Bìoball air-loidhne

1 TIMƆTI 4 - Bokobaru Bible

Tɛ̃̀ yã

¹ Luda Ninii ò wásawasa kɛ̀ gurↄ zãanↄ gbɛ̃kenↄ é pã kpá Yesu zɛ́zi, aↄ̃ↄ tɛ́ yã kɛ̀ zĩnnↄ è ɛgɛdeenↄ da à onanzi, aↄ̃ ń sãsã.

² Mↄnafikidee pìnↄↄ à maaa dↄ̃kↄ̃zi kↄ̃n à zaaaoro, aↄ̃ nↄ̀sɛ gana lán wà be gɛ̃ wãaan wà kɛ̃̀o bà.

³ Aↄ̃è gbɛ̃nↄ dãdã nↄsɛnazi kↄ̃n zãkɛnao, bensↄ̃ aↄ̃è pↄ́ble tɛ̃̀bona da gbɛ̃nↄnɛ, pↄ́blee kɛ̀ Ludaa kɛ̀ a náanɛkɛri kɛ̀ aↄ̃ yãpuraa dↄ̃ↄnↄ yãnzi, kɛ̀ dɛ aↄ̃ ble kↄ̃n sáabukpanao.

⁴ Pↄ́ kɛ̀ Ludaa kɛ̀ píngi maamɛ. Wàton à ke tɛ̃̀ boro, wà ble kↄ̃n sáabukpanao,

⁵ zaakɛ Luda yã kↄ̃n wa aduakɛnao gbãsĩ bↄ̀n.

Kirisi Yesu zĩkɛri maaa

⁶ Tó n yã pìnↄ dà n gbɛ̃nↄnɛ, nɛ́gↄ̃ dɛ Kirisi Yesu zĩkɛri maaa ũ kɛ̀ wà gwà kↄ̃n wa dↄnzizɛ yãnↄ kↄ̃n yãdannɛ maaa kɛ̀ ń tɛ́zio.

⁷ Ǹ mì kɛ̃ fɛɛakaara gara kɛ̀ è kↄ̃ sɛ́ kↄ̃n Luda yãorooa. Ǹ n zĩnda tòto kɛ, lɛ ǹgↄ̃ dɛ ludayãdari ũ.

⁸ Mɛ̀totona àre vĩ féte, mↄde dɛna ludayãdari ũu àre vĩ yã píngi guu, zaakɛ beee è mↄ́ kↄ̃n wɛ̃̀ndio gbã̀a kↄ̃n ziaao.

⁹ Yã kɛ̀kii nɛ́ yãpuraamɛ, à kà wà sí ↄplaplaa.

¹⁰ Weè zĩi kɛ, weè ↄsi ká à musu, zaakɛ wa wɛ́ɛ dↄ Luda Wɛ̃̀ndidezi. Àmbe gbɛ̃ sãnda píngi Mìsiri ũ, atɛ̃nsa à náanɛkɛrinↄ.

¹¹ Ǹ yã pìnↄ diɛńnɛ ǹ dadańnɛ.

¹² Ǹton tó wà dↄkɛnyo kɛ̀ ń dɛ gↄ̃kparɛ ũ yãnziro. Ǹ tó n kuuna zɛ́ ↄdↄa Yesudeenↄnɛ yã'ona guu kↄ̃n yãkɛnao kↄ̃n yenzio kↄ̃n ludanaanɛkɛnao kↄ̃n kuuna gbãsĩ saio.

¹³ Ai màgↄ̃ mↄ́, ǹ aĩa kɛ ǹ Luda yã kyó kɛ gbɛ̃nↄnɛ, ǹ dańnɛ ǹ lɛ́ daoḿma.

¹⁴ Gbaa kɛ̀ Ludaa dànnɛ gurↄↄ kɛ̀ wà annabikɛɛ kɛ̀ n yã musu, bensↄ̃ gbɛ̃nsinↄ ↄ dìdimma, ǹton pã kpáziro.

¹⁵ Ǹ làakari dↄ yã pìnↄa ǹ mɛ̀ kpáa, lɛ baade píngi n gana aɛ e.

¹⁶ Ǹ n zĩnda yã kↄ̃n n yãdannɛnao tàasi kɛ. Ǹgↄ̃ gaa aɛ kↄ̃n yã pìnↄ. Tó ń kɛ̀ lɛ, nɛ́ n zĩnda mì sí kↄ̃n gbɛ̃ kɛ̀ aↄ̃ↄe swã kpaa n yãzinↄomɛ.

« Roimhe

Air adhart »

Lean sinn:

Ceanglaichean taic

Sanasan