Zozie 21 - NYANMIƐN NDƐ'N 1998

Levifuɛ'm be klɔ mun

¹ Levifuɛ'm be awlobo kpɛnngbɛn'm be wa toli Eleazar b'ɔ ti Nyanmiɛn nyrun jranfuɛ'n, ɔ nin Nɛn i wa Zozie, ɔ nin Izraɛl akpasua fanunfanun'm be awlobo kpɛnngbɛn mun

² Silo lɛ Kanaan mɛn'n nun lɔ nan b'a se be kɛ: «Anannganman kan kleli Moiz kɛ be `man e klɔ dandan'n wie nan e tran su, nan be `fa nnɛn'm be didiwlɛ nga be mantan klɔ sɔ'm be lɛ'n be uka su.»

³ Yɛ Izraɛlfuɛ'm be kpali klɔ wie mun, ɔ nin bé wun lɛ nnɛn didiwlɛ lika mun nan b'a fa man Levifuɛ mun kɛ Anannganman fa kannin'n sa.

⁴ Levi akpasua nga bé nannan yɛlɛ Keatfuɛ mun'n, be yɛ fɔtɔ'n dun mmua tɔli be su-ɔ. Be ti akpasua nnyɔn. Kɛ be tuli fɔtɔ'n, Nyanmiɛn nyrun jranfuɛ Aarɔn i mma'm be nyannin klɔ dandan blu-nin-nsan. Klɔ sɔ'm be o Zida nin Simeɔn, ɔ nin Bɛnzamɛn mun be lika liɛ nun.

⁵ Keat i mma nga be ka lɛ'n be nyannin klɔ dandan blu. Klɔ sɔ'm be o Efraim nin Dan, ɔ nin Manase akpasua bue'n be lika nun.

⁶ Akpasua nga be afiliɛ yɛlɛ Gɛrsɔn'n, be nyannin klɔ dandan blu-nin-nsan. Klɔ sɔ'm be o Isakar, nin Azɛr, nin Nɛftali, ɔ nin Manase akpasua bue ng'ɔ o Bazan nvle'n nun lɔ'n be lika nun.

⁷ Mɛrari i awlo liɛ'm be nyannin klɔ dandan blu-nin-nnyɔn. Klɔ sɔ'm be o Ribɛn nin Gad, ɔ nin Zabilɔn be lika nun.

⁸ Izraɛlfuɛ'm be tuli klɔ sɔ'm be nin be nnɛn didiwlɛ lika mun be wun fɔtɔ yɛ be fa mannin Levifuɛ mun-ɔn. Ndɛ nga Anannganman kan kleli Moiz'n be niannin su sɛsɛsɛ be yoli.

⁹ Zida nin Simeɔn akpasua'n be klɔ liɛ nga be fa mannin

¹⁰ Levi i wa Aarɔn i klun ba Keat i awlofuɛ mun bɔ fɔtɔ'n dun mmua tɔli bé su'n

¹¹ yɛlɛ: Kirzat-Arba bɔ yɛlɛ Arba klɔ'n. Arba ti Anakfuɛ'm be nannan. Siɛn, klɔ sɔ'n suan Ebrɔn. Ɔ o Zida i oka-oka lika'n nun. Be fali klɔ'n ɔ nin nnɛn didiwlɛ nga be mɛntɛn i lɛ'n be mannin be,

¹² sanngɛ fie mun nin klɔ kanngan nga be wo i asa'n su'n be dun mmua fa mannin Zɛfine i wa Kalɛb.

¹³ Be fali Ebrɔn, fiawlɛ klɔ'n be mannin Nyanmiɛn nyrun jranfuɛ Aarɔn i mma mun. Be fali Libna,

¹⁴ Zatir, Ɛstɛmɔa,

¹⁵ Ɔlɔn, Debir,

¹⁶ Asan, Zita, Bɛt-Semɛs, nin be nnɛn didiwlɛ mun. Be ti klɔ ngwlan. Be kwlaa be o Zida nin Simeɔn be lika nun.

¹⁷ Bɛnzamɛn lika liɛ'n nun, be nyannin Gabaɔn, Gɛba,

¹⁸ Anatɔt, Alemɛt. Be ti klɔ nnan nin be nnɛn didiwlɛ lika mun.

¹⁹ Kɛ be kɛn kwlaa ng'ɔ o lɛ'n bo nun'n, Nyanmiɛn nyrun jranfuɛ nga bé nannan yɛlɛ Aarɔn'n be nyannin klɔ dandan blu-nin-nsan ɔ nin be nnɛn'm be didiwlɛ mun.

²⁰ Keat i mma nga be kali lɛ'n, kɛ be tuli fɔtɔ'n, be fali klɔ dandan nga be o Efraim lika nun'n mannin be.

²¹ Klɔ sɔ mun yɛlɛ Sisɛm. Ɔ ti fiawlɛ klɔ. Ɔ o oka-oka'n lika nun yɛ Gezɛr, nin

²² Kibzaim, ɔ nin Ɔrɔn. Be ti klɔ nnan ɔ nin be nnɛn didiwlɛ nga be mantan be lɛ'n.

