2 TƐSALONIKADEENƆ 3 - Bokobaru Bible

À adua kɛwe

¹ Yã kɛ̀ gↄ̃̀n yɛ̀, wa gbɛ̃nↄ, à adua kɛwe, lɛ Dii yã e à dagula kpakpaa, àgↄ̃ bɛ̀ɛ vĩńnɛ lán à vĩ a kiia nà.

² À adua kɛwe, lɛ à wa bↄ gbɛ̃ zaa mìsaideenↄ ↄzĩ, zaakɛ èe kɛ gbɛ̃ sãnda píngi bé à Luda yã sìro.

³ Dii náanɛ vĩ, eé a gba gbãaa, eé a sí à zaaaa.

⁴ Wa a náanɛ kɛ̀ Dii guu kɛ̀ ée yã kɛ̀ wá òareenↄ kɛɛ, bensↄ̃ égↄ̃ kɛɛ.

⁵ Dii tó à Luda yenzi kↄ̃n Kirisi mɛnao gbázɛ dↄ̃ a swɛ̃̀n.

Wàton mɛa kɛro

⁶ Wa gbɛ̃nↄ, wa naare Dii Yesu Kirisizi, à kɛ̃ wa gbɛ̃ kɛ̀ aↄ̃ↄ mɛa vĩinↄa, kɛ̀ aↄ̃è zĩi kɛ kↄ̃n yã kɛ̀ wá dàńnɛoroonↄ.

⁷ Á dↄ̃ a zĩndanɛ, kɛ̀ à maa àgↄ̃ tɛ́ wa zɛ́kpaɛzi, zaakɛ wée mɛa kɛ gurↄↄ kɛ̀ wá kú a tɛ́ro.

⁸ Wée gbɛ̃ke pↄ́blee sí wá blè fĩabona sairo, wa zĩi kɛ̀ gwãavĩ kↄ̃n fãantɛ̃o, wa nawɛ̃a kɛ̀ ai í sìwa, lɛ wàton gↄ̃ a gbɛ̃kenɛ asoo ũro yãnzi.

⁹ Wá à zɛ́ vĩ à dↄwalɛ, mↄde wá kɛ̀ lɛ, lɛ à wa zɛ́kpaɛ sɛ́ yãnzimɛ.

¹⁰ Gurↄↄ kɛ̀ wá kúao, wá dìɛ kɛ̀ gbɛ̃ kɛ̀ ye zĩkɛnaziroo é pↄ́ blero.

¹¹ Wá mà kɛ̀ a gbɛ̃kenↄ mɛa vĩ, aↄ̃è pↄ́ke kobiro, sé gudɛɛ.

¹² Wá dìɛ gbɛ̃ beee takanↄnɛ, wa nańnɛ Dii Yesu Kirisizi, aↄ̃ vɛ̃ɛki kũ wà zĩi kɛ wà ń zĩnda gwao.

¹³ Apinↄ sↄ̃ wa gbɛ̃nↄ, àton kpasa kↄ̃n yãmaakɛnaoro.

¹⁴ Tó gbɛ̃kee e yã kɛ̀ wá òare takada kɛ̀ guu daro, à à yã bↄ à diɛ. Àton kakↄ̃a kↄ̃n adeeoro, lɛ wí e à à kũ yãnzi.

¹⁵ Mↄde àton íbɛtɛ kpáoro, à lɛ́ daa a gbɛ̃ndoo ũ.

¹⁶ Dii Aafiade a gba aafia gurↄ píngi yã píngi guu. Dii gↄ̃ kúao a píngi.

¹⁷ Mamↄma Pↄlu mámbe ma ìkpammana kɛ̀kii kɛ̃̀ kↄ̃n ma zĩnda ↄↄo. Beeen ma takada píngi sèeda ũ, lɛn mɛɛ̀ kɛ̃ lɛ.

¹⁸ Wa Dii Yesu Kirisi gbɛ̃kɛɛ kɛare a píngi.