Zozie 13 - NYANMIƐN NDƐ'N 1998

Lika nga Izraɛlfuɛ'm be nian kwla-man be'n

¹ Kɛ Zozie yoli kpɛnngbɛn'n, Anannganman seli i kɛ: «Wɔ yɛ w'a yo kpɛnngbɛn yɛ, yɛ sanngɛ lika ng'ɔ fata kɛ a fa'n b'ɔ tɛ ka lɛ'n ɔ ti lɔun.

² Lika sɔ mun yɛ: Filistifuɛ'm be lika'm be kwlaa, ɔ nin Gersirfuɛ'm be lika

³ b'ɔ fɛ i Ezipt nuan su, Siɔn nzue ba nuan'n, lele fa ju Ekrɔn b'ɔ o nglo lɔ lika nun'n. Lika sɔ'm be ka be wla Kanaan lika'n nun. Filistifuɛ'm be kpɛnngbɛn nnun'n: Gaza liɛ'n, Asdɔd liɛ'n, Askalɔn liɛ'n, Gat liɛ'n, ɔ nin Ekrɔn liɛ'n, lika sɔ'n ti be liɛ.

⁴ Kanaanfuɛ'm be lika ng'ɔ fɛ Sidɔnfuɛ'm be asiɛ bɔ yɛlɛ Ara lele fa ju Amɔrfuɛ'm be lika'n i nuan lɔ'n, Afɛk lɔ'n, i kwlakwla ng'ɔ o lɛ'n, ɔ fata kɛ a fa.

⁵ I Gɛbal nvle nin o, i Baal-Gad lɔ Liban nin o, i wia afiliɛ lɔ Ɛrmɔn oka wun lɔ nin o,

⁶ lɛfuɛ'm be kwlakwla be ti Sidɔnfuɛ. I kwlakwla ng'ɔ o lɛ'n ɔ fata kɛ a fa be. Kɛ Izraɛlfuɛ'm be ´kɔ be nyrun'n, wuun n ´fuan nvle sɔ'n nunfuɛ mun n ´kɔ. Tu mɛn'n i wun fɔtɔ! Nan fa man Izraɛlfuɛ mun kɛ n kan kleli wɔ'n sa!

⁷ Yɛ cɛcɛ nun man akpasua ngwlan nin Manase akpasua bue nga be nian nyan-man lika'n wie'n.»

Zurdɛn'n i lika ng'ɔ kpɛ wia afiliɛ lɔ i cɛlɛ

⁸ Ribɛn nin Gad akpasua'n ɔ nin Manase akpasua bue klikli'n be nyannin be lika liɛ Zurdɛn i wia afiliɛ lɔ. Moiz b'ɔ ti Anannganman i sufuɛ'n yɛ ɔ mannin be-ɔ.

⁹ Arɔɛr klɔ'n ɔ nin klɔ ng'ɔ o lika tɔnun i afiɛn'n be o be lika liɛ'n i bo ngua lɔ. Lika kpɛtɛkplɛɛ ng'ɔ fɛ i Medɛba fa ju Dibɔn'n ɔ o nun wie.

¹⁰ Amɔrfuɛ'm be famiɛn bɔ be flɛ i Siɔn'n i klɔ ng'ɔ sie be kɛ ɔ fɛ i Ɛsbɔn lele fa ju Amɔnfuɛ'm be lika'n i nuan'n, be o nun wie.

¹¹ Galaad mɛn'n, Gesir nin Maaka lika'n, Ɛrmɔn oka'n ɔ nin Bazan'n kwlaa lele fa to Salka klɔ'n, ɔ o lika sɔ'n nun.

¹² Astarɔt nin Edrei, kan Ɔg b'ɔ ti Rɛfafuɛ be kasiɛn be nun kun'n dili i famiɛn'n lɛ'n ɔ o be lika'n nun. Moiz kwlali nvle sɔ nunfuɛ mun nan ɔ'a de be lika'n,

¹³ sanngɛ Izraɛlfuɛ'm b'a fuan-man Gesir nin Maakafuɛ mun. Ɔ man lele ndɛ i sɔ sran'm be tɛ tran Izraɛl lɔ.

¹⁴ Levi akpasua'n i ngunmin yɛ b'a mɛn-mɛn i asiɛ'n wie-ɔ. I lika liɛ ng'ɔ ko nyɛn i'n yɛlɛ tɛ nnɛn nga be yrɛ i sin su be man Anannganman b'ɔ ti Izraɛl Nyanmiɛn'n, kɛ Anannganman bɔbɔ kannin sɔ-ɔ.