²³ Dan i lika nun be nyannin klɔ dandan nnan ekun ɔ nin be nnɛn didiwlɛ'n, klɔ sɔ mun yɛlɛ Ɛltɛke, Gibɛtɔn,

²⁴ Azalɔn ɔ nin Gat-Rimɔn.

²⁵ Manase i akpasua bue ng'ɔ o wia afiliɛ lɛ lika nun'n be nyannin klɔ dandan nnyɔn lɔ ekun, be yɛlɛ Tanak ɔ nin Zibleam ɔ nin nnɛn didiwlɛ mun.

²⁶ Kɛ be kɛn i kwlaa'n bo nun'n, be nyannin klɔ dandan blu ɔ nin be nnɛn didiwlɛ mun.

²⁷ Levi akpasua su Gɛrsɔn awlo liɛ'm be nyannin klɔ nnyɔn ɔ nin be nnɛn didiwlɛ mun Manase akpasua bue ng'ɔ o wia afiliɛ lɔ'n nun. Klɔ sɔ mun yɛlɛ Golan, ɔ o Bazan nvle nun. Ɔ ti fiawlɛ klɔ, ɔ nin Beɛstra.

²⁸ Isakar lika liɛ'n nun'n, be nyannin klɔ dandan nnan ɔ nin be nnɛn didiwlɛ nga be mantan be lɛ'n. Klɔ sɔ mun yɛlɛ Kizɔn, Dabrat,

²⁹ Zarmit, nin An-Ganim.

³⁰ Azɛr lika liɛ'n nun'n, be nyannin klɔ dandan nnan ɔ nin nnɛn didiwlɛ nga be mantan be lɛ'n. Klɔ sɔ mun yɛlɛ Miseal, Abdɔn,

³¹ Ɛlkat, Rɛɔb,

³² nin Nɛftali lika liɛ nun'n, be nyannin klɔ dandan nsan ɔ nin be nnɛn didiwlɛ mun. Klɔ sɔ mun yɛlɛ Kedɛs, b'ɔ o Galile lɔ'n, ɔ ti fiawlɛ klɔ, nin Amɔt-Dɔr, ɔ nin Kartan.

³³ Kɛ be kɛn i kwlaa bo nun'n, Gɛrsɔn awlo'm be nyannin klɔ dandan blu-nin-nsan ɔ nin be nnɛn didiwlɛ mun.

³⁴ Levi i awlo mun, Mɛrari i mma'm be nyannin klɔ dandan nnan ɔ nin be nnɛn didiwlɛ mun Zabilɔn i lika'n nun. Klɔ sɔ mun yɛlɛ Zɔkneam, Karta,

³⁵ Dimna, nin Naalal.

³⁶ Ribɛn lika b'ɔ o Zurdɛn i bue kun lɔ nun'n, be nyannin klɔ dandan nnan ekun ɔ nin be nnɛn didiwlɛ mun. Klɔ sɔ mun yɛlɛ Bɛzɛr, ɔ wo aawlɛ'n nun, fiawlɛ klɔ'n kun-ɔn, nin Zaaz, nin

³⁷ Kɛdemɔt, ɔ nin Mefat.

³⁸ Gad liɛ nun'n, be nyannin klɔ dandan nnan ekun ɔ nin be nnɛn didiwlɛ mun. Klɔ sɔ mun yɛlɛ Ramɔt b'ɔ o Galaad lɔ'n, fiawlɛ klɔ'n kun-ɔn, nin Maanaim, nin

³⁹ Ɛsbɔn, ɔ nin Zaɛzɛr.

⁴⁰ Kɛ be kɛn i kwlaa'n bo nun'n Levi awlofuɛ nga bé nannan yɛlɛ Mɛrari'n be nyannin klɔ dandan blu-nin-nnyɔn fɔtɔ tulɛ nun.

⁴¹ Levifuɛ'm be kwlaa be nyannin Izraɛlfuɛ nga'm be lika nun klɔ ablanan-nin-mɔcuɛ.

⁴² Klɔ dandan sɔ'm be kwlakwla nin be nnɛn didiwlɛ mun yɛ be fa mannin be-ɔ.

⁴³ Anannganman fali mɛn ng'ɔ boli bé nannan'm be kasiɛ kɛ ɔ ´fa man be'n i ngba mannin be. Be fa yoli be liɛ, be trannin nun.

⁴⁴ Anannganman man be trannin fɔuun nun be nvle'n kwlaa nun, kɛ ɔ fa boli bé nannan'm be kasiɛ'n sa. Ɔ man be yoli kwlafuɛ be kpɔfuɛ'm be kwlaa be su. Be nun kun sa ɔ'a kwla jran-man be nyrun.

⁴⁵ Kasiɛ nga Anannganman boli Izraɛl nvle'n i wie fi nun-man lɛ bɔ i nuan ɔ'a yia-man-an. I kwlaa kpɛnnin su.