Zozie 18 - NYANMIƐN NDƐ'N 1998

Akpasua nga be kali lɛ'n be lika liɛ manlɛ

¹ Kɛ Izraɛlfuɛ'm be fali mɛn'n, be ko yiali Silo lɔ, nan b'a kplan sua nga Anannganman yi i wun nglo nun'n.

² Kɛ ɔ ´yo sɔ'n, wuun be nun akpasua nso be nian nyan-man be lika liɛ.

³ Nan Zozie ɔ'a se be kɛ: «?Sanngɛ yo, mɛn'n bɔ Anannganman b'ɔ ti amun nannan'm be Nyanmiɛn'n mannin amun'n, nan blɛ'n kwlaa kɛ amun wa kpa i nun tranlɛ'n su sa titi?

⁴ Amun `kpa akpasua'n kwlaa su sran nsan-nsan. N wa sunman be, be ´ko wlan-wlan mɛn sɔ'n nun, be ´sie be akpasua'n i lika liɛ'n i nzɔliɛ kpɛkuun i kwlaa nga be wun i'n be wa yiyi nun kle min.

⁵ Be wa kpaci lika nun akpasua nso. Zidafuɛ'm be ´ka be lika liɛ'n nun ngua lɔ, Zozɛf i akpasua sufuɛ'm be kusu be ´ka be liɛ nun Zida i ti su nglo lɔ.

⁶ Amun `klɛklɛ akpasua nso nga be o lɛ'n be lika'n kɛ be fa ti'n. Nan amun wa fa kle min. Kɛ ɔ ko yo sɔ'n n wa tu lika sɔ'm bé wun fɔtɔ n ´man akpasua-akpasua mun Anannganman i nyrun.

⁷ Levifuɛ'm be su nyan-man lika'n wie. Ng'ɔ ti be liɛ'n yɛlɛ Anannganman i nyrun jranlɛ junman'n. Gad nin Ribɛn be akpasua mun ɔ nin Manase i akpasua'n i bue be kusu be dun mmua nyannin be lika liɛ Zurdɛn'n i wia afiliɛ lɔ. Moiz bɔbɔ b'ɔ ti Anannganman i sufuɛ'n yɛ ɔ fa mannin be-ɔ.»

⁸ Sran nga be kpali be kɛ be ko nian lika'n be tanndannin bé wun. Kwlaa nan b'a wɔ'n, Zozie seli be kɛ: «Amun wɔ nan amun `wlan lika'n nun, amun `sie lika'm be nzɔliɛ, nan amun `wa yiyi nun kle min. Anannganman i nyrun Silo wa, n ´tu lika akpasua'n kwlaa bé wun fɔtɔ n ´fa cɛcɛ amun.»

⁹ Sran sɔ'm be wlannin mɛn'n nun, be cɛli lika'n nun akpasua nso. Be klɛklɛli be awɛ mun, be klɛli klɔ'm be dunman nan b'a sa bé sin Silo, Zozie wun lɔ.

¹⁰ Zozie tuli lika sɔ'm bé wun fɔtɔ Anannganman nyrun nan ɔ'a fa cɛcɛ Izraɛlfuɛ mun. Ɔ fa cɛcɛli akpasua'n kwlaa bé ti nun ti nun.

Bɛnzamɛn akpasua'n i lika liɛ'n

¹¹ Lika klikli nga be tuli i wun fɔtɔ'n yɛlɛ Bɛnzamɛn akpasua i liɛ'n. Lika sɔ'n wo Zida nin Zozɛf osu'n be liɛ'n i afiɛn.

¹² I nglo lɔ awɛ liɛ'n fɛ i Zurdɛn'n su fu Zeriko nglo lɔ lika liɛ nun, kpɛkuun ɔ sin wia atɔliɛ lɔ. Ɔ sin oka'm be afiɛn to Bɛt-Avɛn.

