EBERUNƆ 8 - Bokobaru Bible

Yesun wa Sa'oriki ũ

¹ Yã kɛ̀ wée oo mìn yɛ̀: Wá sa'oriki beee taka vĩ vɛ̃ɛna kíblekitaa musu Luda Bítadee ↄplaazi.

² È zĩi kɛ Ludakukiia, bisakuta yãpuraa kɛ̀ Dii dↄ̀n, èe kɛ pↄ́ kɛ̀ gbɛ̃nteenↄↄ dↄ̀nlo.

³ Zaakɛ gbadana kↄ̃n sa'onao yãnzin wè sa'oriki píngi kázi, à maa àpi gↄ̃ pↄ́ vĩ à kpá se.

⁴ Tó à kú anduna guu, eégↄ̃ dɛ sa'ori ũro, zaakɛ sa'ori kɛ̀ aↄ̃è gbaanↄ kpá lán doka dìɛ nànↄↄ kuu kↄ̀.

⁵ Zĩi kɛ̀ aↄ̃ↄe kɛɛ nɛ́ pↄ́ kɛ̀ kú musu takamɛ, à niniimɛ. Beee yãnzi kɛ̀ Musa yezi à bisakutaa dↄ, Luda bènɛ à làakari kɛ à pↄ́ kɛ̀ a à taka ↄ̀dↄanɛ kpiii musu kɛ lán à dɛ nà píngi.

⁶ Yesu bé Luda bà kuunawao yãkɛkɛri ũ. Zaakɛ Luda bà kuunawao pì dɛ à bà kuunańyo ziila, zĩi kɛ̀ wà dànɛ dɛ sa'oriki pìnↄ pↄ́la. Luda bà kuunawao pì lɛ́gbɛ̃na dɛ à ziila dↄ.

⁷ Tó Luda bà kuunańyo zii pì papanamɛ yã, lɛ à plaadee zɛ́ vĩro.

⁸ Kɛ̀ Dii Isarailinↄ taari è à bè: À gurↄↄ e mↄↄ kɛ̀ mɛ́ ma bà kuuna kↄ̃n Isarailinↄ kↄ̃n Yudanↄ dufu kɛ.

⁹ Eégↄ̃ dɛ lán ma bà kuuna kↄ̃n ń dezinↄo gurↄↄ kɛ̀ ma ń kũ ń ↄↄa ma ń bↄ́ɛ Igipiti bàro. Zaakɛ aↄ̃ↄe zɛ kↄ̃n ma bà kuunańyooro, ben ma ń tón.

¹⁰ Ma bà kuuna kↄ̃n Isarailinↄ gurↄ beeenↄ gbɛra yãn yɛ̀: Mɛ́ ma dokayãnↄ dańnɛ ń nↄ̀sɛ guu, mɛ́ kɛ̃ ń swɛ̃̀a. Mɛ́gↄ̃ dɛ ń Luda ũ, aↄ̃égↄ̃ dɛ ma gbɛ̃nↄ ũ.

¹¹ Aↄ̃ gbɛ̃ke é yã dada a daanɛro, aↄ̃ gbɛ̃ke é ma dↄ̃na da a gbɛ̃nɛro, zaakɛ aↄ̃ píngi égↄ̃ ma dↄ̃mɛ, nɛ́ féte gbɛ̃nsi ń píngi.

¹² Mɛ́ sùu kɛńyo kↄ̃n ń taarinↄ, mɛ́ ń durunnↄ yã da dↄro.

¹³ Kɛ̀ Luda bà kuunańyo dufu pì yã ò, à à káakupↄ zi bò. Pↄ́ kɛ̀ zi kũ̀ à bùsa, à kpana guuzi zã̀ro.

« Roimhe

Air adhart »

Lean sinn:

Ceanglaichean taic

Sanasan