Zozie 2 - NYANMIƐN NDƐ'N 1998

Raab fali nvle kplafuɛ mun fiali

¹ I sin, Nɛn i wa Zozie sunmannin sran nnyɔn nvialiɛ nun kɛ be `fɛ i Sitim lɛ be ko kpla Kanaan mɛn'n ɔ nin Zeriko klɔ'n be nian . Nan b'a wɔ. Kɛ be juli Zeriko lɔ'n, tekle bla wie be flɛ i Raab, i awlo yɛ be ko wlu lali-ɔ.

² Zeriko famiɛn'n tili i kɛ Izraɛlfuɛ wie mun b'a ba Zeriko lɛ kɔnguɛ mɛn'n i kplalɛ.

³ Nan ɔ'a sunman sran Raab awlo lɔ kɛ be se i kɛ: «Sran nga be lali wɔ awlo wa'n be bali mɛn'n i kplalɛ. I ti n klo kɛ n ´wun bé wun.»

^4-6 Kɛ ɔ ´yo sɔ'n, wuun Raab ɔ'a fa sran nnyɔn sɔ mun ɔ'a fia lɛn ja wie b'ɔ siesieli i sua'n ti su nglo gbagblagba'n su'n i bo, kpɛkuun ɔ tɛli be su kɛ: «Sran sɔ'm be juli min awlo wa sɔ, sanngɛ nanwlɛ, n si-man be finwlɛ. Anunman kɔnguɛ kɛ be wa nyin klɔ'n i anuan'n, yɛ be fite ɔli-ɔ. N si-man kan be ɔli'n. Amun `kan amun wun be su be su, amun ´to be.»

⁷ Be suli be su Zurdɛn'n i bue liɛ'n su lɔ kan be kpɛ Zurdɛn bé ja nun lɛ'n. Kɛ be fiteli cɛ'n yɛ be nyinnin anuan'n bé sin-ɔn.

⁸ Raab kusu, ka nan i aofuɛ'm b'a la'n, ɔ fuli bé sin lɔ

⁹ nan ɔ'a se be kɛ: «N si kɛ Anannganman fali mɛn nga mannin amun. Kɛ e kwlaa e ti amun ngan'n, kɛ e usu sa. Srɛ'n kun-man ye blɛblɛ.

¹⁰ E tili i kɛ blɛ nga amun fin Ezipt ´ba'n, Anannganman kpɛli Ndɛma jenvie'n nun mannin amun. Yɛ i ng'ɔ o su ekun, Amɔrfuɛ'm be famiɛn nnyɔn'n: Siɔn nin Ɔg nga be o Zurdɛn'n i lika ng'ɔ kpɛ wia afiliɛ lɔ nun'n, be kunlɛ nga amun ko kun be'n, i nganniɛn guali e su wa.

¹¹ Kɛ e tili i sɔ nganniɛn'n, ayrɛ guali e wun. E kwlaa e wawɛ'n wanndili e wun. Nanwlɛ Anannganman amun Nyanmiɛn yɛ ɔ ti nglo lɔ nin asiɛ'n su wa Famiɛn nin-ɔn .

¹² I sɔ'n ti, amun `ta nda Anannganman nyrun kɛ ye nga n yoli amun'n, amun kusu amun ´fa yo min nin min awlofuɛ mun e wie. Amun `kle min nzɔliɛ kun bɔ n kwla lafi su.

¹³ Amun `ta min nda kɛ amun ko kun-man mín si ɔ nin mín nin, nin min niaan mun ɔ nin bé sa nun sran mun.»

¹⁴ Yɛ be tɛli i su kɛ: «Ndɛ nga a kɛnnin i lɛ'n e ´nian su. Sɛ ɔ ti wulɛ bɔbɔ yɛ ɔ fata kɛ e wu'n, e ´wu, se w'a bo-man e wa balɛ'n su w'a di-man jɔlɛ'n. I sɔ'n ti, kɛ Anannganman ko fa mɛn nga ko man ye'n, e ´yo wɔ kpa.»

¹⁵ Raab i sua'n ɔ nin talɛ ng'ɔ si be klɔ wun'n be ti kun. Kɛ be tatali nda sɔ'n nan ɔ'a minnda nyanman nan b'a sin fenɛtri nun b'a jra.

¹⁶ Ɔ seli be kɛ: «Amun ko fia oka ng'ɔ o lɔ'n su kɛ ɔ ko yo nan be nga be ɔli amun kunndɛlɛ'n b'a wun-man amun'n ti. Amun `la lɛ le nsan. Kɛ ɔ ´ju sɔ'n, wuun b'a sa be sin, kpɛkuun amun `fa atin'n siɛn'n.»

¹⁷ Yasua nnyɔn sɔ'm be seli i kɛ: «Kɛ ɔ ko yo nan y'a fa nda nga wɔ man e tali'n su'n,

¹⁸ kɛ a wun i kɛ y'a kpɛn amun mɛn'n nun wa'n, fa nyanman ɔkwlɛ nga cici fenɛtri nga a jra e nun yɛ'n nun. Kpɛkuun man ɔ́ si nin ɔ́ nin, nin ɔ niaan mun, ɔ nin ɔ osufuɛ'm be kwlaa be wa tran wɔ awlo wa.

¹⁹ Sɛ be nun wie fin awlo'n nun fite nan be kun i-ɔ, i bɔbɔ yɛ ɔ kunnin i wun-ɔn, nán e yɛ e yoli-ɔ. Sanngɛ be kwlaa nga be nin wɔ be o wɔ awlo nun'n, sɛ be kun be'n, man i sannzan'n tɔ e su.

²⁰ Sɛ kusu a bo e wa balɛ'n i jɔ sin'n, nda nga e tali'n, wuun e tɛli i ngbɛn, e su di-man su.»

²¹ Raab tɛli su kɛ: «Muae bla o! Man ɔ yo kɛ amun kɛnnin i lɛ'n sa.» Yɛ ɔ mannin be atin be ɔli-ɔ. Kɛ be ɔli cɛ'n, yɛ ɔ cicili nyanman ɔkwlɛ'n i fenɛtri'n nun-ɔn.

²² Klɔ kpla nianfuɛ'm be ko fiali oka'n su lɔ le nsan. Be nga be suli be su'n be kunndɛli be lele ngbɛn. Be sali be sin.

²³ Yɛ yasua nnyɔn'm be fin be fiawlɛ nun kpɔlɛ'n su lɔ jrali-ɔ. Be ko kpɛli Zurdɛn'n nan b'a sa be sin Zozie wun lɔ. Be boli jasin'n kwlaa kleli Zozie.

²⁴ Be seli kɛ: «Nanwlɛ, Anannganman fali mɛn wunmuan sɔ'n mannin ye. Lɔ sran'm be kwlaa bé sa sin a bubu be. Be jran e nyrun-ɔn, ɔ jran-man.»