Zozie 6 - NYANMIƐN NDƐ'N 1998

Izraɛlfuɛ'm be Zeriko i falɛ

¹ Zerikofuɛ'm be nyinnin be anuan'n be toli nun Izraɛlfuɛ'm be ti. Be kwlaa be o klɔ'n klun lɔ, be lɛ-man fitewlɛ, yɛ be lɛ-man wlulɛ.

² Anannganman seli Zozie kɛ: «Nian, m'an fa Zeriko nin i famiɛn'n, ɔ nin i sonja mun m'an man wɔ.

³ A nin ɔ sonja'm be kwlaa amun `bo sin yia klɔ'n, cɛn kun amun `yo i sɔ kpalɛ kun, lele cɛn nsiɛn.

⁴ Man Nyanmiɛn nyrun jranfuɛ nso be fa awɛ nso be dun mmua Nyanmiɛn i alaka'n nyrun. I le nso su'n, amun `bo sin yia klɔ'n kpɛ nso. Kɛ amun ´nanti'n, wuun Nyanmiɛn nyrun jranfuɛ'm be ´fita awɛ nun.

⁵ Sɛ be fita nun cuɛn i bo'n, man sran'm be kpan alɛ kpanlɛ kekle kpa! Kpɛkuun talɛ ng'ɔ sin yia klɔ'n ɔ ´bu gua. Kɛ ɔ ko bu'n, man Izraɛlfuɛ'm be wlu klɔ'n nun, sran kun `wɔ i nyrun ndɛnman su, sran kun `wɔ i nyrun ndɛnman su!»

⁶ Nɛn i wa Zozie flɛli Nyanmiɛn nyrun jranfuɛ mun nan ɔ'a se be kɛ: «Amun `sua Anannganman i alaka'n amun wati su. Man amun nun sran nso be fa awɛ nso be dun mmua alaka'n i nyrun!»

⁷ Yɛ ɔ seli nzrafuɛ'm be kɛ: «Amun `sin! Amun `bo sin yia klɔ'n, man be nga be fa mmua'n be sin Nyanmiɛn i alaka'n nyrun!»

⁸ Be niannin ndɛ nga Zozie kan kleli be'n su be yoli. Nyanmiɛn nyrun jranfuɛ nso nga awɛ'n wo be sa nun'n be sinnin Nyanmiɛn i alaka'n i nyrun. Kɛ be ´nanti kɔ'n, wuun be ´bo awɛ'n.

⁹ Sran wie'm be dun mmua be nyrun, yɛ wie'm be su alaka'n su. Kɛ be ´nanti kɔ'n, wuun Nyanmiɛn nyrun jranfuɛ'm be ´bo awɛ'n.

¹⁰ Zozie seli sran'm be kɛ: «Nán n ti kɛ amun wie su kpan annzɛ ɔ su ijɔ. Sɛ m bɔbɔ n se kɛ: ‹Amun `kpan'n!› Amun ko kpan.»

¹¹ Be nga be sua Anannganman i alaka'n, be fali alaka'n yɛ be nin Izraɛlfuɛ kun nga'm be bo sin yiali klɔ'n kpɛ kun. I sin be ɔli nanmue nun ko lali.

¹² Zozie jasoli nglɛmun ndɛ kpa, Nyanmiɛn nyrun jranfuɛ'm be suali Nyanmiɛn i alaka'n be wati su.

¹³ Nyanmiɛn nyrun jranfuɛ nso nga awɛ'n wo bé sa nun'n be sinnin Nyanmiɛn i alaka nyrun. Kɛ be ´kɔ'n, wuun be ´fita awɛ'n nun. Sran wie'm be dun mmua be nyrun, yɛ be wie'm be su alaka'n su. Kɛ be ´nanti kɔ'n, wuun awɛ'n ´tɛ.

¹⁴ I le nnyɔn sɔ'n su'n, be bo sin yiali klɔ'n kpɛ kun. I sin be ɔli nanmue nun. Be yoli i sɔ lele cɛn nsiɛn.