¹⁵ Lika nga Moiz fa mannin Ribɛn akpasua su awlobo mun'n

¹⁶ i nuan su yɛlɛ Arɔɛr klɔ'n b'ɔ o Arnɔn nzue ba nuan'n ɔ nin klɔ ng'ɔ o kongo i afiɛn'n. Lika kpɛtɛkplɛɛ ng'ɔ sin yia Medɛba'n,

¹⁷ ɔ nin Ɛsbɔn'n, nin lika kpɛtɛkplɛɛ i su klɔ ngba: Dibɔn, nin Bamɔt-Baal, nin Bɛt-Baal-Mɛɔn, nin

¹⁸ Zaaz, nin Kɛdemɔt, nin Mefat, nin

¹⁹ Kiriataim, nin Sibma, ɔ nin Zerɛt-Asasar b'ɔ o kpɔlɛ ng'ɔ o kongo'n su'n,

²⁰ Bɛt-Pɛɔr, Pisga oka'n i ndroliɛ'n ɔ nin Bɛt-Zɛsimɔt,

²¹ Siɔn b'ɔ ti Amɔr famiɛn'n b'ɔ trannin Ɛzbɔn'n, kan ɔ di i famiɛn liɛ juli'n ɔ uka lika kpɛtɛkplɛɛ'n su klɔ'm be ngba bé su. I kwlaa ng'ɔ o lɛ'n wo Ribɛn lika'n nun. Moiz kwlali Siɔn ɔ nin Madian kpɛnngbɛn nga be su Siɔn'n bɔ be tran Siɔn mɛn'n nun lɔ'n. Be dunman mun yɛ: Evi, Rekɛm, Sir, Ir ɔ nin Reba.

²² Bɛɔr i wa Balaam b'ɔ ti wunnzue yifuɛ'n, be kwlakwla yɛ Izraɛlfuɛ'm be kunnin be i sɔ blɛ nun nin-ɔn.

²³ Ribɛn akpasua sufuɛ'm be lika'n i nuan yɛlɛ Zurdɛn nzue ba'n. Klɔklɔ nga b'a bobo be dunman lɛ'n be yɛ be ti Ribɛn akpasua su awlobo kunngun'm be lika liɛ nin-ɔn.

²⁴ Lika nga Moiz fa mannin Gad akpasua su awlobo kunngun mun, yɛlɛ

²⁵ Zaɛzɛr, nin Galaad klɔ'm be ngba, nin Amɔn i osu'n nun sran'm be mɛn'n i bue bɔ i nuan yɛlɛ Arɔɛr b'ɔ o Raba i ndɛnman lɛ'n.

²⁶ Ɔ fɛ i Ɛsbɔn ju Ramat-Mizpe nin Bɛtɔnim, yɛ ɔ fɛ i Maanaim fa ju Lɔdɛbar lika'n nun lɔ.

²⁷ Bɛt-Aram, nin Bɛt-Nimra, nin Sikɔt ɔ nin Zafɔn, klɔ nga lɛ'm be o Zurdɛn'n i kongo'n nun lɔ. Klɔ sɔ'm be kwlaa be ti Siɔn b'ɔ trannin Ɛsbɔn'n, i famiɛn diwlɛ lika. Yɛ i kwlaa sɔ'n wo Gadfuɛ'm be lika nun. Lika sɔ'n wo Zurdɛn i bue ng'ɔ kpɛ wia afiliɛ lɔ'n nun. Zurdɛn'n ti i awɛ lele fa ju Zenezarɛt fɛtɛ'n nuan nglo lɔ lika'n nun.

²⁸ Klɔklɔ'n kwlaa nga be bobo be dunman lɛ'n be yɛ be ti Gad akpasua su awlobo kunngun'm be liɛ-ɔ.

²⁹ Lika nga Moiz fa mannin Manase akpasua bue'n i awlobo mun,

³⁰ i ngua lɔ'n i nuan yɛlɛ Maanaim, Bazan nin Ɔg b'ɔ ti Bazan famiɛn'n i mɛn'n wunmuan, ɔ nin Zair i klɔ kanngan ablesiɛn'n be o lika sɔ'n nun.

³¹ Galaad mɛn'n i bue, ɔ nin Astarɔt klɔ'n nin Edrei klɔ'n, be fa lika sɔ'n kwlaa mannin Manase akpasua nga bé nannan yɛlɛ Makir'n. Astarɔt nin Edrei be ti Bazan mɛn'n i famiɛn'n bɔ be flɛ i Ɔg'n i famiɛn klɔ mun.

³² Moiz fali lika ng'ɔ o lɛ mun kwlakwla mannin, i nun b'ɔ o Zeriko nin Zurdɛn'n be wia afiliɛ lɔ'n. I blɛ sɔ'n nun'n, wuun ɔ o Moab lika kpɛtɛkplɛɛ'n nun lɔ.

³³ Ɔ'a fa-man lika fi ɔ'a man-man Levi akpasua sufuɛ mun. Ɔ seli be kɛ be liɛ nga be ko nyɛn i'n yɛlɛ Anannganman b'ɔ ti Izraɛl Nyanmiɛn'n i sulɛ.