Zozie 22 - NYANMIƐN NDƐ'N 1998

Akpasua nga be o Zurdɛn'n i bue ng'ɔ kpɛ wia afiliɛ lɔ'n su'n

¹ I sin Zozie flɛli Ribɛn akpasua sufuɛ mun, nin Gad akpasua sufuɛ mun, ɔ nin Manase akpasua bue sufuɛ mun

² nan ɔ'a se be kɛ: «Amun niannin Moiz b'ɔ ti Anannganman i sufuɛ'n i nuan su ndɛ'm be kwlaa su nantili. Nga n kan n kleli amun'n, amun yoli i lele guɛli i ti nin i bo.

³ Kɛ ɔ fɛ i lele b'ɔ ´fa ju ndɛ'n, amu'an kpɔci-man amun niaan mun. Nanwlɛ, amun fali Anannganman i mmla su.

⁴ Anannganman b'ɔ ti amun Nyanmiɛn'n i kusu man amun niaan'm b'a nyan alaje kɛ ɔ fua kleli be'n sa. Siɛn atin'n la nun, amun kwla sa amun sin kɔ mɛn nga Moiz b'ɔ ti Anannganman i sufuɛ'n fa cɛcɛli amun Zurdɛn'n i bue ng'ɔ kpɛ wia afiliɛ lɔ nun.

⁵ Sanngɛ amun `fa mmla nga Moiz b'ɔ ti Anannganman i sufuɛ'n, fa mannin amun'n i kwlaa su: amun `klo Anannganman b'ɔ ti amun Nyanmiɛn'n, amun `fɛ i atin'n su, amun `niɛn i ndɛ'm be su, amun `fa bé wun mɛntɛn i, amun `nian nun be su i kpa kɛ ɔ fata'n sa.»

⁶ Zozie yrɛli i nuan mannin be, ɔ kaleli be, nan b'a ɔ be tranwlɛ.

⁷ Moiz fali Bazan nvle'n wie mannin Manase i akpasua'n bue'n. Akpasua bue ng'ɔ ka lɛ'n, ɔ mannin be lika liɛ be niaan'm bé wun lɔ Zurdɛn'n i bue kun lɔ.

⁸ Kɛ Zozie ´kale be'n, ɔ yrɛli i nuan mannin be, yɛ ɔ seli be kɛ: «Ninnge kpanngban yɛ amu'an nyɛn i amun su fa kɔ amun tranwlɛ yɛ: nnɛn fanunfanun kpanngban, nin jɛtɛ ufue, nin sika ɔkwlɛ, nin aaba, nin blalɛ kpanngban, ɔ nin tralɛ. Sɛ amun ju lɔ'n, amun nin amun niaan'm be `cɛ nun.»

Nyanmiɛn sɔwlɛ nga be kplɛnnin i Zurdɛn i wun lɛ'n

⁹ Ribɛn akpasua'n, nin Gad akpasua'n, ɔ nin Manase akpasua bue'n be ɔli be nvle liɛ'n nun. Be kaleli Izraɛlfuɛ nga be o Silo lɔ'n, Kanaan mɛn'n nun lɔ. Be ɔli Galaad mɛn bɔ Anannganman man Moiz mannin be'n nun lɔ.

¹⁰ Kɛ be juli Zurdɛn'n i nuan'n, be kplannin Nyanmiɛn sɔwlɛ kun nzue ba'n nuan lɛ, be kplɛnnin i dan ɔ man ɔ ti-man fiawa. Kɛ ɔ ´yo sɔ'n, wuun be tɛ o Kanaan mɛn'n nun lɔ'n.

¹¹ Izraɛlfuɛ kun nga'm be tili i kɛ Ribɛn nin Gad akpasua'n, ɔ nin Manase akpasua bue'n b'a kplan Nyanmiɛn sɔwlɛ wie Izraɛlfuɛ'm be bue liɛ'n su Kanaan mɛn'n nun lɔ.

¹² Kɛ Izraɛlfuɛ'm be tili i sɔ'n, be yiali Silo lɛ kɛ be nin wia afiliɛ lɔ akpasua liɛ'm be ´ko kun.

¹³ Be sunmannin Eleazar i wa liɛ Fine b'ɔ ti Nyanmiɛn nyrun jranfuɛ'n Galaad mɛn'n nun lɔ kɛ ɔ `usa Ribɛn nin Gad akpasua'n, ɔ nin Manase akpasua bue mun bé sa.

