Zozie 8 - NYANMIƐN NDƐ'N 1998

Ai klɔ'n i falɛ

¹ Anannganman seli Zozie kɛ: «Nán srɛ kun wɔ, nán ɔ klun titi wɔ. A nin wɔ alɛ kunfuɛ'm be kwlaa amun nin Aifuɛ'm be `ko kun. Nian, Ai famiɛn nin i sran mun, nin i klɔ'n nin i nvle'n, n fa be wlali ɔ sa nun.

² Sa nga a fa yoli Zeriko nin i famiɛn'n yɛ a ´fa yo Ai klɔ'n nin i famiɛn nin-ɔn. Sanngɛ klɔfuɛ'm bé bo ninnge nin be nnɛn'm be ti amun liɛ. Ko bu sa klɔ'n i sin lɛ.»

³ Zozie nin i sonja'm be kwlaa be siesieli bé wun kɛ be nin Aifuɛ'm be ´ko kun. Zozie kpali alɛ kunfuɛ akpi-akpi ablasan (30.000),

⁴ ɔ seli be kɛ: «Amun `ko sa klɔ'n i sin lɛ, nán amun trɛn i wun mmua ngboko. Amun `tran amún nyin su.

⁵ E nin sran nga be nin min o wa'n e ´wunnge klɔ'n wun lɔ. Kɛ klɔ'n sufuɛ'm be ´fite kɛ be nin e be ´kun'n, e ´wanndi be nyrun kɛ klikli nun'n liɛ'n sa.

⁶ Be wa wanndi su e su, kpɛkuun e ´cuɛn be e kɔ klɔ wun mmua. Be wa bu i kɛ e su wanndi be nyrun kɛ klikli liɛ'n sa.

⁷ Kɛ ɔ yo sɔ'n, amun kusu amun `fin amun fiawlɛ'n nun fite, kpɛkuun amun `ko fa klɔ'n. Anannganman amun Nyanmiɛn'n ɔ'a fa be ɔ'a man amun.

⁸ Kɛ amun fa klɔ'n cɛ'n, amun `wɔ nun kɛ Anannganman kannin'n sa. Amun `niɛn i kwlaa nga n ´kɛn yɛ'n su yo.»

⁹ Zozie man sonja'm be ɔli kan ɔ kleli be kɛ be ko fia lɛ'n: Ai i wia atɔliɛ, Betɛl nin Ai be afiɛn. Le kun sɔ'n Zozie kusu nin be nga'm be lali.

¹⁰ Nglɛmun ndɛ kpa'n, Zozie sinsinnin i sonja'm be su ɔ nian-niannin be. I sin ɔ nin Izraɛl kpɛnngbɛn'm be dunnin mmua be nyrun kɛ be nin Ai ´ko kun.

¹¹ Sonja'm be kwlaa be nin i ɔli, be juli klɔ'n i ndɛnman lɛ. Be ko jrannin klɔ'n i nglo lɔ lika'n nun. Kongo'n wo be nin klɔ'n be afiɛn.

¹² Zozie kpali be nun sran kɔe akpi nnun (5.000) kɛ be ko sa klɔ'n i wia atɔliɛ lɔ, Betɛl nin Ai be afiɛn.

¹³ Kan alɛ kunfuɛ'm bé sunman be takali be ngblaliɛ'n yɛlɛ klɔ'n i nglo lɔ. Kɛ ɔ ´yo sɔ'n, wuun wie'm be kusu b'a fia klɔ'n i wia atɔliɛ lɔ. Aliɛ cɛnnin Zozie kongo nun lɛ.

¹⁴ Kɛ nglɛmun Ai famiɛn'n wunnin Izraɛlfuɛ mun'n, ɔ nin i sonja'm be fiteli ndɛndɛ kɛ be nin be ´ko kun lika kunngba nga be nin be kunnin klikli lɔ'n, b'ɔ kɔ Zurdɛn i kongo wun lɔ'n. Ɔ si-man kɛ sran wie'm b'a bu b'a sa be kɔmin sin lɔ nan b'a siesie bé wun kɛ be nin be wa kun.

¹⁵ Zozie nin Izraɛlfuɛ'm be yoli bé wun kɛ like bɔ be kwla jran-man lɛ sa. Be wanndi ɔli aawlɛ flɛnnɛn'n i atin'n su lɔ.

¹⁶ Aifuɛ'm be seli be kwlaa be kɛ be su be su. Ɔ man Izraɛlfuɛ'm be cuɛnnin be ɔli klɔ'n wun mmua.

¹⁷ Sran ba kun ɔ'a ka-man Ai lɔ b'ɔ sasa klɔ nin-ɔn. Be kwlaa be suli Izraɛlfuɛ'm be su.

¹⁸ Yɛ Anannganman seli Zozie kɛ: «Tinngɛ ɔ cua'n Ai ndɛnman afin n su wa fa man wɔ.» Yɛ Zozie tinngɛli i cua'n klɔ'n i ndɛnman-an.

¹⁹ Kɛ ɔ tinngɛli cua'n klɔ'n i ndɛnman sa cɛ'n, yɛ Izraɛlfuɛ nga be fiali'n be fin be fiawlɛ nun ndɛndɛ be fiteli-ɔ. Be wanndi wluli klɔ'n nun lɔ, be fali klɔ'n nan b'a wɔ nun.

