Zozie 24 - NYANMIƐN NDƐ'N 1998

Izraɛlfuɛ'm be waan Anannganman yɛ be ´su i-ɔ

¹ Zozie yiali Izraɛl akpasua'm be kwlakwla Sisɛm lɔ. Ɔ flɛli kpɛnngbɛn mun, nin jɔlɛ difuɛ mun, ɔ nin Izraɛl sonja'm be kpɛnngbɛn mun nan b'a ba Nyanmiɛn nyrun.

² Zozie seli be kwlaa be kɛ: «Amun `tie ndɛ nga Anannganman b'ɔ ti Izraɛl Nyanmiɛn'n kan'n. ‹Laa, amun nannan'm be tran Efrat'n i bue kun lɔ. Abraam nin Nakɔr bé si Terak i awlo nin-ɔn. Be sɔ amuɛn.

³ N yoli man amun nannan Abraam ɔ tuli mɛn sɔ b'ɔ o Efrat i bue kun lɔ'n nun. N fɛli i n wlannin Kanaan mɛn wunmuan nun yɛ m mɛnnin i anunman kpanngban. N fali Izaak m mɛnnin i .

⁴ N fali Zakɔb nin Ezau m mannin Izaak. Ezau i lika liɛ bɔ m mɛnnin i kɛ ɔ tran nun'n yɛlɛ Seir oka lika'n. Zakɔb nin i bo mma'm be ɔli be liɛ Ezipt.

⁵ I sin n sunmannin Moiz nin Aarɔn nan m'an fa sa kekle sunman m'an yi i Eziptfuɛ'm be su kwlaa nan m'an fa amun nvle'n m'an fite.

⁶ Kɛ amun nannan'm be tuli Ezipt lɔ'n be juli Ndɛma jenvie'n nuan. Be fali Eziptfuɛ'm be kakaklolo mun, ɔ nin be nnɛn kpanngɔ fufuɛ mun, be suli bé su lele juli lɛ.

⁷ Yɛ be kpan flɛli min kɛ n `uka be, nan m'an fa nyanmiɛn ble m'an sie amun nvlefuɛ'm be nin Eziptfuɛ'm be afiɛn. I sin, n yoli man nzue'n katali Eziptfuɛ'm bé su. Ɔ dili be. Amun bɔbɔ amun si sa nga n fa yoli Eziptfuɛ mun'n. Kɛ ɔ yoli sɔ'n, amun nvle'n cɛli aawlɛ flɛnnɛn nun kpa,

⁸ kwlaa nan m'an fa be m'an ɔ Amɔrfuɛ'm be mɛn ng'ɔ o Zurdɛn'n i bue ng'ɔ kpɛ wia afiliɛ lɔ'n nun. Be nin amun kunnin nan m'an fa be m'an man amun. Sa ti bɔ amun kwlali be'n, yɛlɛ kɛ m bɔbɔ n nunnunnin be amun nyrun.

⁹ Zipɔr i wa Balak, b'ɔ ti Moab famiɛn'n i kusu ɔ nin amun kunnin. Ɔ ko yiali Bɛɔr i wa Balaam kɛ ɔ `wa wua amun amuɛn.

¹⁰ M'an kplin-man Balaam su ɔ man ɔ yaci ko yrali amun nguan nan m'an de amun Balak sa nun .

¹¹ Amun kpɛli Zurdɛn'n be bali Zeriko. Zerikofuɛ'm be nin amun kunnin. Amɔrfuɛ nin Ferezfuɛ, nin Kanaanfuɛ, nin Ɛtfuɛ, nin Girgazfuɛ, nin Evfuɛ, ɔ nin Zɛbisfuɛ mun be kusu be nin amun kunnin. N fali be kwlaa m mannin amun.

¹² N sunmannin abɔn dandan mun amun nyrun, be fuannin be kɛ be fa fuannin Amɔr famiɛn nnyɔn mun'n sa. Nán amun tokofi annzɛ amun cua mun yɛ be man amun kwlali-ɔ .

¹³ N fali mɛn kun bɔ amu'an kle-man amún wun yalɛ b'a di-man nun junman'n ɔ nin klɔ bɔ nán amun yɛ amun kplannin'n n fa mannin amun kɛ amun `tran nun. Vinyi fie ɔ nin olivie bɔ nán amun yɛ amun tali'n, n fa mannin amun kɛ amun `di bé su mma mun.› »

¹⁴ Zozie kan guali su kɛ: «I sɔ'n ti, amun `nyin yi Nyanmiɛn, amun `tu amún klun be su i. Nán amun kpɔci i mlɔnmlɔn. Amun `gua amuɛn nga amun nannan'm be sɔ be kɛ be o Efrat i bue kun lɔ'n annzɛ Ezipt lɔ'n be ase nan amun `su Anannganman.

¹⁵ Sɛ kusu i sɔ'n jɔ-man amun klun'n, ndɛkɛn amun kle like nga amun klo kɛ amun ´su i'n, sɛ amun ´su ninnge nga amun nannan'm be su be Efrat bue kun lɔ nin o, annzɛ sɛ amun su Amɔrfuɛ nga amun wo be mɛn'n nun yɛ'n be liɛ mun o! Sanngɛ n liɛ'n, e nin min osufuɛ mun, e ´su Anannganman.»

