Zozie 19 - NYANMIƐN NDƐ'N 1998

Simeɔn akpasua'n i lika liɛ'n

¹ Lika'n i nnyɔn su nga be tuli i wun fɔtɔ'n yoli Simeɔn akpasua'n su awlobo-awlobo'm be liɛ. Zida akpasua'n i lika liɛ'n bo sin yia Simeɔn liɛ'n.

² I nun klɔ mun yɛlɛ Beɛr-Seba, Seba, Mɔlada,

³ Azar-Sial, Baala, Asɛm,

⁴ Ɛltɔlad, Bɛtil, Ɔrma.

⁵ Ziklag, Bɛt-Markabɔt, Azar-Siza,

⁶ Bɛt-Lɛbaɔt, ɔ nin Sarusɛn. Be ti klɔ dandan blu-nin-nsan. Klɔ kanngan nga be mantan be lɛ'n be uka su.

⁷ Klɔ wie ekun yɛlɛ Ain, Rimɔn, Etɛr ɔ nin Asan. Be ti klɔ dandan nnan. Klɔ kanngan nga be mantan be lɛ'n be uka su.

⁸ Klɔ nga be mantan be lɛ'n kwlaa b'ɔ fa ju Baalat-Beɛr nin Ramat Negɛb'n be uka su. Simeɔn awlobo-awlobo'm be lika liɛ'n yɛ ɔ o lɛ-ɔ.

⁹ Zidafuɛ'm be lika liɛ'n wie yɛ be fa mannin Simeɔn akpasua su sran mun-ɔn, afin Zidafuɛ'm be lika nga be nyɛnnin i'n ti dan ngboko. I ti yɛ Simeɔn lika'n wo Zida liɛ'n i klun nin-ɔn.

Zabilɔn akpasua'n i lika liɛ'n

¹⁰ Lika'n i nsan su nga be tuli i wun fɔtɔ'n yoli Zabilɔnfuɛ'm be liɛ. Lika sɔ'n i ngua lɔ awɛ'n ju Sarid.

¹¹ Kɛ ɔ fɛ lɛ'n ɔ fu kɔ wia atɔliɛ lɔ lika nun lele ju Mareala. Ɔ fɛ lɛ ju Dabesɛt, kpɛkuun ɔ ko to nzue ba ng'ɔ sonji Zɔkneam nyrun lɛ'n.

¹² Kɛ ɔ fɛ Sarid'n, ɔ bli kɔ wia afiliɛ Kislɔt-Tabɔr i awɛ'n su, kpɛkuun ɔ kpɛn Dabrat ɔ fu kɔ Zafia.

¹³ I sin, ɔ kɔ wia afiliɛ lika nun ekun lele ju Gat-Efɛr ɔ nin Ita-Kazɛn, ɔ to Rimɔn, ɔ bli kɔ Nea lika nun lɔ.

¹⁴ Nglo lɔ lika nun awɛ'n bo sin yia Anatɔn, ɔ kpɛn Ziftak-Ɛl kongo nun.

¹⁵ Katat, Naalal, Simrɔn, Zideala, ɔ nin Bɛtleɛm lika sɔ'n i nun klɔ dandan'm be ti blu-nin-nnyɔn. Klɔ kanngan nga be o be mantan be lɛ'n be uka su.

¹⁶ Klɔ sɔ'm be kwlakwla be ti Zabilɔn awlobo-awlobo'm be liɛ.

Isakar i lika liɛ'n

¹⁷ Lika'n i nnan su nga be tuli i wun fɔtɔ'n yoli Isakarfuɛ'm be liɛ.

¹⁸ Be lika liɛ'n i nun klɔ mun yɛlɛ Zizreɛl, Kɛzilɔt, Sinɛm,

¹⁹ Afaraim, Siɔn, Anasarat,

²⁰ Rabit, Kiszɔn, Abɛz,

²¹ Remɛt, An-Ganim, An-Ada, ɔ nin Bɛt-Pazɛz.

²² Awɛ'n to Tabɔr, Sasazima, Bɛt-Semɛs, kpɛkuun ɔ to Zurdɛn'n. Lika sɔ'n i nun klɔ dandan'm be ti blu-nin-nsiɛn. Klɔ kanngan nga be mantan lɛ'n be uka su.

²³ Klɔ sɔ'm be kwlakwla be ti Isakar awlobo-awlobo'm be liɛ.

Azɛr akpasua'n i lika liɛ'n

²⁴ Lika'n i nnun su nga be tuli i wun fɔtɔ'n yoli Azɛr akpasua sufuɛ'm be liɛ.

²⁵ Klɔ nga be o be lika liɛ nun'n yɛlɛ Ɛlkat, Ali, Betɛn Aksaf,

²⁶ Alamelɛk, Amead, ɔ nin Miseal. Wia atɔliɛ lɔ lika nun awɛ liɛ'n yɛlɛ Sikɔr-Libnat nzue ba'n, ɔ fɛ lɛ lele fa to Karmɛl oka'n.

