AYUBA 4 - Bokobaru Bible

Ɛlifaza yãsina Ayubala

¹ Ben Temana gbɛ̃ Ɛlifaza yã sìàla à bè:

² Asa tó gbɛ̃ yã ònnɛ, nɛ́ pↄ fɛ̃roo? Zaakɛ mɛ́ fↄ̃ màgↄ̃ yĩtɛnaro.

³ Ǹ dↄn lán n lɛ́ dà gbɛ̃nↄa pari nà, n gbɛ̃ kɛ̀ aↄ̃ gbãaa yã̀anↄ gbà swɛ̃̀.

⁴ N yã gbɛ̃ kɛ̀ aↄ̃ↄe fuunↄ sɛ̀ lezĩ, n gbɛ̃ kɛ̀ aↄ̃ↄ busananↄ gbà gbãaa.

⁵ Kɛ̀ yã n le sa, ben nɛ́ɛ fuu, kɛ̀ à sùmma, ben n bídi kɛ̀.

⁶ N vĩakɛna Ludanɛ e n làakari kpáɛroo? N kuuna taari sai è tó ǹgↄ̃ tãmaa vĩroo?

⁷ Ǹ laasuu lɛ́ ǹ gwa! Kisia taarisaidee lè ziki ai à gàↄ́? Mán wà gbɛ̃ maaanↄ kàatɛn zikii?

⁸ Gbɛ̃ kɛ̀ yã zaa bú wì à yãkete tↄ̃̀a, má è beee bé è bↄɛnɛ.

⁹ Luda lɛ́'ĩa bé è à kaatɛ, à pↄ́ bↄna a yĩn bé è à dúgu zↄ̃.

¹⁰ À pũtãna kↄ̃n kòto gbãaao lán músu bà è yãa, Luda è à swaa woronɛ.

¹¹ È ga lán músu kɛ̀ nↄ̀bↄ wɛ̀tɛ à kòrazi bà, à nɛ́nↄ é gbasa wà fãakↄ̃a.

¹² Ma yã kpãi mà ĩala, yã pì asii gɛ̃̀ ma swãn.

¹³ Gurↄↄ kɛ̀ mɛ́ɛ nana bɛ̃̀ɛ oo gwãavĩ, gurↄↄ kɛ̀ gbɛ̃nↄ ii ò wà kà zã̀,

¹⁴ vĩa ma kũ mɛ́ɛ lugalugaa, ma mɛ̀ píngi e lugaa.

¹⁵ Ĩa ke borii ma pa ma uua, ma mɛ̀kãsɛsɛ fɛ̀ɛ à zɛ̀.

¹⁶ Kɛ̀ à zɛ̀, mɛ́ɛ à taka dↄ̃ro, pↄ́ pì kú ma aɛ, ben ma à kòto kpãi mà à bè,

¹⁷ gbɛ̃ntee é fↄ̃ àgↄ̃ dɛ yãnnadee ũ Ludanɛↄ́? Gbɛ̃ é fↄ̃ àgↄ̃ zɛ̃na a Kɛ̀ri aɛↄ́?

¹⁸ Zaakɛ Luda è a malaikanↄ náanɛ kɛro, bensↄ̃ è a zↄ̀bleri pìnↄ taari e,

¹⁹ wamↄwa kɛ̀ wa mɛ̀ dɛ lán gũ̀ kpɛ́ bà, wa kasana dɛ bùsu kori ũ bensↄ̃ wè wa dúgu zↄ̃ lán dã̀mboo bà, weé wa pↄ́ o dↄↄ́?

²⁰ Zaa kↄngↄ ai uusiɛ gbɛ̃nↄ è gaga, aↄ̃è kaatɛ ai gurↄ píngi, wè ń tàasi kɛro.

²¹ Luda è ń kuta lí gborońnɛ, ben aↄ̃è ga ↄ̃ndↄ̃kũsai.