BƆNA 17 - Bokobaru Bible

Í bↄna gbɛ̀n

¹ Isarailinↄ fɛ̀ɛ Sini gbáan ń píngi, aↄ̃ↄe bùra káɛkaɛɛ lán Dii òńnɛ nà, ben aↄ̃ gàa wà bùra kàɛ Rɛfidimu. Aↄ̃ↄe í e wà mì gwero,

² ben aↄ̃ zↄka kà Musazi wà bè: Ǹ wa gba í wà mi. À bèńnɛ: Bↄ́yãnzi ée lɛokpakↄ̃a kɛɛmaozi? A kɛ̀ dia ée Dii lɛɛ ée gwaa?

³ Kɛ̀ ímii e ń dɛɛ, ben aↄ̃ zↄka kà Musazi wà bè: Bↄ́yãnzi n bↄwao Igipitizi? Ń yezi ímii wa dɛ kↄ̃n wa nɛ́nↄ kↄ̃n wa pↄ́kãdeenↄon yↄ́?

⁴ Ben Musa wii pɛ̀ Diizi à bè: Dian mɛ́ kɛ kↄ̃n gbɛ̃ pìnↄ nà? À gↄ̃̀ féte kɛ̀ aↄ̃é ma pápa gbɛ̀o wà ma dɛ.

⁵ Dii bènɛ: Ǹ Isaraili gbɛ̃nsinↄ sɛ́ɛ à dↄ gbɛ̃ pìnↄnɛ aɛ. Ǹ n gò kɛ̀ n Nili lɛ̀o sɛ́ dↄ.

⁶ Mɛ́ zɛ n aɛ Orɛbu gbɛ̀si saɛ gwe. Ǹ gbɛ̀si pì lɛ́, í é bↄ lɛ aↄ̃ mi. Ben Musa kɛ̀ lɛ Isaraili gbɛ̃nsinↄ wáa.

⁷ Ben wà tↄ́ kpà guu pìnɛ Masa, zaakɛ gwen aↄ̃ Dii yↄ̃̀n wà gwà wà bè: Dii kúwaon gweↄ́? Wà tↄ́ kpànɛ Mɛriba dↄ, kɛ̀ Isarailinↄ zↄka kà gwe yãnzi.

Zĩ̀kana kↄ̃n Amalɛkinↄ

⁸ Amalɛkinↄ mↄ̀ zĩ̀ ká kↄ̃n Isarailinↄ Rɛfidimu.

⁹ Ben Musa bè Yↄsuanɛ: Ǹ gbɛ̃nↄ plɛplɛ wa tɛ́ à gá zĩ̀ ká kↄ̃n Amalɛkinↄ. Zia mɛ́gↄ̃ zɛna sĩ̀sĩ kɛ̀kii mìsↄ̃ntɛ̃a kↄ̃n Luda gòo kũna.

¹⁰ Yↄsua kɛ̀ lán Musa ònɛ nà, à gàa zĩ̀ ká kↄ̃n Amalɛkinↄ. Ben Musa kↄ̃n Arunao kↄ̃n Uruo dìdi sĩ̀sĩ pì mìsↄ̃ntɛ̃a.

¹¹ Tó Musa a ↄↄnↄ sɛ̀, Isarailinↄ ègↄ̃ zĩ̀ blee Amalɛkinↄamɛ, mↄde tó à a ↄↄnↄ dìɛ sↄ̃, Amalɛkinↄ ègↄ̃ zĩ̀ blee Isarailinↄa.

¹² Kɛ̀ Musa ↄↄnↄ wã̀, wà gbɛ̀ sɛ̀ wà dìɛ à gbáru à vɛ̃̀ɛa, ben Aruna kↄ̃n Uruo à ↄↄnↄ kũkũna, gbɛ̃ doo ↄplazi, gbɛ̃ doo ↄzɛzi, ben à ↄↄnↄ gↄ̃̀ zɛna ai ↄfãntɛ̃ gàa à gɛ̃̀o kpɛ́n.

¹³ Ben Yↄsua zĩ̀ blè Amalɛkinↄa à ń dɛ́dɛ kↄ̃n fɛ̃ɛdaao.

¹⁴ Dii bè Musanɛ: Ǹ kɛ̀kii kɛ̃ takada guu lɛ àgↄ̃ dɛ dↄngu pↄ́ ũ ǹ o Yↄsuanɛ, zaakɛ mɛ́ Amalɛkinↄ borii bↄ anduna guu ń píngi.

¹⁵ Musa gbãgbãkii bò, ben à tↄ́ kpànɛ Diin ma tuuta ũ

¹⁶ à bè: Ma ↄↄ sɛ̀ Dii kpata kpa. Dii égↄ̃ zĩ̀ ká kↄ̃n Amalɛkinↄ gurↄ píngi.