²⁷ Wia afiliɛ lɔ lika nun'n, awɛ'n fu kɔ Bɛt-Dagɔn lɔ lika'n nun, ɔ to Zabilɔn be lika'n ɔ nin Ziftak kongo'n, kpɛkuun ɔ kɔ nglo lɔ ɔ ko to Bɛt-Emɛk ɔ nin Nɛiɛl. Ɔ kɔ i nyrun ndɛnman su, ɔ sin Kabil,

²⁸ Abdɔn, Rɛɔb, Amɔn, ɔ nin Kana, kpɛkuun ɔ ju Sidɔn klɔ dan'n wun lɔ.

²⁹ Kɛ ɔ fɛ i lɛ'n, ɔ bli kɔ Rama ɔ nin Tir bɔ be sisili i wun kekleke'n, kpɛkuun ɔ kɔ Oza ndɛnman, ɔ sin Akzib lika'n nun, nin

³⁰ Ɔma, nin Afɛk, ɔ nin Rɛɔb lika'n nun, ɔ to Mediterane jenvie'n. Lika'n i nun klɔ dandan'm be ti ablaɔn-nin-nnyɔn. Be klɔ kanngan nga be mantan be lɛ'n be uka su.

³¹ Klɔ sɔ'm be kwlaa be ti Azɛr awlobo-awlobo'm be liɛ.

Nɛftali akpasua'n i lika liɛ'n

³² Lika'n i nsiɛn su nga be tuli i wun fɔtɔ'n ɔ yoli Nɛftali akpasua sufuɛ'm be liɛ.

³³ Ngua lɔ awɛ'n fɛ Elɛf ɔ nin Zananim waka dan'n wun lɛ, ɔ sin Adami-Nekɛb ɔ nin Zabneɛl, ɔ kpɛn Lakɔm, kpɛkuun ɔ to Zurdɛn'n.

³⁴ Wia atɔliɛ lɔ awɛ'n ɔ bli kɔ Aznɔt-Tabɔr, ɔ kpɛn Ikɔk, ɔ sin Zabilɔn lika'n nuan su, kpɛkuun ɔ sin Azɛr liɛ'n nuan su wia atɔliɛ lɔ. Wia afiliɛ lɔ awɛ'n yɛlɛ Zurdɛn'n.

³⁵ Klɔ dandan nga be si bé wun'n mun yɛlɛ Sidim, Zɛr, Amat, Rakat, Kinerɛt,

³⁶ Adama, Rama Azɔr,

³⁷ Kedɛs, Edrei, An-Azɔr,

³⁸ Zirɛɔn, Migdal-ɛl, Ɔrɛm, Bɛt-Anat, ɔ nin Bɛt-Semɛs. I kwlakwla'n ti klɔ dandan blu-nin-ngwlan. Be klɔ kanngan nga be mantan be lɛ'n be uka su.

³⁹ Klɔ sɔ'm be kwlakwla be ti Nɛftali awlobo-awlobo'm be liɛ.

Dan akpasua'n i lika liɛ'n

⁴⁰ Lika'n i nso su nga be tuli i wun fɔtɔ'n yoli Dan akpasua sufuɛ'm be liɛ.

⁴¹ Be lika'n nun klɔ mun yɛlɛ Zɔrea, Ɛstaɔl, Ir-Semɛs,

⁴² Saalabin, Azalɔn, Zitla,

⁴³ Elɔn, Timnata, Ekrɔn,

⁴⁴ Ɛltɛke, Gibɛtɔn, Baalat,

⁴⁵ Zɛid, Bɛne-Bɛrak, Gat-Rimɔn,

⁴⁶ Me-Zarkɔn nzue'n, Rakɔn, ɔ nin lika nga be o Zafo wun lɛ'n.

⁴⁷ Dan akpasua'm be lika'n fili bé sa nan be nin Lesɛmfuɛ'm b'a ɔ kunlɛ. Be fali be klɔ'n, be kunnin klɔ sɔ'n i su sran mun. Be fa yoli be liɛ. Be trannin nun nan b'a flɛ i kɛ Dan. Be fali be nannan i dunman'n yɛ be fa tɔnnin i-ɔ .

⁴⁸ Klɔ nga be boboli be dunman lɛ'n, be kwlaa be nin klɔ kanngan nga be mantan be lɛ'n be ti Dan awlobo-awlobo'm be liɛ.

⁴⁹ Kɛ Izraɛlfuɛ'm be cɛcɛli mɛn sɔ'n nun wieli'n, nan b'a fa be lika'n wie b'a man Nɛn i wa Zozie.

⁵⁰ Be niannin nga Anannganman kannin'n su, be fali klɔ dan nga Zozie srɛli'n be mɛnnin. Klɔ sɔ'n yɛlɛ Timnat-Serak, ɔ o Efraim i oka lika'n nun lɔ. Zozie kplannin klɔ sɔ'n uflɛ nan ɔ'a tran nun.

⁵¹ Eleazar b'ɔ ti Nyanmiɛn nyrun jranfuɛ'n, nin Nɛn i wa Zozie ɔ nin Izraɛl akpasua'n kwlaa be awlobo kpɛnngbɛn'm be tuli lika fanunfanun sɔ'm bé wun fɔtɔ be cɛcɛli nun Silo lɔ, Anannganman i nyrun, i tannin sua ng'ɔ yi i wun nglo nun i anuan'n nun lɛ. Kɛ be wieli lika'n i nun cɛcɛ kɛ nga sa.