Zozie 16 - NYANMIƐN NDƐ'N 1998

Efraim i akpasua'n nin Manase i akpasua'm be lika'n

¹ Zozɛf mma'm be lika liɛ nga be tuli i wun fɔtɔ mannin be'n, i bo ngua lɔ'n fɛ i Zurdɛn'n nuan Zeriko wun lɛ kɔ nzue ti nga klɔ nunfuɛ'm be sa'n i wia afiliɛ lɔ. Awɛ'n sin Zeriko lɛ, ɔ kpɛ lika nun, kpɛkuun ɔ fu Betɛl lɔ oka lika'n nun lɔ.

² Kɛ ɔ fɛ lɛ'n ɔ kɔ Liz ndɛnman, ɔ sin Atarɔt kan Arkfuɛ'm be tran lɛ'n.

³ I sin, ɔ jra wia atɔliɛ lɔ Zaflɛtfuɛ'm be nvle'n nun lɔ. Ɔ sin Bɛt-Ɔrɔn b'ɔ kan ase'n ɔ nin Gezɛr be afiɛn, kpɛkuun ɔ kpɛn Mediterane jenvie'n i nuan.

⁴ Zozɛf i osu nunfuɛ bɔ be ti Manase nin Efraim akpasua sufuɛ'm be cɛli lika sɔ'n nun be fali.

⁵ Efraim akpasua'n nyannin lika nga i awɛ'n fɛ i Atrɔt-Adar lɔ ngua lɔ wia afiliɛ lɔ lika nun fa ju Bɛt-Ɔrɔn b'ɔ ti nglo-nglo'n,

⁶ kpɛkuun ɔ to Mediterane jenvie'n. Nglo lɔ lika liɛ nun'n ɔ sin Mikmɛtat wun koko. Kɛ ɔ ju Mikmɛtat i wia atɔliɛ lɔ'n, ɔ kɔ Tanat-Silo ndɛnman ɔ ko kpaci i afiɛn ɔ kpɛn Zanɔak.

⁷ Kɛ ɔ fɛ lɛ'n, ɔ jra Atarɔt ɔ nin Naara, ɔ to Zeriko, kpɛkuun ɔ ko kpɛn Zurdɛn nuan.

⁸ Mikmɛtat i wia atɔliɛ lɔ awɛ'n fɛ Tapiak ju Kana nzue ba'n nuan. Lika nga be fa mannin Efraim akpasua'n i awlo mun'n yɛ be o lɛ-ɔ.

⁹ Be fali klɔ dandan nin klɔ kanngan nga be mantan be'n, sanngɛ klɔ sɔ'm be o Manase akpasua'n i lika liɛ'n nun.

¹⁰ Efraimfuɛ'm b'a fuan-man Kanaanfuɛ nga be tran Gezɛr'n. Ɔ man lele ndɛ Gezɛrfuɛ'm be nin be yɛ be tran-an, sanngɛ be yoli kɛ be kanga sa. Be di be junman.