Zozie 15 - NYANMIƐN NDƐ'N 1998

Zida akpasua'n i lika'n

¹ Lika nga be tuli i wun fɔtɔ be mannin Zida akpasua'n i awlobo-awlobo mun'n, i ngua, wia afiliɛ lɔ lika nun'n, ɔ nin Edɔm nvle'n be yia. Zin aawlɛ flɛnnɛn'n wo i ngua lɔ.

² Ngua lɔ awɛ'n ɔ bo i bo jenvie b'ɔ ti njin nzue klakla'n i ngua lɔ kɛ nzue'n bli kolongo lɛ'n,

³ ɔ sin nyannglan kpɔlɛ'n ɔ nin Zin be ngua, ɔ kpɛn Kadɛs-Barnea bo ngua lɔ, kpɛkuun ɔ sin Ɛzrɔn, ɔ ju Adar, ɔ bli kɔ Karka i ndɛnman.

⁴ Ɔ sin Azmɔn ɔ ko to nzue ba kun ng'ɔ nin Ezipt be yia'n kpɛkuun ɔ ko kpɛn Mediterane jenvie'n nuan. Kɛ Zida i awɛ'n i bo ngua lɔ'n ti sa.

⁵ I wia afiliɛ lɔ lika liɛ nun awɛ'n yɛlɛ jenvie b'ɔ ti njin nzue klakla'n ɔ nin kan Zurdɛn'n sonji gua nun lɛ'n. Nglo lɔ lika liɛ nun awɛ'n fɛ i Zurdɛn nin jenvie'n be awɛ'n su

⁶ ɔ fu kɔ Bɛt-Ɔgla, ɔ sin Bɛt-Araba i nglo lɔ, ɔ kpɛn yɛbuɛ nga Ribɛn i wa Bɔan i dunman wo su'n su lɔ.

⁷ Ɔ sin Nyrɛnnɛn kongo nun lɔ kɔ Debir nglo lɔ lika liɛ nun, kpɛkuun ɔ sin nglo lɔ ekun Gilgal wun lɔ Adɔmim kpɔlɛ'n i ndɛnman kongo'n i bo ngua. Kpɛkuun ɔ sin An-Semɛs nzue ti wun lɛ, ɔ to An-Rɔgɛl.

⁸ Ɔ fu Inɔm kongo'n i kpɔlɛ'n Zɛbisfuɛ'm be kpɔlɛ'n i ngua lɔ ndroliɛ'n nun kan Zerizalɛm klɔ'n wo lɛ'n, ɔ sin oka ng'ɔ o Inɔm kongo'n i wia atɔliɛ'n i ti su, kpɛkuun ɔ sin Rɛfafuɛ'm be kongo'n i nglo lɔ.

⁹ Kɛ ɔ fɛ lɛ'n, ɔ bli Nɛftoak nzue ti'm bé wun lɔ, ɔ ko to klɔ nga be o Efrɔn oka'n bé wun lɔ'n, kwlaa nan ɔ'a ɔ Baala ndɛnman. Baala i dunman kun ekun yɛlɛ Kirzat-Zearim.

¹⁰ Baala i wia atɔliɛ lɔ awɛ'n ko bli sin Seir oka wun lɔ, ɔ sin oka bɔ i dunman ekun yɛlɛ Kɛsalɔn oka'n, i kongo'n i wia atɔliɛ lɔ, kpɛkuun ɔ jra Bɛt-Semɛs, ɔ san Timna wun.

¹¹ Ɔ kɔ Ekrɔn klɔ'n i kongo'n i ndɛnman, ɔ bli Sikrɔn wun lɔ, kpɛkuun ɔ sin Baala oka wun lɛ kɔ Zabne lɔ lika nun, nan ɔ'a kpɛn Mediterane jenvie'n nuan lɔ.

¹² Wia atɔliɛ lɔ awɛ'n yɛlɛ Mediterane jenvie'n. Kɛ lika nga be fa mannin Zida awlobo-awlobo mun'n i nuan'n fa sin yɛ ɔ o lɛ-ɔ.