¹⁴ Kpɛnngbɛn blu yɛ be nin i be ɔli-ɔ, akpasua kun su sran kun, akpasua kun su sran kun. Be kwlakwla be ti Izraɛl awlo'm be nun kpɛnngbɛn mun.

¹⁵ Be ɔli Galaad mɛn'n nun lɔ wia afiliɛ lɔ Izraɛl akpasua'm bé sin nan b'a usa be sa,

¹⁶ Izraɛlfuɛ kun nga'm be kwlaa bé nuan. Be usali be kɛ: «Sa nga ti bɔ man amun fɔnnin Izraɛl Nyanmiɛn wun kɛ amun fa fɔnnin lɛ'n sa'n, e klo kɛ e ´ti nun. ?Ɔ yo sɛ yɛ man amun kacili amún sin sili i sa-a? ?Kɛ amun kplan amun tiaun Nyanmiɛn sɔwlɛ'n, nán nyin kekle yɛ amu'an yo i i su lɛ-ɔ?

¹⁷ ?Sa tɛ nga e yoli i Pɛɔr lɔ bɔ man e nun sunman ko wu'n, bɔ kɛ e ´se yɛ'n i su sa'n tɛ o e su'n, ɔ'a ti-man amun ?

¹⁸ Yɛ ndɛ yɛ amu'an kaci amún sin a si Anannganman nin-ɔn. Sɛ ndɛ amun yo nyin kekle Anannganman su'n, ainman Izraɛl nvle wunmuan'n su yɛ i ya'n ɔ ´tɔ-ɔ.

¹⁹ Sɛ kusu amun wun kɛ amun tranwlɛ liɛ'n ti-mɛn i su nan Anannganman kwla tran-man nun'n, amun `bla i lika'n nun wa, kan i tranwlɛ'n wo wa'n nan amun nin e tran e lika liɛ'n nun. Ɔ man e ´srɛ amun kpa ti-ɔ, nán amun yo nyin kekle nan amun se kɛ amun ´kplan Anannganman i sɔwlɛ uflɛ uka Anannganman e Nyanmiɛn'n i sɔwlɛ'n su mlɔnmlɔn.

²⁰ Kɛ Akan b'ɔ ti Zerak i anunman'n yoli sa tɛ'n, like ng'ɔ ti-man kɛ be fa'n b'ɔ fali'n, Izraɛl nvle wunmuan'n su yɛ Anannganman i ya'n ɔ tɔli-ɔ. Nán Akan kunngba yɛ ɔ wuli-ɔ .»

²¹ Ribɛn akpasua'n nin Gad akpasua'n, ɔ nin Manase akpasua bue'n be tɛli Izraɛl akpasua kun nga'm be awlofuɛ'm be su kɛ:

²² «Anannganman Nyanmiɛn'n, Nyanmiɛn Kpli b'ɔ lɛ-man sin'n, b'ɔ kwla like kwlaa yo'n, ɔ si akunndan nga e buli bɔ man e yoli sɔ'n. Izraɛl nvle'n kusu ɔ wa si sɔ. Sɛ nyin kekle yɛ e yoli'n, sɛ fɔnlɛ dan yɛ e fɔnnin'n, ɔ fata kɛ be kun ye ndɛndɛ.

²³ Sɛ e waan e ´kaci é sin si Anannganman ti yɛ man e kplannin Nyanmiɛn sɔwlɛ ng'ɔ o yɛ'n, sɛ e waan e ´yi tɛ nga be yrɛ i nnɛn'n kɔlikɔli'n su'n, sɛ e waan e ´yi cɛlɛ wie annzɛ bo kun yolɛ i su tɛ i su ti yɛ e kplannin'n, man Anannganman bɔbɔ tu e fɔ!

²⁴ Srɛ b'ɔ kun ye'n ti yɛ e yoli sɔ-ɔ. Atrɛkpa-a, cɛn wie lele amun mma'm be wa se e liɛ'm be kɛ: ‹?Amun li, nguɛ nzɔliɛ yɛ ɔ wo amun nin Anannganman b'ɔ ti Izraɛl Nyanmiɛn'n amun afiɛn-ɔn?

²⁵ Anannganman bɔbɔ fali Zurdɛn'n fa sieli e nin amun Ribɛn nin Gadfuɛ mun e afiɛn awɛ. Amun like fi nun-man Anannganman sa nun.› Kpɛkuun amun mma mun man e liɛ'm be ´kaci bé sin si Anannganman.

