Zozie 17 - NYANMIƐN NDƐ'N 1998

¹ Manase b'ɔ ti Zozɛf i wa kpɛnngbɛn'n i akpasua liɛ'm be kusu be nyannin be lika liɛ. Makir b'ɔ ti Manase i wa kpɛnngbɛn'n ɔ ti alɛ kunfuɛ dan, i si'n yɛlɛ Galaad, i mma liɛ'm be dun mmua nyannin be lika liɛ, yɛlɛ Galaad nin Bazan lika'n, ɔ o Zurdɛn i wia afiliɛ.

² Manase i akpasua nga be ka lɛ'n be mannin be lika liɛ kusu. Osu sɔ'n be dunman mun yɛlɛ Abiezɛr, Elɛk, Azriɛl, Sisɛm, Efɛr ɔ nin Sɛmida. Be kwlakwla nga be o lɛ'n be ti Zozɛf i wa Manase i bo mma mun.

³ Manase i wa yɛlɛ Makir. Makir wa liɛ'n yɛlɛ Galaad. Galaad kusu liɛ'n yɛlɛ Efɛr. Efɛr i klun ba Zɛlɔfsad ɔ'a wu-man ba yasua, bla ngunmin yɛ ɔ nyɛnnin i-ɔ. Bla sɔ'm be flɛ be Makla, Nɔa, Ɔgla, Milka, Tirza.

⁴ Be wa toli Nyanmiɛn nyrun jranfuɛ Eleazar, nin Nɛn i wa Zozie, ɔ nin nvle'n su kpɛnngbɛn mun, nan b'a se be kɛ: «Anannganman seli Moiz kɛ ɔ `man e lika kɛ e akpasua'n su yasua mun sa .» Be niannin Anannganman i nuan su ndɛ'n su be mannin be lika kɛ yasua'm be sa.

⁵ Ɔ man Manase akpasua'n nyannin lika akpasua blu sanngɛ Galaad nin Bazan bɔ be o be liɛ Zurdɛn i wia afiliɛ lɔ'n be nun-man nun.

⁶ Manase i mma yasua nin i mma bla'm be kwlakwla be nyannin lika. Galaad kusu ti Manase i mma kun'm be liɛ.

⁷ Manase i lika'n fɛ i Azɛr ɔ kpɛn Mikmɛtat, Sisɛm i wia afiliɛ lɔ. Kɛ ɔ fɛ i Mikmɛtat lɛ'n, awɛ'n jra ngua lele ju An-Tapiak lɔfuɛ'm be tranwlɛ'n nun.

⁸ Lɛ lika'n ti Manase akpasua'n liɛ laa, sanngɛ be fali Tapiak klɔ'n b'ɔ o awɛ'n su'n be mannin Efraimfuɛ mun.

⁹ Kɛ ɔ fɛ i lɛ'n, awɛ'n jra Kana nzue ba'n i nuan, ngua lɔ lika nun. Klɔ dandan nga be o nzue'n i bo ngua lɛ'm be yoli Efraimfuɛ'm be liɛ sanngɛ be o Manase lika liɛ'n klun. Awɛ'n fɛ lɛ kpɛn nzue ba'n i nglo lɔ lika liɛ nun kwlaa nan ɔ'a to Mediterane jenvie'n.

¹⁰ Efraim akpasua'n wo Manase liɛ'n i bo ngua. Mediterane jenvie'n ɔ ti be nnyɔn'n be wia atɔliɛ lɔ awɛ. Azɛr osu'n wo i liɛ Manase ti su nglo b'ɔ kɔ wia atɔliɛ lɔ lika'n nun, yɛ Isakar osu'n kusu wo i liɛ Manase i ti su nglo b'ɔ ´kɔ wia afiliɛ lɔ'n.

¹¹ Isakar nin Azɛr be lika liɛ nun klɔ dandan nga be flɛ be Bɛt-Sean nin Zibleam ɔ nin lika nga be mantan be lɛ'n, ɔ nin Dɔr, nin An-dɔr, nin Tanak, nin Megido, ɔ nin bé su sran mun, ɔ nin lika nga be mantan be lɛ'n, Dɔr nin i asa'n su'n be kwlakwla nga be o lɛ'n be yoli Manase liɛ.

¹² Sanngɛ Manasefuɛ'm b'a kwla fuan-man klɔ sɔ'n sufuɛ mun. Ɔ man Kanaanfuɛ sɔ'm be kali lɛ.

¹³ Izraɛlfuɛ'm be wa nyannin fanngan, sanngɛ b'a kwla fuan-man be. Be miannin be kɛ be `di be junman.

¹⁴ Zozɛf akpasua sufuɛ'm be wa toli Zozie be seli i kɛ: «?E bɔ Anannganman yoli e ye kɛ nga sa'n, bɔ y'a sɔn-man ngowa nin-ɔn , ɔ yo sɛ yɛ a mannin e lika kunngba-a?»

¹⁵ Zozie tɛli su kɛ: «Sɛ amun waan amun sɔnnin dan nan Efraim oka'n ju-man amun'n, amun `ko sɔn Ferez nin Rɛfafuɛ'm bé bo'n wie be `fa.»

¹⁶ Zozɛf akpasua sufuɛ'm be tɛli i su kɛ: «Oka'n ju-man ye. Kusu Kanaanfuɛ nga be tran lika kpɛtɛkplɛɛ nun'n be nga be o Bɛt-Sean nin o, be nga be o lika nga be mɛntɛn i lɛ'n mun o, annzɛ Zizreɛl kongo'n nunfuɛ'm be kwlakwla be lɛ kakaklolo.»

¹⁷ Yɛ Zozie tɛli Zozɛf i mma mun nin Efraim akpasua sufuɛ ɔ nin Manase akpasua liɛ'n bé su kɛ: «Amun sɔnnin, amun lɛ fanngan kpa. I sɔ'n ti amun su nyan-man lika akpasua kunngba.

¹⁸ Oka lika ng'ɔ ti bo ngunmin lɛ'n i kwlaa ti amun liɛ. Amun `sɔn nan amun `fɛ i kwlaa. Amun `kan Kanaanfuɛ mun bé bo, kannzɛ be lɛ blalɛ kakaklolo o, kannzɛ be ti sɛ be ti sɛ o san amun ´kwla be!»