²⁰ Aifuɛ'm be ´nian bé sin-ɔn, wɛnsrɛn yɛ ɔ fin be klɔ'n nun fite yɛ. Be cuɛn bé wun kusu-ɔ, ɔ yo-man ye kun, afin Izraɛlfuɛ nga be wanndi kɔ aawlɛ'n wun lɔ'n be sali bé sin kɛ be nin be nga be su be su'n be ´kun.

²¹ Kɛ Zozie nin i sran liɛ'm be wunnin kɛ sonja nga be fiali klɔ'n sin lɔ'n be fali klɔ'n bɔ be wunnin sin wɛnsrɛn'n, be sali be sin kɛ be nin Aifuɛ'm be ´kun.

²² Be nga'm be kusu be fɛ i klɔ'n nun lɔ kɛ be ´su Aifuɛ'm be su, kpɛkuun be kpɔfuɛ'm be kali be afiɛn'n nun. Ɔ man Izraɛlfuɛ'm be kunnin be kwlakwla. Be nun kun sa ɔ'a nyan-man wanndiwlɛ, be wie fi nyin a ka-man su, san be famiɛn'n.

²³ I liɛ'n, be trɛli i nan b'a fɛ i a blɛ Zozie.

²⁴ Kan Izraɛlfuɛ'm be kpɔfuɛ'm be fuannin be juli lɛ'n, lɛ yɛ be nunkunnin be klɔfuɛ sɔ mun-ɔn. Kɛ be kunnin be kwlakwla'n, be sali bé sin be klɔ'n nun lɔ nan b'a kun klɔfuɛ nga be kali lɔ'n.

²⁵ Aifuɛ'm be bla nin be yasua'm be ju sran akpi-akpi blu-nin-nnyɔn (12.000). Be kunnin be kwlaa sɔ'n le kun sɔ'n nun.

²⁶ Zozie i cua ng'ɔ tinngɛli i Ai ndɛnman'n, ɔ sieli i lɛ lele san be wieli be kwlakwla be nunnun.

²⁷ Izraɛlfuɛ'm be fali be kpɔfuɛ'm bé bo ninnge mun nin nnɛn nga be o klɔ'n nun'n, kɛ Anannganman fa kan kleli Zozie'n sa.

²⁸ Zozie wɔli Ai klɔ'n nun, ɔ kacili klɔ nvuɛn, sran fi a tran-man su kun lele ndɛ.

²⁹ Be boli Ai famiɛn'n i kɔmin waka kun su. Ɔ kali lɛ lele nnɔsua. Kɛ wia'n tɔli'n, Zozie man be yili i fuɛn'n, be to yili i anuan nga be fa wlu klɔ nun lɔ'n i wun lɔ, nan b'a fa yɛbuɛ kpanngban b'a guɛ i su. Yɛbuɛ sɔ'n tɛ o lɛ ndɛ.

Zozie kanngannin mmla'n Ebal oka'n su

³⁰ Zozie kplannin Izraɛl Nyanmiɛn'n i sɔwlɛ kun oka nga be flɛ i Ebal'n su.

³¹ Ɔ kplɛnnin i kɛ Anannganman i sufuɛ Moiz kan kleli Izraɛlfuɛ mun'n sa. Be klɛli ndɛ sɔ'n Moiz i fluwa'n nun kɛ: «Be `fa yɛbuɛ nga blalɛ nian kɛn-mɛn i'n yɛ be fa kplan Nyanmiɛn sɔwlɛ sɔ nin-ɔn!» Be yili tɛ nga be yrɛ i nnɛn'n kɔlikɔli'n kwlaa ɔ nin bo kun yolɛ i su tɛ'n.

³² Izraɛlfuɛ'm be nyrun lɛ'n, mmla nga Moiz klɛli be laa'n, Zozie klɛli be yɛbuɛ wie'm be su ekun.

³³ Izraɛlfuɛ be kwlaa nin be kpɛnngbɛn mun, be sunianfuɛ nin be jɔlɛ difuɛ mun, ɔ nin aofuɛ nga be o be afiɛn'n be jrannin Anannganman i alaka'n i bue nnyɔn'n su. Bé nyin ta Nyanmiɛn nyrun jranfuɛ nga be sua alaka'n. Izraɛlfuɛ'm be bue o Garizim oka'n i bo lɔ, yɛ be bue kusu o Ebal oka'n i bo lɔ. Moiz waan i sɔ yɛ be yo nan b'a yra Izraɛl nvle'n i nguan-an.

³⁴ Zozie kanngannin ndɛ nga be klɛli mmla fluwa nun'n kwlakwla, yɛ ɔ kanngannin be nuan yralɛ, ɔ nin muae bolɛ, nin sannzan bolɛ ndɛ mun.

³⁵ Zozie kanngannin mmla nga Moiz mannin be'n i ngba kleli nzrafuɛ'm be kwlakwla. Ɔ'a yaci-man ba kun sa lɛ. Kɛ ɔ ´kanngan'n kle be'n, bla mun, ba kanngan mun, ɔ nin aofuɛ nga be o Izraɛlfuɛ'm be afiɛn'n be o be nun wie.