2 SAMUƐLI 22 - Bokobaru Bible

Dauda Dii sáabukpana a zĩ̀blena yã musu

¹ Kɛ̀ Dii kí Dauda bↄ̀ Solu kↄ̃n à ibɛɛ kpaaanↄ ↄzĩ, à lɛ̀ dà kↄ̃n Dii tↄ́o

² à bè: Diin ma gbɛ̀si kↄ̃n ma zɛki gbãaao ũ, ma mìsirimɛ.

³ Ma Ludan ma gbɛ̀si ũ, mɛɛ̀ nazi. Àmbe ma sɛngbango ũ ma mìsiri gbãa kↄ̃n ma gulezĩo, ma utɛki kↄ̃n ma bↄkiio, è ma sí gbɛ̃ pãsĩnↄa.

⁴ Dii kà wà à sáabu kpá. Mɛɛ̀ à sísi, è ma bↄ ma ibɛɛnↄ ↄzĩ.

⁵ Góro'itɛ vlɛ̃̀ɛmao, ísↄ̃ kɛ̀ è ń kaatɛ e ma blee.

⁶ Mira bànↄ lìgamazi, gaa takutɛɛ kpàkpamɛ ma aɛ.

⁷ Kɛ̀ má kú nawɛ̃a guu lɛ, ma Dii sìsi, ma wii pɛ̀ ma Ludazi, ben à ma kòto mà zaa a bɛ, ma wiii kà à kiia, à gɛ̃̀ à swãn.

⁸ Tↄↄtɛ lùgaluga à nìgãnigã, kpiiinↄ dègedege ai ń kãsãan. Aↄ̃ lùgaluga kɛ̀ à pↄ fɛ̃̀ yãnzi.

⁹ Tɛ́sukpɛ bↄ̀ à yĩzĩ, tɛ́ kɛ̀ è ń kpata bↄ̀ à lɛ́n, à yↄ̃̀nↄↄ e tɛ́ kɛɛ à aɛ.

¹⁰ À musu wɛ̃̀ à pìta, lou sìsi à gbá gĩzĩ.

¹¹ Èe vĩaa dina kɛrubu kpɛɛ, èe yàa paa ĩala.

¹² À gusiaa dà a zĩndala, ludambɛ sia kũ̀ à kúkiila.

¹³ Zaa à gakui tɛ́kɛna guu lou e pii pãsĩpãsĩ.

¹⁴ Dii pàta zaa musu, Luda Musude kòto dↄ lapatana ũ.

¹⁵ À kà fã̀ ma ibɛɛnↄa à ń fãakↄ̃a, à tò lou pìḿma à pɛ̀ḿma.

¹⁶ Kɛ̀ Dii pàtaḿma, kɛ̀ à pↄ́ bↄ̀ a yĩzĩ, ísia tↄↄtɛ bↄ̀ gupuraaa, anduna kãsãa gↄ̃̀ kaɛna pↄ̃tɛ̃.

¹⁷ À ↄ bↄ̀ zaa musu à ma kũ, à ma bↄ swadaa guu.

¹⁸ À ma si ma ibɛɛ gbãaa ↄzĩ kↄ̃n ma zanguri kɛ̀ aↄ̃ gbãaa dɛmalaanↄ.

¹⁹ Aↄ̃ lɛ̀ɛma ma mↄ́nzikɛgurↄ, mↄde Dii zɛ̀mao.

²⁰ À ma bↄ à ma gba mɛ̀porokii, à ma mì sì, kɛ̀ à yemazi yãnzi.

²¹ Dii yã kɛ̀mɛ ma nↄ̀sɛ maa lɛ́n, à fĩa bòmɛ ma gbãsĩsaikɛ lɛ́n.

²² Zaakɛ má Luda yãdiɛnanↄ kũna, mɛ́ɛ à zaaa kɛ ma a Luda tònlo.

²³ À dokayãnↄ ègↄ̃ dↄↄmɛ aɛ píngi, mɛ́ɛ kpɛɛ li yã kɛ̀ à dìɛnↄnɛro.

²⁴ Má kuuna taari vĩ Diinɛro, má a zĩnda kũna durun sai.

²⁵ Dii fĩa bòmɛ ma nↄ̀sɛ maa lɛ́n, zaakɛ à è má kuu gbãsĩ sai.

²⁶ Náanɛdeen n ũ náanɛdeenↄnɛ, taarisaideen n ũ taarisaideenↄnɛ.

