Bìoball air-loidhne

LAASUUDEE 12 - Bokobaru Bible

¹ Ǹ tó n Kɛ̀ri yã gↄ̃ dↄngu n gↄ̃kparɛkɛgurↄ ai gurↄ zaaa gá ká, ai wɛ̃̀ kɛ̀ nɛ́ be nɛ́ɛ à nnaa ma dↄrooa.

² Ǹ tó à yã gↄ̃ dↄngu ai ↄfãntɛ̃ kↄ̃n gupuraao gↄ̃ lago, ai mↄvura kↄ̃n sↄsↄnɛnↄ gↄ̃ sia kũ, ai loumana gbɛra guweresai gↄ̃ gá su.

³ Gurↄ beeea n ↄↄnↄ égↄ̃ lugaluga, n gbánↄ é koko, n pↄ́sobↄnↄ é kámma bo kɛ̀ aↄ̃ↄ pari dↄro yãnzi, n gugwabↄnↄ é guu e ń windo guu dãadãa.

⁴ N lɛ́ égↄ̃ nakↄ̃ana gãalɛ, wísilↄgbɛ kĩi é busɛ kũnnɛ. Bãanↄ wiii é n vu iin, nↄkparɛnↄ lɛ̀ é kɛnnɛ busɛ.

⁵ Nɛ́ vĩa kɛ gulezĩnɛ kↄ̃n lili'ona zɛ́ guuo, n mìkã é pura kũ lán desu vú bà. Nɛ́ n zĩnda gáɛ lán kwa táa'ona bà, pↄ́ke é n mɛ̀ fɛɛ dↄro, zaakɛ gbɛ̃ntee è gá a gákiiamɛ, ben ↄ́ↄdↄrinↄ ègↄ̃ lili oo gãalɛ.

⁶ Ǹ tó n Kɛ̀ri yã gↄ̃ dↄngu ai n kondogi bà gↄ̃ gá kɛ̃, ai n vura taa gↄ̃ gá kpaato kũ, ai n í loo gↄ̃ gá wíwi, ai n lↄ̀gↄ googa gↄ̃ gá wí,

⁷ ai n bùsuti gↄ̃ ɛara à gá gɛ̃ tↄↄtɛn, guu kɛ̀ à bↄ̀n, ai n ninii gↄ̃ gá tá Luda kɛ̀ kpàmmaa kiia.

⁸ Ma laasuude ma bè: Yã pã búgubugu, à píngi pãmɛ.

Yã pì mìdɛna

⁹ Beee gbɛra lán laasuudee pì ↄ̃ndↄ̃ nà, à dↄ̃na dàdańnɛ. À laasuu lɛ̀ à kpáɛ kɛ̀ yãzi, ben à yáasinↄ kɛ̀ pari.

¹⁰ À kpáɛ kɛ̀ yã maaazi, ben à yã pìnↄ kɛ̃̀ a zɛ́a, bensↄ̃ yãpuramɛ.

¹¹ Ɔ̃ndↄ̃dee yãnↄↄ dɛ lán gò kɛ̀ wè pↄ́kãdeenↄ zↄ̃o bàmɛ, aↄ̃ yã'onanↄↄ dɛ lán kuusa kɛ̀ wà pà gínginnↄ bà. Sãdãri mɛ̀n doo bé à yã pìnↄ dà.

¹² Ma nɛ́, ǹ làakari kɛ, ǹton yãke kaaranlo. Wè takadanↄ kɛ̃ paripari, à lɛ́ vĩro. Kyókɛna bíta sↄ̃ è mɛ̀ kpasamɛ.

¹³ Wà à píngi mà, à mìdɛnan yɛ̀: Ǹ vĩa kɛ Ludanɛ, ǹgↄ̃ à yãdiɛnanↄ kũna, zaakɛ baade píngi yãn gwe.

¹⁴ Luda é yãkpaɛ kɛ wa yã píngi musu, kↄ̃n yã kɛ̀ utɛnao píngi, baa à maaa ke à zaaa.

« Roimhe

Air adhart »

Lean sinn:

Ceanglaichean taic

Sanasan