2 TIMƆTI 1 - Bokobaru Bible

Pↄlu tɛ́kana Timↄtin

¹ Mamↄma Pↄlu, Kirisi Yesu zĩ̀ri Luda pↄyezi guu wɛ̃̀ndi kɛ̀ à à lɛ́ gbɛ̃̀ Kirisi Yesu guu yã musu,

² mámbe ma takada kɛ̀ kɛ̃̀nnɛ, ma nɛ́ yenzide Timↄti. De Luda kↄ̃n wa Dii Kirisi Yesuo gbɛ̃kɛɛ kɛnnɛ kↄ̃n sùuo, à n gba aafia.

³ Ma sáabu kɛ̀ ma dezinↄ Ludanɛ kɛ̀ mɛɛ̀ dↄzi kↄ̃n nↄ̀sɛ puraao, zaakɛ n yã ègↄ̃ dↄↄmagu yãana sai ma aduakɛna gwãavĩ kↄ̃n fãantɛ̃o guu.

⁴ Tó wɛ́ɛ'i kɛ̀ bↄ̀mma yã dↄ̀magu, mɛɛ̀ n bɛgɛ kɛmɛ, mɛɛ̀gↄ̃ yezi wà wɛ́ɛ sikↄ̃lɛ, lɛ ma pↄnnaa kɛ bíta.

⁵ N ludanaanɛkɛna kↄ̃n nↄ̀sɛo do yã dↄmagu. N dazi Loisi kↄ̃n n da Yunisio Luda náanɛ kɛ̀ lɛ se, bensↄ̃ má dↄ̃ sãnsãn kɛ̀ nɛ́ɛ kɛɛ lɛ se.

⁶ Beee yãnzi mɛ́ɛ dↄↄngu, ǹ tɛ́ ká gbaa kɛ̀ Ludaa dànnɛɛn gurↄↄ kɛ̀ ma ↄ dìmma,

⁷ zaakɛ Ninii kɛ̀ è wa gba gbãa kↄ̃n yenzio kↄ̃n zĩndakũnadↄ̃ↄon Ludaa kpàwa, èe kɛ nini vĩapↄnlo.

⁸ Beee yãnzi ǹton wí dɛ kↄ̃n wa Dii yã onnɛnaoro. Ǹton wí dɛ ma yãoro, mamↄma kɛ̀ wà ma da kpɛ́siaan Kirisi yãnzi. Ǹ nawɛ̃a kɛ̀ wè kɛ à baaru nna kpana yãnzi kɛmao kↄ̃n Luda gbãaao.

⁹ Àmbe à wa mì sì, à wa sisi wa gↄ̃ a pↄ́ ũ. Èe kɛ yã kɛ̀ wá kɛ̀ yãnzinlo, à zĩnda pↄyezi yãnzimɛ kↄ̃n gbɛ̃kɛɛ kɛ̀ à kɛ̀weeo zaalɛ gurↄↄ e naaro.

¹⁰ Gbɛ̃kɛɛ pì bↄ̀ gupuraaa wa Mìsiri Kirisi Yesu pì mↄna guu sa. À ga gbãaa kàatɛ, à wɛ̃̀ndi kↄ̃n kuuna gurↄ píngio bↄ̀we gupuraaa a baaru nnaa kɛ̀ wè kpá guu.

¹¹ Luda ma diɛ a zĩ̀ri ũ, lɛ mà baaru pì kpàakpa kɛ mà à yã dańnɛ.

¹² Beee yãnzin mɛ́ɛ nawɛ̃a kɛ̀ kɛɛzi, mↄde wí è ma kũro, zaakɛ má gbɛ̃ kɛ̀ ma à náanɛ kɛ̀ dↄ̃, bensↄ̃ má dↄ̃ sãnsãn kɛ̀ eé fↄ̃ à yã kɛ̀ à nàmɛ ma ↄzĩ dãkpa ai a mↄ́gurↄↄ zĩ.

¹³ Ǹgↄ̃ yã kɛ̀ ń mà ma lɛ́zĩ ai a lↄ̀n pì kũna yãzɛdedannɛna zɛ́kpaɛ ũ kↄ̃n ludanaanɛkɛnao kↄ̃n yenzi kɛ̀ wá vĩ Kirisi Yesu guuo.

¹⁴ Ǹ yã maaa kɛ̀ Ludaa nànnɛ n ↄzĩ kũ gbãa kↄ̃n à Ninii kɛ̀ kú wa guu gbãaao.

¹⁵ Ń dↄ̃ kɛ̀ Asia bùsudeenↄ ma zĩnna ń píngi. Figɛlu kↄ̃n Ɛmↄgɛnɛo kú ń tɛ́.

¹⁶ Dii wɛ̃nda dↄ̃ Ɔnɛsifↄru bɛdeenↄnɛ! Zaakɛ à mↄ̀ à ma nↄ̀sɛ kpàɛmɛ à gɛ̃̀n lɛ́ vĩro, èe wí dɛ kↄ̃n ma dana kpɛ́siaan yãoro.

¹⁷ Kɛ̀ à mↄ̀ Romu gↄ̃ↄ, à ma wɛtɛ ai à gàa à bↄ̀ma.

¹⁸ Dii wɛ̃nda dↄ̃nɛ yãkpaɛkɛgurↄↄ zĩ. Ń dↄnlɛ bíta kɛ̀ à kɛ̀mɛ zaa Ɛfesu yã dↄ̃ sãnsãn.