Zozie 14 - NYANMIƐN NDƐ'N 1998

Kanaan mɛn'n i cɛlɛ

¹ Asiɛ nga be fa mannin Izraɛl nvle'n Kanaan mɛn'n nun lɔ mun'n yɛ: Nyanmiɛn nyrun jranfuɛ Eleazar, nin Nɛn i wa Zozie, ɔ nin awlobo kpɛnngbɛn'm be kwlaa be yɛ be fa cɛcɛli Izraɛlfuɛ'm bé ti nun ti nun-ɔn.

² Kɛ Anannganman fa kan kleli Moiz'n i su yɛ be niannin yɛ be tuli lika sɔ'm bé wun fɔtɔ nan b'a fa cɛcɛ akpasua ngwlan nin bue'n bé ti nun ti nun-ɔn.

³ Moiz dun mmua fali lika ng'ɔ o Zurdɛn i bue ng'ɔ kpɛ wia afiliɛ lɔ'n fa cɛcɛli akpasua nnyɔn nin bue'n bé ti nun ti nun, ɔ'a man-man Levi akpasua'n sufuɛ'm be wie,

⁴ yɛlɛ kɛ be liɛ nun-man nun. Zozɛf i mma'm be kpaci akpasua nnyɔn: Manase akpasua'n yɛ Efraim akpasua'n. Levifuɛ'm be liɛ nga be nyɛnnin i'n yɛlɛ klɔ dandan ɔ nin lika ng'ɔ mantan be'n. Lika sɔ'n ti be tranwlɛ, nin be nnɛn'm be didiwlɛ, ɔ nin be ninnge kanngan'm be yowlɛ.

⁵ Izraɛlfuɛ'm be cɛli mɛn'n kɛ Anannganman fa kan kleli Moiz'n sa.

Zozie fali Ebrɔn mannin Kalɛb

⁶ Le kun be o lɛ kpɛkuun Zida osu nunfuɛ wie mun b'a a to Zozie Gilgal lɛ. Zɛfine i wa liɛ Kalɛb b'ɔ ti Kɛnaz i awlo nunfuɛ'n, ɔ seli Zozie kɛ: «Kɛ e o Kadɛs-Barnea lɔ'n, a si kɛ Anannganman kannin e nin wɔ e ndɛ kleli Moiz b'ɔ ti Nyanmiɛn sran'n.

⁷ I blɛ nga Moiz b'ɔ ti Anannganman i sufuɛ'n sunmannin min Kadɛs-Barnea lɔ kɛ n ´ko kpla mɛn'n n nian'n, wuun n lɛ afuɛ ablanan. Kɛ n wɔli m bali kusu'n, m boli jasin fɛfɛ kpa n kleli i.

⁸ Sran nga be nin min ɔli'n, be bubuli nzrafuɛ'm bé sa sin, sanngɛ n liɛ'n, n nantili Anannganman i atin'n su kɛ ɔ fata'n sa.

⁹ Le kunngba sɔ nun'n, Moiz boli n kasiɛ nzrafuɛ'n kwlaa be nyrun kɛ mɛn nga n wɔli i nianlɛ'n, be ´fa man min, nan ɔ ´yo e nin min mma nin min anunman mun e liɛ tititi, afin n nantili Anannganman i atin'n su kɛ ɔ fata'n sa .

¹⁰ Kɛ ɔ fin i blɛ nga Anannganman kan ndɛ sɔ'n kleli Moiz lele b'ɔ ´fa ju ndɛ'n, i afuɛ ablanan nin nnun yɛ. Kɛ ɔ ´yo sɔ'n, wuun Izraɛlfuɛ'm be su kpɛ aawlɛ'n. Lele ndɛ Anannganman i fanngan nun min nyin tɛ o su kɛ i bɔbɔ fa kannin'n sa. Kɛ e ´se yɛ'n m'an di afuɛ ablaɔcuɛ-nin-nnun.

¹¹ N tɛ yo kpinndin-kpinndin kɛ blɛ nga Moiz sunmannin min kɛ n ko kpla mɛn'n sa. N tɛ lɛ wunmiɛn kɛ i blɛ sɔ'n nun'n sa. N kun alɛ-ɔ, ɔ yo ye, n di junman-an, ɔ yo ye.

¹² I ti oka lika nga Anannganman boli i kasiɛ kleli min kɛ ɔ ´fa man min'n, fa man min. N seli wɔ kɛ Anakfuɛ bɔ be ti blamiɛn'n be tranwlɛ'n yɛlɛ lɛ. Be klɔ'm be ti dandan yɛ be si bé wun talɛ. Sɛ Anannganman jran mín sin'n n ´fuan be lɛ kɛ ɔ fa kannin'n sa.»

¹³ Zozie yrali Zɛfine i wa Kalɛb i nguan nan ɔ'a fa Ebrɔn klɔ'n ɔ'a mɛn i.

¹⁴ Kɛ e ´se yɛ'n, klɔ sɔ'n ti Kɛnaz akpasua sufuɛ Zɛfine i wa Kalɛb'n i osu nunfuɛ'm be liɛ, nantilɛ b'ɔ nantili sein Anannganman b'ɔ ti Izraɛl Nyanmiɛn'n i atin su'n ti.

¹⁵ Laa, Ebrɔn i dunman yɛlɛ Kirzat-Arba. I bo kle kɛ: Arba klɔ. Laa Anakfuɛ'm be nun'n, Arba yɛ ɔ lɛ nyrun tra be kwlaa-a. Kɛ ɔ yoli sɔ'n, lika'n tɔli bliin, Izraɛlfuɛ'm be deli wunmiɛn alɛ kunlɛ nun.