¹³ Kɛ ɔ fɛ i lɛ'n, ɔ kɔ Liz ndɛnman, ɔ sin Liz bɔ i dunman ekun yɛlɛ Betɛl'n i bo ngua, kpɛkuun ɔ sin oka ng'ɔ o Bɛt-Ɔrɔn ngua lɔ'n i afiɛn, ɔ jra Atrɔt-Adar.

¹⁴ Kɛ awɛ'n ju oka sɔ'n i wia atɔliɛ'n, ɔ kɔ-mɛn i nyrun kun. Ɔ bli kɔ ngua lɔ, ɔ ju Kirzat-Baal bɔ be flɛ i ekun kɛ Kirzat-Zearim'n b'ɔ ti Zidafuɛ'm be lika'n nun lɔ. Kɛ awɛ'n i wia atɔliɛ lɔ'n ti sa.

¹⁵ Ngua lɔ awɛ liɛ'n fɛ Kirzat-Zearim kɔ Gazam wun lɔ kpɛkuun ɔ ju Nɛftoak nzue ti'n su lɔ.

¹⁶ Kɛ ɔ fɛ i lɛ'n, ɔ jra oka nga i kongo yɛlɛ Inɔm kongo'n i bo ngua, ɔ sin Rɛfafuɛ'm be kongo'n i ti su nglo. Ɔ sin Inɔm kongo'n i nuan su Zɛbis kpɔlɛ'n i ngua lɔ kongo'n i afiɛn, kpɛkuun ɔ jra lele ju An-Rɔgɛl.

¹⁷ Ɔ bli kɔ nglo lɔ lika nun An-Semɛs ndɛnman nan ɔ'a ju Gilgal Adɔmim kpɔlɛ'n i nyrun sɛsɛ. Kɛ ɔ fɛ lɛ'n, ɔ jra ju yɛbuɛ nga be flɛ i kɛ Bɔan i wun lɔ. Be fali Ribɛn wa'n i dunman'n yɛ be tɔnnin i-ɔ.

¹⁸ Kpɛkuun ɔ sin Zurdɛn kongo'n i kpɔlɛ'n i ti su nglo lɔ, yɛ ɔ fa Zurdɛn nzue'n i ndɛnman. Kɛ ngua lɔ awɛ'n ti sa.

¹⁹ Ɔ fɛ lele kɔ Bɛt-Ɔgla nglo lɔ, ɔ ko wie jenvie b'ɔ ti njin nzue klakla'n i nuan su nglo lɔ kan Zurdɛn nzue ɔ sonji gua lɛ'n. Ngua lɔ awɛ'n yɛ ɔ o lɛ-ɔ.

²⁰ Zurdɛn'n yɛ ɔ ti wia afiliɛ lɔ awɛ nin-ɔn. Lika nga be fa mannin Bɛnzamɛn akpasua'n i awlobo-awlobo mun, kɛ i awɛ'n ti sa.

²¹ Klɔ dandan nga Bɛnzamɛn awlo'm be fali'n yɛlɛ Zeriko, Bɛt-Ɔgla, Emɛk-Keziz,

²² Bɛt-Araba, Zɛmaraim, Betɛl,

²³ Avim, Para, Ofra,

²⁴ Kɛfar-Amɔnai, Ɔfni ɔ nin Gɛba. Be ti klɔ dandan blu-nin-nnyɔn. Klɔ kanngan nga be mantan be lɛ'n be uka su.

²⁵ Klɔ dandan sɔ'n wie yɛlɛ Gabaɔn, Rama, Beerɔt,

²⁶ Mizpe, Kɛfira, Moza,

²⁷ Rekɛm, Zirpeɛl, Tareala,

²⁸ Sela, Elɛf, Zɛbisfuɛ mun be klɔ'n bɔ i dunman'n kun yɛlɛ Zerizalɛm'n, Gibea, ɔ nin Kirzat. Be ti klɔ dandan blu-nin-nnan. Klɔ kanngan nga be mantan be lɛ'n be uka su. I kwlaa ng'ɔ o lɛ'n yɛ ɔ ti Bɛnzamɛn i awlobo-awlobo'm be lika liɛ nin-ɔn.