AYUBA 41 - Bokobaru Bible

Kùkuku

¹ Nɛ́ fↄ̃ ǹ kùkuku kũ kↄ̃n daburuo ǹ gáɛ ǹ bↄoↄ́? Nɛ́ fↄ̃ ǹ bà dↄ à nɛ́nɛaↄ́?

² Nɛ́ fↄ̃ ǹ bà ká à yĩn-ↄ́? Nɛ́ fↄ̃ ǹ à lɛ́tãnka fↄ̃ kↄ̃n kúraoↄ́?

³ Eé agbaa kpákpannɛ ǹ a gbarɛↄ́? Eé bennɛ ǹ sùu kɛↄ́?

⁴ Eé wennɛ ǹ a sɛ́ n zↄ̀ ũ ai a wɛ̃̀ndi lɛ́n yↄ́?

⁵ Nɛ́ à dato lán wè bãa dato nàↄ́? Nɛ́ bà dↄa ǹ kpá n nɛ́nↄgbɛ̃nↄaↄ́?

⁶ Sↄrↄkↄnↄ é kùkuku pì tↄkɛḿmaↄ́? Aↄ̃é à líli latarinↄnɛↄ́?

⁷ Nɛ́ fↄ̃ ǹ à pápa kↄ̃n sakao ǹ à báa fↄ̃ↄ́? Nɛ́ fↄ̃ ǹ à mì kɛ gyágya kↄ̃n sárioↄ́?

⁸ Ǹ wɛtɛ ǹ ↄ kɛa ǹ gwa! Ɔsii pì yã é sãnguro, nɛ́ si ǹ à taka kɛ dↄro.

⁹ Tó nɛ́ɛ daa nɛ́ à fↄ̃, nɛ́ɛ n zĩnda kɛkɛɛmɛ, tó n wɛ́ɛ sìàlɛ, n mɛ̀ è ganzimɛ.

¹⁰ Zaakɛ gbɛ̃ke kùgbãaa e ká à à go a gbɛ̀nlo, dé bé eé fↄ̃ à zɛ ma aɛ sↄ̃ↄ?

¹¹ Dé fĩa bé à dↄma, kɛ̀ mɛ́ bonɛ? Pↄ́ kɛ̀ kú anduna guu píngi nɛ́ ma pↄ́mɛ.

¹² Mɛ́ gí kùkuku pì gbánↄ yã oziro ke à gↄ̃sagbãakɛɛ ke à maakɛɛ.

¹³ Dé bé eé fↄ̃ à à tɛ̀ɛ gogoo? Dé bé eé we à aizi kánɛ?

¹⁴ Dé bé eé we à à lɛ́ wɛ̃kↄ̃a? À swaa kà à gbɛ̃ naasi kũ.

¹⁵ À tɛ̀ɛ dɛ lán sɛngbangonↄ bà à kpɛɛa, à didikↄ̃ana foo sai dↄ̀rↄdↄrↄ.

¹⁶ À tɛ̀ɛ pìnↄ nana kↄ̃amɛ, baa ĩa è gɛ̃kii ero.

¹⁷ Aↄ̃ pɛ́pɛkↄ̃rɛna gíngin, aↄ̃é sí gokↄ̃aro.

¹⁸ Tó à yĩ sã̀, guu è pumɛ, à wɛ́ɛ dɛ lán ↄfãntɛ̃ bↄɛna kↄngↄ bà.

¹⁹ Tɛ́nɛnɛ è bↄ à lɛ́n, tɛ́pũtãna è bↄn dↄ.

²⁰ Tɛ́sukpɛ ègↄ̃ bↄɛ à yĩn lán í kɛ̀ wà dì tɛ́a èe pipii puusu bà.

²¹ À lɛ́'ĩa è tó sĩsĩi tɛ́ sɛ́, tɛ́nɛnɛ è bↄ à lɛ́n.

²² À gbãaa kú à waaamɛ, gbɛ̃ kɛ̀ bↄ̀a mɛ̀ è kɛ kpã̀m.

²³ À báasi ègↄ̃ sↄ̃sↄ̃kↄ̃ana gíngin, à naa gbãngbãn, è nigãro.

²⁴ À kù gbãa lán gbɛ̀ bà, lán wísilↄgbɛ daa bà.

²⁵ Tó à fɛ̀ɛ, swɛ̃̀ è kɛ̃ gↄ̃sagbãaanↄn, aↄ̃è kↄ̃ kɛ̃guu wà kora gákiizi.

²⁶ Fɛ̃ɛdaa kɛ̀ wà à lɛ̀o píngi è bↄaro ke sári ke kà ke saka.

²⁷ È mↄ̀si gwa lán kàba bàmɛ, mↄ̀gotɛ̃ ègↄ̃ dɛnɛ lán lí mùna bàmɛ.

²⁸ È bàa lɛ́ kànɛro, gbɛ̀mba gbɛ̀ ègↄ̃ dɛnɛ lán ése ũkã bàmɛ.

²⁹ Ègↄ̃ gò gwaa lán sɛ̃̀ kori bàmɛ, sári kĩi ègↄ̃ dɛnɛ yáadↄziyã ũmɛ.

³⁰ À gbɛɛ tɛ̀ɛ dɛ lán takaso bà, à gbɛ̀ ègↄ̃ tɛ́ bↄtↄngan lán zùswaaro guwibↄ bà.

³¹ È í ya a lↄ̀n lán í kɛ̀ èe pipii oroon bà, è ísiaa dɛ lán nↄ́sidɛna bà.

³² Í kutuwina ègↄ̃ tɛ́ à kpɛɛ, ísiaa pì è ya à kpɛɛ púu.

³³ À sáa kú anduna guuro, ma pↄ́kɛnanↄ tɛ́ àmbe à vĩa vĩro.

³⁴ È nↄ̀bↄ kɛ̀ aↄ̃è ń zĩnda diɛ bítanↄ da pↄ́ke ũro, àmbe nↄ̀bↄ kɛ̀ aↄ̃ dìɛ wà kànↄ kína ũ.