²⁷ Ń wásawasa gbɛ̃ wásawasanↄnɛ, mↄde nɛɛ̀ íbɛtɛ kpá kↄ̃n gbɛ̃ dↄ̀rↄsaideenↄo.

²⁸ Nɛɛ̀ zĩndabusarinↄ mì sí, nɛɛ̀ gbɛ̃ kɛ̀ aↄ̃è ń zĩnda sɛ́ lezĩnↄ sↄ̃ɛ.

²⁹ Dii, ḿbe ma fitia ũ, Dii, nɛɛ̀ ma gusiaa liɛ gupuraa ũ.

³⁰ Kↄ̃n n gbãaao mɛ́ fↄ̃ mà kù kpá karaa, ma Luda gãzĩ mɛ́ fↄ̃ mà vĩ gũ̀la.

³¹ Luda kɛ̀kii sↄ̃ yãkɛna bↄɛzina, Dii yã see vĩro, à wásawasa, à dɛ sɛngbango ũ gbɛ̃ kɛ̀ aↄ̃ nàzinↄnɛ.

³² Dii baasiro, dén Luda ũu? Wa Luda baasiro, dén gbɛ̀si ũu?

³³ Luda bé è ma gba gbãaa, àmbe è zɛ́ poromɛ súusu.

³⁴ È tó ma gbá kãi gↄ̃ nna lán zↄ̃ pↄ́ bà, è tó màgↄ̃ táa oo gulezĩnↄ musu.

³⁵ È zĩ̀kana dadamɛ, ai ma gã̀sã é fↄ̃ à mↄ̀gotɛ̃ sá gá.

³⁶ Nɛɛ̀ n zĩ̀blesɛngbango kpáma, nɛɛ̀ naɛ ǹ ma tↄ́ bↄ.

³⁷ Nɛɛ̀ ma zɛ́ yàasa kũmɛ, lɛ ma gbá tón sataro.

³⁸ Ma pɛɛ ma ibɛɛnↄzi ma ń dúgu zↄ̃̀, mɛ́ɛ ɛara mà suro, sé kɛ̀ ma gaa ma ń dɛdɛ.

³⁹ Ma ń wiwi dúgudugu, aↄ̃ↄe fↄ̃ wà fɛ̀ɛ dↄro, aↄ̃ lɛ̀ɛ wà gↄ̃̀ kaɛna ma gbá gĩzĩ.

⁴⁰ N ma gba gbãaa ma zĩ̀ kào, ń tò ma ibɛɛnↄ mì nàɛmɛ.

⁴¹ Ń tò ma zangurinↄ kpɛɛ lì, ben ma a ibɛɛ pìnↄ kàatɛ.

⁴² Aↄ̃ wii lɛ̀, gbɛ̃kee e ń mì síro, aↄ̃ lɛ́ zù Diizi, èe weńlaro.

⁴³ Ma ń kɛ́ tíkɛtikɛ lán bùsutiti bà, ma táa òḿma lán zɛ́ guu bↄtↄnga bà.

⁴⁴ N ma bↄ ma gbɛ̃ kɛ̀ aↄ̃ fɛ̀ɛmaziinↄ ↄzĩ, n ma kɛ boriinↄ mìdee ũ. Borii kɛ̀ má ń dↄ̃roonↄ è zↄ̀ blemɛ,

⁴⁵ bori zĩ̀tↄnↄ è na ń sàsaa ma aɛ. Tó aↄ̃ ma yã mà, aↄ̃è mì siɛmɛ.

⁴⁶ Aↄ̃ kã è ga, aↄ̃è bↄ ń zɛki gbãaanↄn kↄ̃n luganao.

⁴⁷ Dii kuu! Aubarikadeen ma gbɛ̀si ũ! Wà Luda ma gbɛ̀si ma mìsiri tↄ́ bↄ!

⁴⁸ Luda bé è gɛ̃ɛ bomɛ, è tó boriinↄ mì siɛmɛ,

⁴⁹ è tó mà piti ma ibɛɛnↄn. N ma gba gbãaa dɛ ma zangurinↄla, n ma bↄ gbɛ̃ pãsĩnↄ ↄzĩ.

⁵⁰ Beee yãnzi mɛ́ n sáabu kpá boriinↄ tɛ́, mɛ́ n tↄ́ kpá, Dii.

⁵¹ Dii è zĩ̀ bíta ble kína kɛ̀ à à sɛ̀nɛ, è gbɛ̃kɛɛ kɛ kína kɛ̀ à à kànɛ, mamↄma Dauda kↄ̃n ma boriinↄo ai gurↄ píngi.