LAASUUDEE 1 - Bokobaru Bible

Yã píngi pãmɛ

¹ Laasuude Dauda nɛ́, Yerusalɛmu kína yãn yɛ̀.

² Ma laasuude ma bè: Yã pã búgubugu, yã pã búgubugu, à píngi pãmɛ.

³ Bↄ́ àren gbɛ̃ntee è e anduna guu nawɛ̃a kɛ̀ èe kɛɛ a zĩ píngi guua?

⁴ Kpàɛnↄ è gɛ̃tɛ, wurenↄ è su, mↄde anduna ègↄ̃ kuu gurↄ píngimɛ.

⁵ Ɔfãntɛ̃ è bↄ, è gɛ̃, è wã à ɛara à gá guu kɛ̀ è bↄn.

⁶ Ĩa è káka sↄↄmɛtɛ kpa, è liara à su gu'igbãroo kpa, ègↄ̃ ligaligaa àgↄ̃ gaa àgↄ̃ suu.

⁷ Swa píngi í ègↄ̃ kaa ísiaa guumɛ, mↄde ísiaa è paro, í pìnↄ è ɛara wà su swaa pìnↄ mìamɛ.

⁸ Pↄ́ píngi è ń kpasa, kpasa pì yã gɛ̃̀ onala. Gugwana è mↄ wɛ́ɛaro, yãmana è swã paro.

⁹ Yã kɛ̀ kuu yãa bé eé ɛara àgↄ̃ kuu dↄ, yã kɛ̀ wà kɛ̀ yãan weé ɛara wà kɛ dↄ. À dufu kee kú anduna guuro.

¹⁰ Pↄ́kee kuu kɛ weé be: Ǹ pↄ́ dufu ke gwaↄ́? Auo! À gĩakɛ à kuu wa ã zaa zi kↄ̀.

¹¹ Gbɛ̃ káakunↄ yã ègↄ̃ dↄ gbɛ̃ken dↄro. Baa gbɛ̃ kɛ̀ aↄ̃égↄ̃ kuu ziaanↄ, aↄ̃ yã é dↄ gbɛ̃ken ziakpɛɛ zĩro.

¹² Ma laasuude ma kí blè Isarailinↄa Yerusalɛmu.

¹³ Ma mɛ̀ kpà yã kɛ̀ wèe kɛɛ anduna guu píngi tàasikɛnaa, má gwàgwa ↄ̃ndↄ̃'ↄ̃ndↄ̃ má è Luda zĩ pãsĩ dà gbɛ̃nteenↄnɛ aↄ̃ kɛ.

¹⁴ Ma yã kɛ̀ wèe kɛɛ anduna guu è píngi, à píngi nɛ́ pãmɛ, pɛna gukoriamɛ.

¹⁵ Pↄ́ kotina porona vĩro, wè e wà pↄ́ kɛ̀ kuuroo naroro.

¹⁶ Ben má ò ma nↄ̀sɛ guu ma bè: Ǹ gwa! Ma ↄ̃ndↄ̃ↄ bíta dɛ gbɛ̃ kɛ̀ aↄ̃ kpata blè Yerusalɛmu ma ãanↄla ń píngi, ma ↄ̃ndↄ̃ kↄ̃n ma dↄ̃nao wɛ́ɛ bↄ̀ maamaa.

¹⁷ Ben ma mɛ̀ kpà ↄ̃ndↄ̃ asii dↄ̃naa lɛ mà yↄ̃nkↄkɛ kↄ̃n mìsaiyão asii dↄ̃, ben má è beee nɛ́ pɛna gukoriamɛ dↄ.

¹⁸ Ɔ̃ndↄ̃ bíta è mↄ́ kↄ̃n nↄ̀sɛyakana bítaomɛ, wè yã'ↄ̃amma e ń dↄ̃na lɛ́mmɛ.

« Roimhe

Air adhart »

Lean sinn:

Ceanglaichean taic

Sanasan