¹⁵ I le nso'n su'n be jasoli ndɛ kpa, yɛ be bo sin yiali klɔ'n kɛ be fa yo i titi'n sa, sanngɛ le kun sɔ'n liɛ'n be bo sin yiali klɔ'n kpɛ nso.

¹⁶ I kpɛ nso'n su'n, kɛ Nyanmiɛn nyrun jranfuɛ'm be fitali awɛ nun'n, Zozie seli nzrafuɛ'm be kɛ: «Amun `kpan! Anannganman fali klɔ'n mannin amun.

¹⁷ Klɔ sɔ'n ti Anannganman liɛ. I sɔ'n ti amun `nunnun i ɔ nin i nun ninnge'n kwlaa. Amun `yaci Raab b'ɔ ti tekle bla ɔ nin sran nga be o i awlo nun'n be kwlaa be lɛ, yɛlɛ kɛ be nga e sunmannin be kɛ be wa kpla klɔ'n, ɔ fa be fiali.

¹⁸ Sanngɛ yo, nán amun fa like nga Anannganman waan be saci be'n be wie fi kɛ ɔ ´yo nan i sannzan ɔ'a tɔ-man Izraɛl nvle'n su'n ti.

¹⁹ I jɛtɛ ufue o, i sika ɔkwlɛ o, blalɛ fanunfanun mun o, be kwlaa be ti Anannganman liɛ. Be `fa guɛ i sika bɔlɛ'n nun.»

²⁰ Kɛ be boli awɛ'n bɔ nzrafuɛ'm be tili'n, be kpannin alɛ kpanlɛ kekle kpa, kpɛkuun talɛ'n tu tɔli. E ´ijɔ wa-a, Izraɛlfuɛ'm b'a wlu klɔ'n nun lalaa. Sran kun kɔ i nyrun ndɛnman su sran kun kɔ i nyrun ndɛnman su, yɛ be fali klɔ nin-ɔn.

²¹ Be kunnin klɔfuɛ'm be kwlaa, i yasua o, i bla o, i bakan o, i kpɛnngbɛn o, be kunnin ɔ liɛ nannin, nin bua, ɔ nin aflunmun'm be kwlakwla kpan.

Zozie man b'a kun-man Raab

²² Zozie seli sran nnyɔn nga be ko kplali klɔ'n be kɛ: «Amun `wɔ tekle bla'n i awlo lɔ nan amun man ɔ nin i awlofuɛ'm be fite kɛ amun fua kleli i'n sa.»

²³ Be ɔli nan b'a yi Raab nin i si nin i nin, nin i niaan mun, ɔ nin i awlofuɛ'm be kwlaa b'a fite. Be ko sieli be Izraɛl nanmue'n i wun koko lɔ.

²⁴ I sin be wɔli klɔ'n nin i nun ninnge'n kwlaa be nun, san jɛtɛ ufue nin sika ɔkwlɛ, ɔ nin blalɛ mun yɛ be kali lɛ-ɔ. Be liɛ'n, be sieli be Anannganman i bɔlɛ siewlɛ'n nun.

²⁵ Zozie man be yacili Raab b'ɔ ti tekle bla ɔ nin i osufuɛ'm be lɛ. Sran nga Zozie sunmannin be kɛ be ko kpla Zeriko klɔ'n be nian'n, be fialɛ b'ɔ fali be fiali'n ti. Ɔ kali Izraɛlfuɛ'm be afiɛn, yɛ lele ndɛ i anunman'm be tɛ o be afiɛn .

²⁶ I blɛ sɔ'n nun yɛ Zozie boli sannzan kɛ: «Sran kwlaa ng'ɔ jaso kɛ ɔ ´kplan klɔ nga ekun'n, san i wa yasua klikli'n yɛ ɔ ´fa wlɛ i bo ase-ɔ! Yɛ i wa yasua kasiɛn'n yɛ ɔ ´fa wlɛ i anuan mun-ɔn! »

²⁷ Anannganman jrannin Zozie sin. Ɔ man Zozie i dunman'n fuli nvle wunmuan sɔ'n nun.