Zozie 23 - NYANMIƐN NDƐ'N 1998

Zozie i ndɛ kasiɛn bɔ kannin'n

¹ Kɛ Anannganman deli Izraɛlfuɛ'm be kpɔfuɛ nga be bo sin yia be'n be kwlaa bé sa nun'n, b'ɔ man be dili alaje'n, i osu ɔ'a la nun. Zozie a yo oke.

² Ɔ flɛli Izraɛlfuɛ'm be kpɛnngbɛn mun, nin be jɔlɛ difuɛ mun, ɔ nin sonja'm bé su kpɛn mun nan ɔ'a sɛ be kɛ: «Min yɛ m'an yo oke yɛ.

³ Amun wunnin sa nga Anannganman b'ɔ ti amun Nyanmiɛn'n fa yoli nvle fanunfanun kwlaa mun amun dunman nun'n, afin Anannganman bɔbɔ yɛ ɔ kunnin alɛ'n mannin amun-ɔn.

⁴ Nvle nga m'an dun mmua m'an kwla be nin o, ɔ nin be ng'ɔ fata kɛ amun kwla be Zurdɛn'n b'ɔ o wia afiliɛ lɔ'n, ɔ nin Mediterane jenvie'n b'ɔ o wia atɔliɛ lɔ'n be afiɛn'n nun mun o, amun wunnin kɛ n tuli bé wun fɔtɔ n fa be cɛcɛli amun akpasua'n kwlaa.

⁵ Anannganman amun Nyanmiɛn'n bɔbɔ ɔ ´kan bé bo, ɔ ´fuan be amun nyrun. Amun wa fa mɛn sɔ'n kɛ ɔ fa kannin'n sa.

⁶ Sanngɛ amun `kplin amún nyin kpa, amun `nanti mmla nga be klɛli i Moiz fluwa nun'n su. Nán amun nian bɛ su, nán amun nian fama su.

⁷ Nán amun nin nvle nga be tɛ o amun afiɛn'n be sanngan. Nán amun bo be amuɛn'm be dunman'n su be di jɔlɛ. Nán amun fa be dunman'm be ta nda. Nán amun koto bé bo, nan amun sɔ be.

⁸ Amun `fa amún wun fa mantan Anannganman b'ɔ ti amun Nyanmiɛn'n kɛ amun fa yoli i lele ndɛ'n sa.

⁹ Anannganman dunman nun nvle dandan bɔ be yo sro'n be wanndili amun nyrun, lele ndɛ be wie fi a kwla jran-man amun nyrun.

¹⁰ Amun nun sran kunngba fuan amun kpɔfuɛ akpi, afin Anannganman amun Nyanmiɛn'n kun amún ti alɛ kɛ ɔ fa kannin'n sa.

¹¹ I sɔ'n ti, amun `nian amún wun kpa. Amun `klo Anannganman b'ɔ ti amun Nyanmiɛn'n.

¹² Sɛ amun kaci amún sin si i nan amun fa amun wun fa mantan nvle nga be tɛ o amun afiɛn'n, sɛ amun ja be mma mmla mun'n, sɛ amun sanngan be nun nan amun fa be sanngan amun nun'n,

¹³ i liɛ'n, amun `si jrɛiin kɛ Anannganman b'ɔ ti amun Nyanmiɛn'n, ɔ ´yaci be fuanlɛ amun nyrun, kpɛkuun be wa yo kɛ aya wie annzɛ tɛ wie sa be ´tra amun. Be wa kle amun yalɛ kɛ ngble yɛ be su fa bo amún wia sin sa, wie kusu-ɔ, kɛ owie b'ɔ su wɔ amun nyinma'm bé su sa lele san amun ´wu mɛn klanman sɔ'n bɔ Anannganman b'ɔ ti amun Nyanmiɛn mannin amun'n i nun.

¹⁴ N liɛ'n, n su wa kɔ nanwlɛ klɔ. Amun bɔbɔ amun si jrɛiin kɛ kasiɛ nga Anannganman b'ɔ ti amun Nyanmiɛn'n boli amun'n, i wie fi nun-man lɛ b'ɔ kali ngbɛn-ɔn. Be kwlaa bé nuan yiali, wie fi a ka-man.

¹⁵ Kɛ Anannganman b'ɔ ti amun Nyanmiɛn'n fa yiali i kasiɛ kpakpa'm bé nuan'n, i kunngba nin-ɔn, ɔ wa yiɛ i ndɛ wiwi ng'ɔ kan kleli amun'n be kwlakwla bé nuan. Sɛ ɔ ti amun nunnunlɛ-ɔ, ɔ ´nunnun amun mɛn kpa ng'ɔ fa mannin amun'n nun.

¹⁶ Sɛ amun yaci aenguɛ nga Anannganman nin amun trali'n i mmla'n, nan sɛ amun koto ninnge'm be bo nan amun sɔ be'n, Anannganman wa fa ya dan kpa amún wun. Ɔ su sisi-mɛn i bo, ɔ ´nunnun amun mɛn klanman ng'ɔ fa mannin amun yɛ'n nun.»