Zozie 7 - NYANMIƐN NDƐ'N 1998

Akan i sa tɛ'n i akatua'n

¹ Izraɛlfuɛ'm b'a fa-man Anannganman i ndɛ'n su. Like ng'ɔ seli be kɛ nán be fa'n, be fali. Zida i awlofuɛ kun, be flɛ i Akan, Karmi wa-a. Karmi i si'n yɛlɛ Zabdi, Zabdi kusu liɛ yɛlɛ Zerak. Akan sɔ'n yɛ ɔ fali ninnge sɔ mun-ɔn, nan Anannganman ɔ'a fa ya Izraɛlfuɛ'm be wun.

² Kɛ Zozie'm be o Zeriko lɔ'n, ɔ sunmannin sran mun Ai lɔ. Klɔ sɔ'n wo Betɛl i wia afiliɛ lɔ, Bɛt-Avɛn klɔ'n i wun lɛ. Ɔ sunmannin be kɛ be ko kpla lika'n nian. Be ɔli, be bali.

³ Be seli Zozie kɛ: «Ɔ fata-man kɛ sonja'm be kwlaa be wɔ kɛ be nin Aifuɛ mun be ´ko kun. Sran akpi nnyɔn (2.000) annzɛ akpi nsan (3.000) ju. Ai klɔ'n i su sran'm b'a sɔn-man, ɔ fata-man kɛ be kle alɛ kunfuɛ'm be kwlaa be yalɛ.»

⁴ Yɛ sran kɔe akpi nsan (3.000) be ɔli-ɔ. Be ɔli kpɛkuun b'a wanndi Aifuɛ'm be nyrun.

⁵ Aifuɛ'n be kunnin be nun sran kɔe ablasan-nin-nsiɛn, be su be nga'm be su be klɔ'n i anuan nun lele ko guɛli i Sɛbarim ndroliɛ'n nun. Izraɛlfuɛ'm bé sa sin bubuli be kpa, srɛ kunnin be.

⁶ Zozie nin Izraɛl kpɛnngbɛn'm be titili be wun tralɛ'm be nun, be fali ndutre guali be ti'n su yɛ be kotoli, be utuli bé nyin ase Anannganman i alaka'n nyrun lele nnɔsua, bé wla b'ɔ boli'n ti.

⁷ Yɛ Zozie waan: «Ee! Anannganman, min Min! ?A kunndɛ kɛ a ´fa e wlɛ Amɔrfuɛ'm bé sa nun nan be kun ye? Aa! Sɛ e si sɔ'n, wuun e kali nzue'n sin lɔ!

⁸ ?Ee e Min, kɛ Izraɛlfuɛ'm b'a wanndi be kpɔfuɛ'm be nyrun'n n ´se sɛ?

⁹ Kɛ Kanaanfuɛ nin mɛn kun nga'm be nunfuɛ'm be wa ti ndɛ nga'n be wa ju be ´kun ye. Be wa nunnun ye mlɔnmlɔn. ?Kɛ ɔ yo sɔ'n, a ´yo sɛ nan ɔ dunman dan'n ɔ'a fite nglo ekun?»

¹⁰ Anannganman tɛli Zozie su kɛ: «Jaso! ?Ɔ yo sɛ ti yɛ a utu ɔ nyin ase sɔ-ɔ?

¹¹ Izraɛlfuɛ'm be yoli sa tɛ, b'a fa-man ndɛ nga n kan kleli be'n su. Be fali like nga n tanninnin be kɛ nán be fa'n. Be wuali ninnge sɔ'm be fa fiali be bɔlɛ nun.

¹² Sɛ be ka sa nga be yoli'n su'n, be su kwla jran-man be kpɔfuɛ'm be nyrun kun. Be ´wanndi sa tititi, sɛ amu'an saci-man ninnge nga n seli amun kɛ nán amun fa'n, n su jran-man amún sin kun.

¹³ Jaso, ko se Izraɛlfuɛ'm be kɛ be siesie bé wun nan e nin be `yia ainman. Se be kɛ be yo bé wun saun nan m bɔbɔ min Anannganman bɔ n ti Izraɛl Nyanmiɛn'n min wan yoo: ‹Ninnge nga n seli amun kɛ nán amun fa'n, ɔ o amun trɔ'n nun. Ɔ man amun su kwla-man amun kpɔfuɛ'm be nyrun jran, san amu'an yi ninnge sɔ mun.