²⁶ I sɔ srɛ ti yɛ man e fali akunndan kɛ e ´kplan Anannganman i sɔwlɛ sɔ nin-ɔn. Nán tɛ nnɛn nga be yrɛ i nnɛn kɔlikɔli'n annzɛ tɛ uflɛ fi yilɛ dunman nun-ɔn.

²⁷ E klun wa'n e waan man Nyanmiɛn sɔwlɛ sɔ'n yo kɛ sa nzɔliɛ sielɛ sa e nin amun ye afiɛn, ɔ nin e mma mun nin amun liɛ mun be afiɛn. Nzɔliɛ sɔ'n kle kɛ e lɛ atin e yi tɛ nga be yrɛ i nnɛn kɔlikɔli mun, ɔ nin e bo kun yolɛ i su tɛ mun, ɔ nin e tɛ'm be kwlaa. I liɛ'n, amun mma'm be su kwla se-man e liɛ'm be kɛ be like nun-man Anannganman sa nun.

²⁸ Yɛ e seli é wun kɛ sɛ cɛn wie lele'n be kan i sɔ ndɛ be kle e, annzɛ be kan kle e mma mun'n i liɛ, e ´kwla tɛ be su kɛ: ‹Amun `nian, é si'm be niannin Nyanmiɛn sɔwlɛ su yɛ be kplannin nga-a. B'a kplɛn-mɛn i kɛ be ´yi tɛ nga be yrɛ i nnɛn kɔlikɔli'n annzɛ tɛ uflɛ i su. Be kplɛnnin i kɛ ɔ `yo e nin amun e afiɛn lalofuɛ.›

²⁹ Nan y'a bu-mɛn i kɛ e ´kplan Nyanmiɛn sɔwlɛ e ´yi tɛ nga be yrɛ i nnɛn kɔlikɔli'n, annzɛ tɛ uflɛ i su, y'a se-man kɛ e ´yi sraka bɔ be fa ble annzɛ like b'ɔ ti kɛ ble sa'n be yi'n i su, y'a se-man kɛ e yo i sɔ nan e ´kaci é sin e si Anannganman, annzɛ e ´fɔnndɔn i. Y'a se-man kɛ e ´yi tɛ lika uflɛ fi san Anannganman i sɔwlɛ b'ɔ o i tranwlɛ nun'n i su.»

³⁰ Kɛ Fine b'ɔ ti Nyanmiɛn nyrun jranfuɛ'n, ɔ nin Izraɛl kpɛnngbɛn nga be nin i be ɔli'n be tili Ribɛn akpasua'n, nin Gad akpasua'n, ɔ nin Manase akpasua'm bé nuan su ndɛ'n, be klun jɔli.

³¹ Eleazar i wa Fine b'ɔ ti Nyanmiɛn nyrun jranfuɛ'n seli kɛ: «Siɛn'n, y'a wun i wlɛ kɛ Anannganman nin ye o nun, afin amu'an yo-man Anannganman wun tɛ dan nga b'ɔ kun ye srɛ amun lika-a. Amu'an klɔklɔ-man Anannganman kɛ i ya'n `tɔ e su.»

³² I sin Nyanmiɛn nyrun jranfuɛ Eleazar i wa Fine, ɔ nin Izraɛl kpɛnngbɛn'm be srɛli atin'n Ribɛn akpasua nin Gad akpasua'm be sa nun. Be jasoli nan b'a fɛ i Galaad nvle'n nun b'a ba Kanaan. Be wa boli jasin'n be kleli Izraɛlfuɛ mun.

³³ Be kusu be klun jɔli nan b'a la Nyanmiɛn ase. Be yacili alɛ bɔ be waan be nin Ribɛn nin Gad akpasua mun be ´ko kun'n i sa, yɛ be lika'n i sacilɛ bɔ be waan be ´saci i'n be yacili i ndɛ'n nun.

³⁴ Ribɛn akpasua sufuɛ, nin Gad akpasua sufuɛ'm be flɛli Nyanmiɛn sɔwlɛ sɔ'n kɛ Lalofuɛ, afin be waan: «Nyanmiɛn sɔwlɛ sɔ'n di lalo e nin Izraɛlfuɛ kun nga mun e afiɛn kɛ Anannganman ti Nyanmiɛn.»