Zozie 5 - NYANMIƐN NDƐ'N 1998

¹ Kɛ Amɔrfuɛ nga be o Zurdɛn i bue kun lɔ'n nin Kanaanfuɛ nga be o be liɛ jenvie nga be flɛ i Mediterane i nuan'n, be famiɛn'm be tili i kɛ Anannganman jrannin Zurdɛn'n nan ɔ mannin Izraɛlfuɛ'm be atin be kpɛli'n, be wawɛ'n wanndili bé wun. B'a nyan-man anwlɛn kun kɛ be nin Izraɛlfuɛ'm be ´jran be ´kun alɛ.

Izraɛlfuɛ'm be klɛn wlalɛ Gilgal lɔ

² I blɛ kunngba sɔ nun'n Anannganman seli Zozie kɛ: «Sɛsɛ yɛbuɛ san fa yo laliɛ mun fa wla Izraɛl gbanflɛn nga b'a jao su'n be klɛn kɛ be fa yoli i laa'n sa.»

³ Ɔ man Zozie sɛsɛli yɛbuɛ fa yoli laliɛ nan ɔ'a fa wla Izraɛlfuɛ'm be klɛn kpɔlɛ kun su. I sɔ'n ti be wa tɔnnin lika sɔ i dunman kɛ: «Klɛn wlalɛ kpɔlɛ.»

^4-5 Sa nga ti b'ɔ yoli sɔ'n yɛlɛ kɛ blɛ nga Izraɛlfuɛ'm be fin Ezipt lɔ be ´ba'n, wuun b'a wla sran yasua nga b'a ju alɛ kunlɛ'n be klɛn, sanngɛ be kwlaa sɔ'm be wuli aawlɛ flɛnnɛn'n nun. Ba nga be wuli be atin nun'n b'a wla-man be klɛn.

⁶ Izraɛlfuɛ'm be nantili aawlɛ flɛnnɛn'n nun afuɛ ablanan. Be kwlaa nga kɛ be fin Ezipt be ´ba'n, wuun b'a jran alɛ kunlɛ sɔ'n, kɛ afuɛ ablanan'n ´wie'n, wuun b'a wie wu nyin kekle bɔ be yoli i Anannganman su'n ti. I sɔ'n ti kusu ɔ tali be nda kɛ ɔ su ko man-man be atin kɛ be wun mɛn fɛfɛ ng'ɔ fua kleli be nannan mun kɛ ɔ ´fa man be'n .

⁷ Be mma nga be fali mɛn sɔ'n, be yɛ Zozie wlali be klɛn nin-ɔn, yɛlɛ kɛ i blɛ sɔ nun'n, wuun be nian wla-man be klɛn.

⁸ Kɛ be yoli i sɔ'n, be trannin nanmue nun lɛ lele san bé kannin'm be wuli.

⁹ Yɛ Anannganman seli Zozie kɛ: «Ndɛkɛn'n nyannzuɛn nga amun fa fin Ezipt'n, m'an yi i amun su.» I ti yɛ be flɛli lika sɔ'n kɛ Gilgal nin-ɔn. Dunman sɔ'n yɛ ɔ tɛ o i su lele ndɛ-ɔ.

Kanaan lɔ Delɛ-cɛn klikli'n i dilɛ

¹⁰ Izraɛlfuɛ'm be kali Gilgal i nanmue nun lɛ be dili Delɛ-cɛn'n anglo'n i le blu le nnan su, nnɔsua nun, lika kpɛtɛkplɛɛ ng'ɔ mantan Zeriko lɛ'n nun.

¹¹ Kɛ aliɛ cɛnnin'n, be dili Kanaan mɛn'n nun lɔ like, ɔ nin kpaun bɔ b'a gua-man nun kpaun ayre'n, yɛ be nyintɔnnin ble mma be dili.

¹² Kɛ ɔ fin lɛ'n, mani'n yacili gualɛ. Ɔ man i afuɛ sɔ nun'n, mɛn sɔ'n nun aliɛ yɛ be dili-ɔ.

Anannganman i alɛ kunfuɛ'm be kpɛnngbɛn'n

¹³ Le kun kɛ bɔ Zozie kɔ Zeriko b'ɔ mantannin lɔ koko'n, ɔ ´nian-an, sran kun yɛ ɔ jin i nyrun ndɛnman su yɛ, tokofi o i sa nun. Zozie wunngeli i wun lɛ yɛ ɔ usɛli i kɛ: «?A ti e sinfuɛ annzɛ a ti e kpɔfuɛ'm be nun wie?»

¹⁴ Sran sɔ'n tɛli i su kɛ: «N ti-man be wie fi, n ti Anannganman i alɛ kunfuɛ'm be su kpɛnngbɛn. N julɛ yɛ.» Yɛ Zozie tɔli utuli i nyin ase nan ɔ'a se i kɛ: «Min Min, ń su o ɔ nuan'n bo.»

¹⁵ Anannganman i alɛ kunfuɛ'm be su kpɛnngbɛn'n seli Zozie kɛ: «Yi ɔ ja ngbabua'n, afin lika nga a o nun yɛ'n ti Nyanmiɛn liɛ .» Yɛ Zozie yili i ngbabua nin-ɔn.