2 TIMƆTI 4 - Bokobaru Bible

¹ Ma nannɛ Ludazi kↄ̃n Kirisi Yesu kɛ̀ eé ɛara à mↄ́ à kpata ble à yãkpaɛ kɛ kↄ̃n gbɛ̃ bɛ̃ɛnↄ kↄ̃n gɛ̀wãadeenↄo,

² ǹ Luda yã waazi kɛ. Tó à zɛ́ kɛ̀ kesↄ̃ èe zɛ́ kɛro, ǹgↄ̃ kúo. Ǹ yã diɛńnɛ, ǹ kpãkɛ̃ńzi, ǹ lɛ́ daḿma, ǹ yã dańnɛ kↄ̃n mɛna bítao.

³ Zaakɛ gurↄke é mↄ́ kɛ̀ gbɛ̃nↄ é we wà swã kpá yãzɛdedannɛnaziro. Aↄ̃é yãdannɛrinↄ kakↄ̃ańzi ń zĩnda pↄyeziamɛ, lɛ aↄ̃ yã kɛ̀ kàńnɛ dańnɛ.

⁴ Aↄ̃é ń mìkpɛɛ zu yãpuraanɛ wà aɛ dↄ garanↄa.

⁵ Mpi sↄ̃, ǹgↄ̃ làakari vĩ yã píngi musu. Ǹ nawɛ̃a fↄ̃, ǹ baarunnakpari kɛna kɛ, ǹ n zĩ lɛ́ papa.

Pↄlu kuuna gaa lɛ́zĩ zaa Romu

⁶ Ma gurↄↄ pàpa kↄ̀, weé ma aru kwɛ́ɛ sa'o'i ũ tia.

⁷ Ma ↄsi maaa kà, ma bàa lɛ̀ ma bↄɛzi. Má Yesu yã kũna ma à lɛ́ pàpa.

⁸ Kuuna maa fùra diɛna, èe ma dãa sa. Dii yãkpaɛkɛri maaa bé eé kúmɛ yãkpaɛkɛgurↄↄ zĩ. Èe kɛ mámbee madoro, kↄ̃n gbɛ̃ kɛ̀ aↄ̃ↄ ye à mↄnazinↄ ń píngimɛ.

⁹ Ǹ zɛ́ wɛtɛ ǹ mↄ́ ma kiia kpakpaa.

¹⁰ Demasi ma ton à tà Tɛsalonika, kɛ̀ à ye andunazi yãnzi. Kɛrɛsɛni tà Galatia bùsun, bensↄ̃ Titu tà Dalamatia bùsun.

¹¹ Luku bé à gↄ̃̀mao ado. Ǹ Maaku sɛ́ à mↄ́ lɛdo, zaakɛ è dↄmalɛ zĩi guu maamaa.

¹² Ma Tikiku gbàrɛ Ɛfesu.

¹³ Tó nɛ́ɛ mↄↄ, ǹ ma utagyaba kɛ̀ má tò Kaapu bɛ zaa Toroasi sɛ́ ǹ mↄ́omɛ kↄ̃n ma takadanↄ, atɛ̃nsa à kɛ̀ wà kɛ̀ kↄ̃n báaonↄ.

¹⁴ Alɛsanda sia yã zaaa kɛ̀mɛ maamaa. Dii é yã kɛ̀ à kɛ̀ pì fĩa bonɛ.

¹⁵ Ǹ làakari kɛzi, zaakɛ à bↄ̀ wa yã kpɛɛ pãsĩpãsĩ.

¹⁶ Yãkpaɛkɛnamao káakupↄ guu gbɛ̃kee e zɛmaoro, aↄ̃ ma ton ń píngi. Luda tón ń yã pì daro.

¹⁷ Dii zɛ̀mao à ma gba gbãaa, ben ma zɛ́ è ma waazi kɛ̀ ma à lɛ́ pàpa, bori pãndenↄ mà ń píngi. À ma bↄ músu lɛ́zĩ.

¹⁸ Dii é ma bↄ yã zaaa guu píngi, eé ma mì sí ai mà gá káo à kpatan musu. Àmbe à gakui vĩ gurↄ píngi, aami.

Lɛ́zammana

¹⁹ Ǹ ì kpá Pirisila kↄ̃n Akilaoa kↄ̃n Ɔnɛsifↄru bɛdeenↄ.

²⁰ Erasatu gↄ̃̀ Kↄrinti. Ma Torofimu tò kↄ̃n gyãao Milɛtu.

²¹ Ǹ zɛ́ wɛtɛ ǹ mↄ́ ai buusiɛ gↄ̃ ká. Yubulu kↄ̃n Pudɛnio kↄ̃n Linuo kↄ̃n Kalaudiao kↄ̃n wa gbɛ̃nↄ píngi ì kpàmma.

²² Dii gↄ̃ kúnyo. À gbɛ̃kɛɛ kɛare.