¹⁶ Nvlefuɛ'm be tɛli i su kɛ: «Ɔ siɛ! Nán e yɛ e ´yi Anannganman i ase e ´su ninnge uflɛ mun-ɔn.

¹⁷ Anannganman e Nyanmiɛn'n yɛ ɔ toli e nin é si mun e ti Eziptfuɛ'm bé sa nun-ɔn. Ɔ yili atrɛ dandan mun e bɔbɔ e nyrun, ɔ sasali ye atin wunmuan'n nun. Ɔ sasali e nvle nga e sinnin nun e bali'n be lika.

¹⁸ Anannganman yɛ ɔ fuannin nvle beblebe sɔ mun e nyrun-ɔn. I yɛ ɔ fuannin Amɔrfuɛ nga be tran mɛn nga nun laa nin-ɔn. I sɔ'n ti, e kusu e ´su Anannganman. I yɛ ɔ ti e Nyanmiɛn nin-ɔn.»

¹⁹ Zozie tɛli be su kɛ: «Amun su kwla-man Anannganman su yɛlɛ kɛ ɔ ti Nyanmiɛn kun bɔ i nzuɛn'n nin klɔ sran liɛ'n ti-man kun. Ɔ su kwla suan-man amun fɔnlɛ nin amun sa tɛ'm bé bo, yɛ ɔ su kplin-man su kɛ amun fa like uflɛ ukɛ i su.

²⁰ Sɛ amun yaci i lɛ be su ninnge wie mun'n, ɔ ´yo amun tɛ. Ɔ ´nunnun amun, ɔ nian-man kɛ ɔ'a yo amun ye sunman'n ti.»

²¹ Nvlefuɛ'm be tɛli i su kɛ: «Ɔ siɛ! E su yo-man sɔ. E liɛ'n Anannganman yɛ e ´su i-ɔ.»

²² Zozie seli be kɛ: «Amun bɔbɔ amun ti amun lalofuɛ. Amun bɔbɔ yɛ amun waan amun ´su Anannganman nin-ɔn.» Be tɛli i su kɛ: «Ɛɛn! E ti e bɔbɔ e lalofuɛ.»

²³ Yɛ Zozie seli be kɛ: «Amun `gua amuɛn nga be o amún sa nun'n be blo nan amun `fa amún wun mantan Anannganman b'ɔ ti Izraɛl Nyanmiɛn'n.»

²⁴ Be tɛli i su kɛ: «E ´su Anannganman e Nyanmiɛn'n. E ´fɛ i ndɛ'm be su.»

²⁵ Le kun sɔ'n nun Zozie man Izraɛlfuɛ'm be tali nda Sisɛm lɔ. Ɔ kpɛli mmla mannin be, ɔ klekleli be wafa nga be ko nanti su'n.

²⁶ Yɛ ɔ klɛli be mmla sɔ mun Nyanmiɛn i mmla fluwa'n nun. I sin, ɔ fali yɛbuɛ dan kun tɛkɛli i waka dan'n bo lɛ Anannganman i lika nun lɛ.

²⁷ I sin ɔ seli Izraɛlfuɛ'm be kɛ: «Amun `nian yɛbuɛ nga kpa. Ɔ ti lalofuɛ, afin sɛ ɔ ti sran'n, wuun n ´se kɛ ɔ tili ndɛ nga Anannganman kan kleli ye'n i kwlaa. Ɔ wa yo amun lalofuɛ man amun su yaci-man amun Nyanmiɛn'n i sulɛ.»

²⁸ Yɛ Zozie mannin Izraɛlfuɛ'm be atin nan b'a ɔ be tranwlɛ'm be nun.

Zozie i wulɛ

²⁹ Kɛ ɔ yoli sɔ'n, nan Nɛn i wa Zozie b'ɔ ti Anannganman i sufuɛ'n ɔ'a wu i afuɛ ya afuɛ blu'n su.

³⁰ Be sieli i lika nga be fa mɛnnin i Timnat-Serak lɔ'n nun Efraim oka lika nun Gaas oka'n i nglo lɔ.

³¹ Izraɛlfuɛ'm be suli Anannganman Zozie nyin su, ɔ nin kpɛnngbɛn nga be sili Zozie bɔ be wunnin sa nga Anannganman yo mannin Izraɛlfuɛ mun'n be nyin su.

³² Izraɛlfuɛ'm be sieli Zozɛf i owie'n bɔ be fa fin Ezipt bali'n Sisɛm lɛ. Be sieli i lika nga Zakɔb toli i Amɔr ng'ɔ takali Sisɛm klɔ'n i mma'm bé sa nun jɛtɛ ufue ya'n i nun. Lika sɔ'n yoli Zozɛf i mma'm be liɛ .

³³ Aarɔn i wa Eleazar kusu wuli i liɛ. Be sieli i kpɔlɛ nga be fa mɛnnin i wa Fine'n i su lɔ Efraim oka lika'n nun.