1 TƐSALONIKADEENƆ 1 - Bokobaru Bible

Tɛsalonikadeenↄ zɛ́'ↄdↄannɛna

¹ Mamↄma Pↄlu kↄ̃n Silasio kↄ̃n Timↄtio, wámbe wa takada kɛ̀kii kɛ̃̀ Tɛsalonika sↄsi gbɛ̃ kɛ̀ aↄ̃ↄ kú De Luda kↄ̃n Dii Yesu Kirisio guunↄnɛ. Luda gbɛ̃kɛɛ kɛare, à a gba aafia.

² Wa aduakɛna guu a yã ègↄ̃ dↄwagu gurↄ píngi, weègↄ̃ Luda sáabu kpaa a píngi yã musu.

³ Lán èe zĩi kɛɛ a ludanaanɛkɛnaa nà, èe aĩa kɛɛ yenzi guu, bensↄ̃ èe mɛna kɛɛ wɛ́ɛdↄna wa Dii Yesu Kirisizi yãnzi, yã pìnↄ ègↄ̃ dↄwagu Luda wa De aɛzĩ.

⁴ Wa gbɛ̃ Luda yenzideenↄ, wá dↄ̃ kɛ̀ Luda a sɛ,

⁵ zaakɛ kɛ̀ wa baaru nnaa kpàare, wée mↄ́ kↄ̃n yã'onao adoro, wa mↄ kↄ̃n Luda Nini gbãaaomɛ, yã pì wa kũna gbãa maamaa. Á dↄ̃ lán wá kú a tɛ́ nà a aafia yãnzi,

⁶ ben a gↄ̃ wapinↄ kↄ̃n Diio dàdarinↄ ũ. Nawɛ̃a bíta guu a yã pì sì kↄ̃n pↄnnaa kɛ̀ Luda Nini dàaguuo,

⁷ ben a zɛ́ ↄ̀dↄa Yesudee kɛ̀ aↄ̃ↄ kú Masedonia bùsu guunↄnɛ kↄ̃n Girisi bùsuo píngi.

⁸ Dii yã bↄ̀ a kiia, èe zɛ Masedonia kↄ̃n Girisio adoro, a Yesu náanɛkɛna yã dàgula píngi, à baarukpana vĩ dↄro.

⁹ Wèe oo lán wa zɛ́ è a kiia nà, lán a kpɛɛ lì tãanↄnɛ, a aɛ dↄ̀ Ludaa nà, ben ée dↄↄ Luda Wɛ̃̀ndide yãpuradeezi,

¹⁰ ée à Nɛ́ Yesu kɛ̀ à à fɛ̀ɛ bↄna gaan dãa ai à bↄ ludambɛ, à mↄ́ wa sí pↄfɛ̃ kɛ̀ Luda é bↄbↄḿmaa.