1 TƐSALONIKADEENƆ 5 - Bokobaru Bible

¹ Ma gbɛ̃nↄ, yã pì kɛna ke à kɛgurↄↄ onaare zɛ́ vĩro,

² zaakɛ á dↄ̃ sãnsãn lán kpãi è mↄ́ gwãavĩ nà. Lɛn eégↄ̃ dɛ lɛ Dii mↄ́gurↄↄ zĩ.

³ Tó gbɛ̃nↄↄ e bee, wá aafia, wá kú wa làakaria, kaatɛna é mↄ́ḿma kãndo lán nɛ́'iwãwãa è mↄ́ nↄ̀sindadeea nà, aↄ̃é bↄro.

⁴ Apinↄ sↄ̃ wa gbɛ̃nↄ, á kú gusiaanlo, gurↄↄ pì é suawa lán kpãi bàro,

⁵ zaakɛ gupura gbɛ̃nↄn a ũ, fãantɛ̃ gbɛ̃nↄn a ũ a píngi. Gwãavĩ ke gusia gbɛ̃nↄn wa ũro.

⁶ Beee yãnzi wàton ii o lán danↄ bàro. Wà itɛ̃ kɛ wàgↄ̃ kú wa làakaria.

⁷ I'orinↄ è ii o gwãavĩ, wɛ̃dɛrinↄ sↄ̃ è wɛ̃dɛɛ kɛ gwãavĩ.

⁸ Wapinↄ sↄ̃, zaakɛ fãantɛ̃ gbɛ̃nↄn wa ũ, wàgↄ̃ kú kↄ̃n làakario, wà ludanaanɛkɛna kↄ̃n yenzio da mↄ̀ uta ũ, wà mìsina tãmaa kú mↄ̀fura ũ.

⁹ Zaakɛ Ludaa e wa diɛ à pↄfɛ̃ pitawaro. À wa diɛ à wa mì sí wa Dii Yesu Kirisi gãzĩmɛ.

¹⁰ Àmbe à gà wa yãnzi lɛ wàgↄ̃ kúo, tó wá bɛ̃ɛ ke wa anduna tòn yoo.

¹¹ Beee yãnzi à lɛ́ dakↄ̃a, à kↄ̃ gba gbãaa, lán ée kɛɛ nà.

Pↄlu yãdiɛna Tɛsalonikadeenↄnɛ

¹² Ma gbɛ̃nↄ, wa wɛ́ɛ kɛ̀awa, à bɛ̀ɛ lí gbɛ̃ kɛ̀ aↄ̃è zĩi kɛ a tɛ́nↄnɛ, kɛ̀ aↄ̃ iko vĩawa Dii guu, aↄ̃ↄe a daa zɛ́anↄ.

¹³ À ń gakui dↄ̃ńnɛ maamaa yenzi guu zĩi kɛ̀ aↄ̃ↄe kɛɛ yãnzi. Àgↄ̃ nna kↄ̃o.

¹⁴ Ma gbɛ̃nↄ, wa lɛ́ dàawa, à faasaideenↄ da zɛ́a, à gbɛ̃ yĩinↄ gba swɛ̃̀, à làakari dↄ gbãasaideenↄa, à mɛna kↄ̃n baade píngio.

¹⁵ À làakari kɛ, a gbɛ̃ke tón à zaaa fĩa bo kↄ̃n à zaaaoro. À zɛ́ wɛtɛ àgↄ̃ à maaa kɛɛkↄ̃nɛ kↄ̃n gbɛ̃ píngio gurↄ píngi.

¹⁶ Àgↄ̃ kú pↄnnaa guu gurↄ píngi.

¹⁷ Àgↄ̃ adua kɛɛ yãana sai.

¹⁸ Àgↄ̃ Luda sáabu kpaa yã píngi musu. Beee bé à dɛare à pↄyezi ũ Kirisi Yesu guu.

¹⁹ Àton Luda Nini tɛ́ kɛ̀ è káńgu dɛdɛro,

²⁰ àton kya ká annabikɛyãnlo.

²¹ À yã píngi tàasi kɛ, àgↄ̃ à maaa kũna,

²² à mì kɛ̃ zaakɛna bori píngia.

²³ Luda Aafiade tó a kuuna gↄ̃ kú adona yã sãnda píngi guu, à a nini kↄ̃n a wɛ̃̀ndio kↄ̃n a mɛ̀o dãkpaare aafia taari sai ai wa Dii Yesu Kirisi mↄ́gurↄↄ zĩ.

²⁴ Luda kɛ̀ à a sisi à a sɛ náanɛ vĩ, eé yã pì kɛare.

²⁵ Ma gbɛ̃nↄ, à adua kɛwe.

²⁶ À ì kpá wa gbɛ̃nↄa ń píngi kↄ̃n Luda gbɛ̃nↄ lɛ́pɛmmanao.

²⁷ Ma naare Diizi, à takada kɛ̀ kyó kɛ wa gbɛ̃nↄnɛ ń píngi.

²⁸ Wa Dii Yesu Kirisi gbɛ̃kɛɛ kɛare.