¹³ Zɛfine i wa Kalɛb nyannin Zida i lika'n i bue kɛ Anannganman fa kan kleli Zozie'n sa. Be fali Kirzat-Arba bɔ be flɛ i Arba klɔ'n be fa mɛnnin i. Arba'n ti Anakfuɛ'm be nannan. Dunman ng'ɔ o klɔ sɔ'n su siɛn'n yɛlɛ Ebrɔn.

¹⁴ Kalɛb fuannin Anakfuɛ'm b'ɔ be ti blamiɛn'n be akpasua nsan nga be tran lɛ mun: Sesai, nin Aiman, ɔ nin Talmai.

¹⁵ Kɛ ɔ fɛ Ebrɔn lɛ'n, ɔ nin Debirfuɛ'm be kunnin, i blɛ sɔ nun'n, wuun be flɛ klɔ sɔ'n kɛ Kirzat-Sefɛr.

¹⁶ Kalɛb tali nda, i waan ɔ ´fɛ i wa bla Aksa man sran ng'ɔ ´kwla Kirzat-Sefɛrfuɛ mun'n.

¹⁷ Kɛnaz b'ɔ ti Kalɛb bɔbɔ i niaan'n, i wa liɛ Ɔtniɛl yɛ ɔ kwlali klɔ sɔ'n i sufuɛ mun-ɔn. Nan Kalɛb ɔ'a fɛ i wa bla'n ɔ'a mɛn i kɛ ɔ jɛ i.

¹⁸ Kɛ talua'n juli Ɔtniɛl awlo lɔ'n, ɔ seli i kɛ: «N klo kɛ a srɛ ń si Kalɛb i fie diwlɛ kun.» Aksa fin i aflunmun'n su jrali, yɛ Kalɛb usɛli i kɛ: «?A klo kɛ a ´kan ndɛ?»

¹⁹ Ɔ tɛli i su kɛ: «Min waan n ´srɛ wɔ like kun. Asiɛ nga a fa mannin min ngua lɔ'n ɔ yo-man like ye. I ti min waan a fa nzue'n i ti lika lɔ'n uka su.» Kalɛb fali nglo lɔ nzue'n i ti lika lɔ'n nin ngua lɔ liɛ'n mɛnnin i.

²⁰ Lika nga Zida akpasua su awlobo-awlobo'm be nyɛnnin'n yɛ ɔ o lɛ-ɔ.

²¹ Klɔ nga be o Zida i lika i ngua'n, nin Edɔm i nuan su mun yɛlɛ Kabzeɛl, Edɛr, Zagir,

²² Kina, Dimɔna, Adada,

²³ Kedɛs, Azɔr, Itnan,

²⁴ Zif, Telɛm, Bealɔt,

²⁵ Azɔr-Adata, Kɛrizɔt, Ɛzrɔn bɔ be flɛ ekun kɛ Azɔr'n

²⁶ Aman, Sɛma Mɔlada,

²⁷ Azar-Gada, Ɛsmɔn, Bɛt-palɛt,

²⁸ Azar-sial, Beɛr-Seba ɔ nin klɔ nga be mɛntɛn i lɛ'n,

²⁹ Baala, Ize, Azɛm,

³⁰ Ɛltɔlad, Kɛsil, Ɔrma,

³¹ Ziklag, Madmana, Sansana,

³² Lɛbaɔt, Silim ɔ nin An-Rimɔn. I kwlaa'n ti klɔ dandan ablaɔn-nin-ngwlan. Klɔ kanngan nga be mantan be lɛ'n be uka su.

³³ Klɔ nga be o lika kpɛtɛkplɛɛ nun'n yɛlɛ Ɛstaɔl, Zɔrea, Asna,

³⁴ Zanɔak, An-Ganim, Tapiak, Enam,

³⁵ Zarmit, Adilam, Soko, Azeka,

³⁶ Saaraim, Aditaim, Gɛdera, ɔ nin Gɛderɔtaim. Be ti klɔ dandan blu-nin-nnan. Klɔ kanngan nga be mantan be lɛ'n be uka su.

