Zozie 3 - NYANMIƐN NDƐ'N 1998

Zurdɛn'n i kpɛlɛ

¹ Nglɛmun ndɛ kpa'n, Zozie nin Izraɛlfuɛ'm be fɛli i Sitim lɛ be ɔli Zurdɛn nuan lɔ. Be lali lɛ ka nan b'a kpɛ.

² Sonja kpɛnngbɛn'm be fali le nsan be wlannin ngblaliɛ'n nun.

³ Be seli sran mun kɛ: «Kɛ amun wun kɛ Nyanmiɛn nyrun jranfuɛ bɔ be ti Levi akpasua sufuɛ mun b'a sua Anannganman amun Nyanmiɛn'n i alaka'n, amun `fɛ i kan amun wo lɛ'n be `su bé su,

⁴ kɛ ɔ ´yo nan amu'an wun atin nga e ´fa su'n ti, afin atin sɔ'n, amun nian fɛ-mɛn i le. Sanngɛ nán amun wunnge alaka'n wun koko ngboko. Man kilo kun tran amun afiɛn.»

⁵ Zozie seli sran'm be kɛ: «Amun `yo amun wun saun afin ainman Anannganman wa yi atrɛ amun afiɛn.»

⁶ Kɛ i aliɛ cɛnnin'n, Zozie seli Nyanmiɛn nyrun jranfuɛ mun kɛ be `sua Anannganman i alaka'n nan be `dun sran'm be nyrun mmua. Yɛ be suali alaka'n nan b'a dun mmua.

⁷ Anannganman seli Zozie kɛ: «Kɛ ɔ fin ndɛ'n, n wa man ɔ dunman'n su Izraɛlfuɛ'm be nyrun. Be wa si kɛ n jin ɔ́ sin kɛ n fa jrannin Moiz i sin'n sa.

⁸ Se Nyanmiɛn nyrun jranfuɛ nga be sua min alaka'n be kɛ, kɛ be ko jra Zurdɛn nun cɛ'n, be `jran nun lɛ.»

⁹ Yɛ Zozie seli Izraɛlfuɛ'm be kɛ: «Amun `wunnge wa, amun `tie Anannganman amun Nyanmiɛn i nuan su ndɛ'n.

¹⁰ Amun wa wun i jrɛiin kɛ Nyanmiɛn b'ɔ lafi-man'n, ɔ o amun afiɛn nan ɔ wa fuan Kanaanfuɛ mun, nin Ɛtfuɛ mun, nin Evfuɛ mun, nin Ferezfuɛ mun, nin Girgazfuɛ mun, nin Amɔrfuɛ mun, ɔ nin Zɛbisfuɛ mun amun nyrun sakpa.

¹¹ Amun `se kɛ sɛ: asiɛ wunmuan'n i Min'n, i alaka'n be wa fa kpɛ Zurdɛn'n amun nyrun.

¹² Amun `kpa amun nun sran blu-nin-nnyɔn, akpasua kun su sran kun akpasua kun su sran kun.

¹³ Kɛ Nyanmiɛn nyrun jranfuɛ nga be sua Nyanmiɛn i alaka'n bé ja ´tia Zurdɛn nun cɛ'n, nzue'n ɔ wa kpɛ. Nzue i bue ng'ɔ fin nglo lɔ'n, ɔ wa jran, ɔ ´bo kofie kunndunngluun'n kɛ b'a si i nyrun ce sa.»

¹⁴ Izraɛlfuɛ'm be fɛli i ngblaliɛ nun lɛ be ɔli Zurdɛn'n i kpɛlɛ. Nyanmiɛn nyrun jranfuɛ nga be sua Nyanmiɛn i alaka'n be o be nyrun.

¹⁵ I blɛ sɔ'n nun'n, wuun munngun'n ɔ'a kpɛn, Zurdɛn'n ɔ'a yi ɔ'a fu ce'n su . Kɛ Nyanmiɛn nyrun jranfuɛ'm be juli Zurdɛn nuan bɔ bé ja'n kpɛnnin nzue nun cɛ'n,

¹⁶ nzue'n i bue ng'ɔ fin nglo lɔ'n, ɔ jrannin, ɔ boli kofie kunndunngluun'n mmua lɔ, klɔ nga be flɛ i Adam b'ɔ mantan Zartan'n i kokolɛ'n i ndɛnman. Kpɛkuun i bue ng'ɔ sonji kɔ jenvie b'ɔ ti njin nzue klakla'n nun lɔ'n, ɔ wieli nun weiin, nan Izraɛlfuɛ'm b'a kpɛ i be ja nun Zeriko ndɛnman lɛ .

¹⁷ Kɛ nzrafuɛ'm be ´sin'n, wuun Nyanmiɛn nyrun jranfuɛ nga be sua Nyanmiɛn i alaka'n be jin Zurdɛn'n i afiɛn aunnyan siɛ'n su, b'a keje-man be wun lele san sran'm be kwlaa be sinnin.