Zozie 4 - NYANMIƐN NDƐ'N 1998

Bé wla kpɛnlɛ yɛbuɛ blu-nin-nnyɔn'm be ndɛ

¹ Kɛ Izraɛlfuɛ'm be kwlaa be wieli Zurdɛn'n kpɛ'n, Anannganman seli Zozie kɛ:

² «Amun `kpa sran blu-nin-nnyɔn, akpasua kun su sran kun akpasua kun su sran kun.

³ Amun `se be kɛ be `fa yɛbuɛ blu-nin-nnyɔn Zurdɛn'n i afiɛn kan Nyanmiɛn nyrun jranfuɛ'm be jrannin lɛ'n, nan be `fɛ i sɔ yɛbuɛ liɛ mun be `guɛ i kan amun ´la lɛ ndɛ kɔnguɛ'n.»

⁴ Yɛ Zozie flɛli sran blu-nin-nnyɔn nga be kpali be nin-ɔn,

⁵ nan ɔ'a se be kɛ: «Amun `sin Anannganman amun Nyanmiɛn'n i alaka'n i nyrun, Zurdɛn i afiɛn lɔ, nan amun kwlaa amun `fa yɛbuɛ kunngun amun wati su, akpasua kun yɛbuɛ kun akpasua kun yɛbuɛ kun.

⁶ Yɛbuɛ sɔ'm be ti kɛ nzɔliɛ sa amun afiɛn. Sɛ cɛn wie amun mma'm be usa kɛ: ‹?Yɛbuɛ nga be siesie i yɛ'n i bo'n kle sɛ?›

⁷ Amun `se be kɛ: ‹Kɛ be ´fa Anannganman i alaka'n kpɛ Zurdɛn nzue'n, nzue nun'n kpɛli. Nzue'n nun kpɛli sakpa Nyanmiɛn i alaka'n i nyrun. I sɔ'n ti, yɛbuɛ sɔ'm be ti Izraɛlfuɛ'm be wla kpɛnlɛ like tititi.› »

⁸ Be nga be kpali be'n be niannin ndɛ nga Zozie kan kleli be'n su. Be fali yɛbuɛ blu-nin-nnyɔn Zurdɛn'n i afiɛn kɛ Anannganman fa kan kleli Zozie'n sa. Be fali yɛbuɛ'm be ɔli kan be ´la lɛ kɔnguɛ'n, akpasua kun yɛbuɛ kun akpasua kun yɛbuɛ kun.

⁹ Zozie man be fali yɛbuɛ blu-nin-nnyɔn ekun, nan b'a fa be a siesie be wiengu su Zurdɛn'n i afiɛn kan Nyanmiɛn nyrun jranfuɛ nga be suali Nyanmiɛn i alaka'n be jrannin lɛ'n, yɛbuɛ sɔ'm be tɛ o lɛ ndɛ.

¹⁰ Nyanmiɛn nyrun jranfuɛ nga be sua Nyanmiɛn i alaka'n, be jrannin Zurdɛn ba'n i afiɛn lele san ndɛ nga Anannganman fa wlali Zozie nuan kɛ ɔ `kan kle nzrafuɛ mun'n, be niannin i kwlaa su yoli. Ɔ man Zozie fali ndɛ nga Moiz kan kleli i'n su. Izraɛlfuɛ'm be kannin bé wun be kpɛli Zurdɛn'n.

¹¹ Kɛ be kwlaa be fuli cenje'n su'n, Nyanmiɛn nyrun jranfuɛ nga be sua Nyanmiɛn i alaka'n, be sin ko fali mmua'n ekun.

¹² Ribɛn i akpasua'n, nin Gad i akpasua'n, nin Manase i akpasua bue'm be sonja'm be nin be alɛ ninnge mun be dun mmua Izraɛlfuɛ'm be nyrun be kpɛli Zurdɛn'n kɛ Moiz kan kleli be'n sa.

¹³ Sonja akpi-akpi ablanan (40.000) be tanndannin, be alɛ ninnge'n wo be sa nun sɛsɛsɛ, be sinnin Anannganman i nyrun lɛ, nan b'a fa Zeriko lɔ lika kpɛtɛkplɛɛ i ndɛnman.

¹⁴ I le kun sɔ'n nun Anannganman mannin Zozie kɔmin su Izraɛlfuɛ'm be nyrun. Kɛ ɔ fin i lɛ'n, bé nyin yili i tititi kɛ be nyin fa yili Moiz'n sa.

¹⁵ Anannganman seli Zozie kɛ:

¹⁶ «Se Nyanmiɛn nyrun jranfuɛ nga be sua alaka bɔ aenguɛ fluwa'n wo nun'n be kɛ be fin Zurdɛn'n nun fite.»

¹⁷ Yɛ Zozie seli be-ɔ.

¹⁸ Kɛ Nyanmiɛn nyrun jranfuɛ'm be fuli cenje'n cɛ'n, kpɛkuun yɛ Zurdɛn'n yi sinnin i osu-ɔ, ɔ su sonji kɛ laa'n sa.

¹⁹ Anglo klikli'n i le blu'n su yɛ Izraɛlfuɛ'm be kpɛli Zurdɛn nin-ɔn. Be boli be nanmue'n Gilgal lɛ, Zeriko i wia afiliɛ lɔ.

²⁰ Zozie man be fali yɛbuɛ blu-nin-nnyɔn nga be fali be Zurdɛn nun'n be fa be siesieli be wiengu su Gilgal lɛ.

²¹ Nan ɔ'a se Izraɛlfuɛ'm be kɛ: «Sɛ cɛn wie, amun mma'm be ´usa amun kɛ: ‹?Yɛbuɛ nga be siesie be yɛ'n i bo kle sɛ?›

²² Amun `kan Izraɛl nvle'n i Zurdɛn kpɛlɛ'n i ndɛ'n kle be.

²³ Afin amun `nian, Anannganman amun Nyanmiɛn'n kpɛli Zurdɛn'n nun kɛ ɔ fa kpɛli Ndɛma jenvie'n nun e nyrun bɔ e sinnin'n sa, kɛ ɔ ko yo nan amu'an kwla kpɛ'n ti.

²⁴ Anannganman e Nyanmiɛn'n kunndɛ kɛ asiɛ'n su nvle'm be nunfuɛ mun be kwlaa be si kɛ i dan'n lɛ-man wunsu. Yɛ ɔ kunndɛ kɛ e nyin yi i tititi, i ti yɛ ɔ yoli sa sɔ nin-ɔn.»