Zozie 20 - NYANMIƐN NDƐ'N 1998

Fiawlɛ klɔ mun

^1-2 Anannganman seli Zozie kɛ ɔ `kan kle Izraɛlfuɛ'm be kɛ yoo: «Amun `kpa fiawlɛ klɔ nga m man Moiz kɛnnin i ndɛ kleli amun'n.

³ Sɛ amun nun wie kun sran wie bɔ nɛ́n i nyinfu yɛ ɔ kunnin i'n, ɔ `ko fia klɔ sɔ'm be nun kun su! Kɛ ɔ ´yo nan sran ng'ɔ wuli'n i klunngbɔ tufuɛ ɔ'a nyɛn-mɛn i'n ti.

⁴ Kɛ sran ng'ɔ kunnin sran'n ju fiawlɛ klɔ'n i anuan nun lɛ'n, ɔ `jran kɛ be siesie ndɛ lɛ'n, man ɔ kan sa ng'ɔ juli'n kle kpɛnngbɛn mun. Kɛ ɔ ko yo sɔ'n, man be mɛn i atin kɛ ɔ wlu klɔ'n nun lɔ, man be sɔ i nun.

⁵ Sɛ sran ng'ɔ kun sran kunfuɛ mun'n su i su lele ju lɛ'n, nán man klɔ'n sufuɛ'm be fa be aofuɛ'n be wlɛ i sa nun, afin nán i nyinfu yɛ ɔ kunnin sran nin-ɔn. Nán kɛ i nyin cili i wiengu'n ti yɛ ɔ kunnin i-ɔ.

⁶ I sɔ'n ti, man ɔ tran klɔ sɔ'n su lɛ lele san klɔ sɔ'n sufuɛ'm be di i jɔlɛ. Kpɛkuun man ɔ tran lɛ ekun lele san Nyanmiɛn nyrun jranfuɛ'm be su kpɛn nga i blɛ su yɛ ɔ kunnin sran'n ɔ'a wu, kwlaa yɛ ɔ kwla sɛ i sin klɔ ng'ɔ wanndili su lɔ bali'n i su-ɔ.

⁷ Izraɛlfuɛ'm be kpali Kedɛs klɔ'n b'ɔ o Galile lɔ'n Nɛftali i oka-oka lika nun'n, ɔ nin Sisɛm klɔ'n b'ɔ o Efraim oka-oka lika nun'n, ɔ nin Kirzat-Arba bɔ be flɛ i ekun kɛ Ebrɔn'n b'ɔ o Zida oka-oka lika nun'n.

⁸ Zurdɛn'n i bue kun ekun lɔ'n, Zeriko i wia afiliɛ lɔ'n be kpali Bɛzɛr b'ɔ ti Ribɛnfuɛ'm be oka lika kpɛtɛkplɛɛ b'ɔ ti okefiɛn'n. Be kpali Ramɔt b'ɔ o Galaad lɔ'n ekun, ɔ ti Gadfuɛ'm be liɛ, ɔ nin Golan b'ɔ o Bazan lɔ'n, ɔ ti Manasefuɛ'm be liɛ.

⁹ Be kpali klɔ sɔ mun kɛ be `yo Izraɛlfuɛ mun, ɔ nin aofuɛ nga be tran be afiɛn'n be fiawlɛ klɔ. Kɛ ɔ ´yo nan sɛ sanvuɛsa nyan sran wie b'ɔ kun i wiengu'n ɔ'a ko fia lɔ'n ti. I liɛ'n, klunngbɔ tufuɛ'n su nyɛn-mɛn i kun-mɛn lele san be ´di i jɔlɛ.»