ bè: Wa bà ũgba kↄ̃n sèedadeeo dↄↄ? Wá mà à lɛ́zĩ kↄ̀.