³⁷ Zɛnan, Adasa, Migdal-Gad,

³⁸ Sian, Mizpe, Zɔkteɛl,

³⁹ Lakis, Bɔzkat, Eglɔn,

⁴⁰ Kabɔn Lakmas, Kitlis,

⁴¹ Gɛderɔt, Bɛt-Dagɔn, Naama ɔ nin Makeda. Be ti klɔ dandan blu-nin-nsiɛn. Klɔ kanngan nga be mantan be lɛ'n be uka su.

⁴² Libna, Etɛr, Asan,

⁴³ Ziftak, Asna, Nɛzib,

⁴⁴ Kɛila, Akzib ɔ nin Maresa. Be ti klɔ dandan ngwlan. Klɔ kanngan nga be mantan be lɛ'n be uka su.

⁴⁵ Ekrɔn ɔ nin lika nin klɔ kanngan nga be mɛntɛn i lɛ'n be o Zida lika nun wie.

⁴⁶ Klɔ dandan'n kwlaa ɔ nin klɔ kanngan nga be mantan Asdɔd bɔ be o Ekrɔn nin Mediterane jenvie'n be afiɛn'n be uka su.

⁴⁷ Asdɔd nin Gaza, ɔ nin lika nin klɔ kanngan nga be mantan be lɛ'n lele b'ɔ fa ju Ezipt nzue ba'n ɔ nin Mediterane i nuan su lɔ'n, be uka su.

⁴⁸ Klɔ dandan nga be o oka lika nun'n mun yɛlɛ Samir, nin Zatir, nin Soko,

⁴⁹ Dana Kirzat-Sana bɔ be flɛ i ekun kɛ Debir'n, nin

⁵⁰ Anab, nin Ɛstɛmɔa, nin Anim, nin

⁵¹ Gozɛn, nin Ɔlɔn, ɔ nin Gilo. Be ti klɔ dandan blu-nin-kun. Klɔ kanngan nga be mantan be lɛ'n be uka su.

⁵² Arab, nin Rima, nin Esean, nin

⁵³ Zanɔm, nin Bɛt-Tapiak, nin Afeka, nin

⁵⁴ Ɔmta, nin Kirzat-Arba bɔ be flɛ i ekun kɛ Ebrɔn'n, ɔ nin Ziɔr. Be ti klɔ dandan ngwlan. Klɔ kanngan nga be mantan be lɛ'n be uka su.

⁵⁵ Maɔn, nin Karmɛl, nin Zif, nin Zita, nin

⁵⁶ Zizreɛl, nin Zɔkdeam, nin Zanɔak, nin

⁵⁷ Kain, nin Gibea, ɔ nin Timna. Be ti klɔ dandan blu. Klɔ kanngan nga be mantan be lɛ'n be uka su.

⁵⁸ Alul, nin Bɛt-Zir, nin Gɛdɔr, nin

⁵⁹ Maarat, nin Bɛt-Anɔt, ɔ nin Ɛltɛkɔn. Be ti klɔ dandan nsiɛn. Klɔ kanngan nga be mantan be lɛ'n be uka su.

⁶⁰ Kirzat-Baal bɔ be flɛ i ekun kɛ Kirzat-Zearim'n, ɔ nin Raba. Be ti klɔ dandan nnyɔn. Klɔ kanngan nga be mantan be lɛ'n be uka su wie.

⁶¹ Klɔ dandan nga be o aawlɛ nun'n yɛlɛ Bɛt-Araba, nin Midim, nin Sɛkaka, nin

⁶² Nibsan, nin Ir-Amelak, ɔ nin An-Gedi. Be ti klɔ dandan nsiɛn. Klɔ kanngan nga be mantan be lɛ'n be uka su.

⁶³ Zidafuɛ'm b'a kwla fuan-man Zɛbisfuɛ nga be tran Zerizalɛm lɛ'n. Ɔ man kɛ e ´se yɛ'n, be nin be yɛ be o klɔ'n su lɛ-ɔ.