Zozie 9 - NYANMIƐN NDƐ'N 1998

Gabaɔnfuɛ'm be gblɛ'n nga be kpɛli'n

¹ Famiɛn nga be o Zurdɛn i bue ng'ɔ kpɛ wia atɔliɛ lɔ'n su'n: oka'n su lɔfuɛ mun o, be nga be tran lika kpɛtɛkplɛɛ'n nun mun o, be nga be o Mediterane jenvie nuan su lele fa ju Liban wun lɔ mun o, be kwlaa be tili Ai i nunnunlɛ ndɛ'n. I sɔ'n ti Ɛtfuɛ mun, nin Amɔrfuɛ, nin Kanaanfuɛ mun, nin Ferezfuɛ mun, nin Evfuɛ mun, ɔ nin Zɛbisfuɛ'm be famiɛn'm

² be fali akunndan kɛ be ´ju gua Zozie nin Izraɛlfuɛ mun be su.

³ Kɛ Gabaɔnfuɛ'm be tili sa nga Zozie fa wlali Zeriko nin Ai be nun'n,

⁴ yɛ be liɛ'n be fali gblɛ. Be fali bajɛ nvuɛn mun ɔ nin nzan guawlɛ kplo nga b'a titi'n bɔ b'a kpa nun'n.

⁵ Be wlali tralɛ titiwa mun, ɔ nin ngbabua nvuɛn nga b'a tanndan nun'n, yɛ be fali kpaun kee nga ɔ'a bubu'n.

⁶ Be ɔli Gilgal nanmue nun lɔ nan b'a se Zozie nin Izraɛlfuɛ mun kɛ: «E fin mɛn kun b'ɔ o mmua kpa'n nun. E klo kɛ e nin amun ´tra aenguɛ.»

⁷ Izraɛlfuɛ'm be tɛli be su kɛ: «Atrɛkpa-a, amun fin e wun koko wa, yɛ e nin amun e wa tra aenguɛ-ɔ!»

⁸ Yɛ be seli Zozie kɛ: «Sɛ a klo'n, e ´yo ɔ sufuɛ.» Zozie kusu usali be kɛ: «?Nvle onin nunfuɛ yɛlɛ amun? ?Amun fin ye sɛ?»

⁹ Be tɛli i su kɛ: «Nannan, e fin mɛn mmua kpa kun nun. Sa nga ti bɔ e ba'n, yɛlɛ Anannganman ɔ Nyanmiɛn i ngan bɔ e tili'n. E tili atrɛ ng'ɔ yili i Ezipt lɔ'n,

¹⁰ ɔ nin sa ng'ɔ fa wlali Amɔr famiɛn nnyɔn nga be o Zurdɛn i bue kun lɔ'n be nun'n: Siɔn b'ɔ ti Ɛsbɔn famiɛn'n, ɔ nin Ɔg b'ɔ ti Bazan famiɛn ng'ɔ tran Astarɔt lɔ'n.

¹¹ E kpɛnngbɛn mun nin e klɔfuɛ'm be kwlaa be seli e kɛ: ‹Amun `wla trɔ nan amun `wɔ, amun `ko to be. Amun `se be kɛ e ti amun sufuɛ, amun nin be `tra aenguɛ.›

¹² Sɛ amun waan amun ´kpɛ ye ato bo'n, amun nian e kpaun'n, kɛ e fɛ i lɔ e ´ba'n, wuun ɔ tɛ lo, sanngɛ yɛ ɔ'a kete ɔ'a bubu yɛ.

¹³ Nzan kplo nga'm be kusu, kɛ e ´fa nzan e ´gua nun lɔ'n, wuun be tɛ yo uflɛ, sanngɛ be yɛ b'a titi yɛ! E tralɛ nin e ngbabua'm b'a yo nvuɛn atin i tɛnndɛn'n ti.»

¹⁴ Izraɛlfuɛ'm be fali aliɛ sɔ'n wie be dili be niannin sanngɛ b'a usa-man Anannganman.

¹⁵ Yɛ Zozie nin be trali aenguɛ-ɔ, b'ɔ kle kɛ be ko kun-man be. Kpɛnngbɛn'm be kusu be tali be nda sɔ wie.

¹⁶ Kɛ ɔ yoli sɔ'n, ɔ dili le nsan, kpɛkuun Izraɛlfuɛ'm be tili i kɛ sran sɔ'm be fin be wun koko lɛ.

¹⁷ Izraɛlfuɛ'm be fɛ lɛ be nantili le nsan, be ´nian-an, be klɔ mun yɛ: Gabaɔn, nin Kɛfira, nin Beerɔt, ɔ nin Kirzat-Zearim.

¹⁸ Be kun be-ɔ, ɔ yo-man ye afin kpɛnngbɛn'm b'a dun mmua ta be nda Anannganman i nyrun. Ɔ man Izraɛlfuɛ'm be ijɔli kpɛnngbɛn mun.

¹⁹ Yɛ be kusu be tɛli su kɛ: «E kwla yo-man be like fi, yɛlɛ kɛ y'a dun mmua y'a ta be nda Anannganman b'ɔ ti Izraɛl Nyanmiɛn'n i nyrun.

²⁰ Amun li, man e yaci be lɛ, sɛ ɔ'a yo-man sɔ'n, Anannganman ´fa ya e wun.

²¹ E `yaci be lɛ sɔ, sanngɛ be yɛ be wa kpɛ e yie'n be man ye-ɔ. Be yɛ be ´sa nzue nin-ɔn.» Kɛ kpɛnngbɛn'm be seli sɔ'n,

²² Zozie flɛli Gabaɔnfuɛ mun nan ɔ'a se be kɛ: «?Ɔ yo sɛ ti yɛ amun kpɛli e gblɛ bɔ amun seli e kɛ amun fin mmua nin-ɔn?

²³ Ato nga amun buali i lɛ'n ti, sannzan wo amun su. Amun ´ka kanga nun tititi. Amun yɛ amun ´kpɛ e yie'n, yɛ amun yɛ amun ´sa nzue nga be fa di min Nyanmiɛn'n i sua'n nun junman nin-ɔn.»

²⁴ Be tɛli i su kɛ: «Sa ti bɔ e yoli sɔ'n yɛlɛ kɛ e tili i kɛ Anannganman ɔ Nyanmiɛn'n ɔ seli i sufuɛ Moiz kɛ ɔ ´fa mɛn nga kwlaa man amun. E tili i ekun kɛ, sɛ amun ba'n, amun wa nunnun mɛn nga nunfuɛ'm be kwlaa. Kɛ e tili i sɔ'n, srɛ dan kpa kunnin ye amun wun. Kɛ ɔ kɔ yo nan y'a nyan nguan'n ti yɛ e yoli sɔ-ɔ.

²⁵ Ɔ man ɔ liɛ yɛlɛ ye. Like nga ɔ waan a ´fa yo ye'n, fa yo ye.»

²⁶ Kɛ Zozie man Izraɛlfuɛ'm b'a kun-man be'n, nga be yoli'n yɛ ɔ o yɛ:

²⁷ ɔ seli be kɛ be kpɛ yie nan be sa nzue man Izraɛl nvle'n, ɔ seli be ekun kɛ be `sa nzue nan be fa kplan Anannganman i sɔwlɛ'n kan Anannganman bɔbɔ ´kle kɛ be kplɛn i lɛ'n. Lele nin ndɛ be anunman'm be tɛ di i sɔ junman liɛ'n.