¹⁴ Ainman nglɛmun amun `bla min ja su akpasua akpasua. Akpasua nga n kle'n, man i nun osu'n be bla kunngun'n be wa sin jranjran. Osu nga n kle'n, man i nun awlo mun be bla kunngun'n be wa sin jranjran.

¹⁵ N wa kle be nun sran nga ninnge'n wo i sa nun'n. I sɔ sran liɛ'n be wa fɛ i yi sin nun, be `yrɛ i ɔ nin i sa nun ninnge mun min ndɛ nga n kannin'n i su bɔ ɔ'a fa-man'n, ɔ nin tete b'ɔ boli i Izraɛlfuɛ'm be afiɛn'n ti.»›

¹⁶ Nglɛmun ndɛ kpa'n, Zozie man Izraɛlfuɛ'm be wa sin jranjrannin akpasua akpasua. Zida akpasua'n yɛ Nyanmiɛn kleli-ɔ.

¹⁷ Yɛ Zida i osu kwlaa be wa sin jranjrannin-ɔn, nan ɔ'a kle Zerak i osu'n. Osu sɔ'n i nun awlo'm be wa sin jranjrannin, nan ɔ'a kle Zabdi i awlo'n.

¹⁸ Zabdi i awlo nun yasua'm be sin jranjrannin, nan Nyanmiɛn a kle Karmi i wa Akan. Akan i nannan yɛlɛ Zabdi. Zabdi i si'n yɛlɛ Zerak. Be kwlaa'n be ti Zida akpasua sufuɛ.

¹⁹ Zozie seli Akan kɛ: «N wa, manman Anannganman b'ɔ ti Izraɛl Nyanmiɛn'n. Nian nanwlɛ di, kan sa nga a yoli'n, nán fia wie fi su.»

²⁰ Akan tɛli i su kɛ: «Sakpa min yɛ n yoli Anannganman b'ɔ ti Izraɛl Nyanmiɛn'n i tɛ sɔ nin-ɔn. Nian, sa nga n yoli'n yɛ.

²¹ N wunnin Mezopotami lɔ tralɛ klanman kpa kun, ɔ nin jɛtɛ ufue b'ɔ tra kilo nnyɔn, ɔ nin sika ɔkwlɛ kpɔlɛ kun b'ɔ ju kilo kun nin bue e kpɔfuɛ'm be bɔlɛ nun. Nanwlɛ, kɛ n wunnin ninnge sɔ mun'n, m'an kwla tra-man min anwlɛn yɛ n fali-ɔ. N fuli kunman yɛ n fa be n fa fiali min tannin sua'n nun lɔ, jɛtɛ ufue'n wo i bo.»

²² Zozie sunmannin sran Akan sua lɔ. Be kannin bé wun ɔli, be wunnin ninnge sɔ mun sua'n i klun lɔ, jɛtɛ ufue'n wo i bo.

²³ Be tuli be, nan b'a fa blɛ Zozie nin Izraɛlfuɛ mun Anannganman nyrun.

²⁴ Zozie nin Izraɛlfuɛ'm be kwlaa be fali Akan, ɔ nin tralɛ'n, ɔ nin jɛtɛ ufue'n nin sika ɔkwlɛ kpɔlɛ'n, nin Akan i mma yasua mun, nin i mma bla mun, nin i nannin mun ɔ nin i aflunmun mun, nin i bua nin i boli mun, nin i tannin sua'n, ɔ nin i bo ninnge mun kwlakwla, be fali be kwlaa'n ɔli Nyrɛnnɛn kongo'n nun lɔ.

²⁵ Zozie seli Akan kɛ: «?Ɔ yo sɛ yɛ a kleli e nyrɛnnɛn sɔ-ɔ? Anannganman kusu wa kle wɔ nyrɛnnɛn ndɛ.» Yɛ Izraɛlfuɛ'm be kwlaa be finnin i yɛbuɛ ɔ nin i awlofuɛ mun kwlaa be kunnin be, i sin be yrali be yɛ be wɔli bé bo ninnge mun kwlaa be nun.

²⁶ I sin be fali yɛbuɛ kpanngban kpa be guɛli i su kunndunngluun. Yɛbuɛ kwle sɔ'n tɛ o lɛ ndɛ. I sɔ'n ti yɛ be flɛli lɛ lika sɔ'n kɛ Nyrɛnnɛn kongo nin-ɔn. Kɛ ɔ yoli sɔ'n yɛ Anannganman yacili i ya nin-ɔn.