Zozie 11 - NYANMIƐN NDƐ'N 1998

Merɔm lɔ alɛ'n

¹ Kɛ Zabɛn'n b'ɔ ti Azɔr famiɛn'n tili i kɛ Zozie ɔ'a fa mɛn'n, ɔ sunmannin sran Ɔbab b'ɔ ti Madɔn famiɛn'n, ɔ nin Simrɔn famiɛn'n ɔ nin Aksaf famiɛn'n bé sin.

² Ɔ sunmannin sran ekun famiɛn nga be o oka-oka lika'm be nun lɔ mɛn i nglo-nglo lɔ'n ɔ nin Zurdɛn kongo nun Kinerɛt fɛtɛ'n i bo ngua lɔ'n bé sin. Ɔ sunmannin wie ekun be nga be o lika kpɛtɛkplɛɛ'n nun lɔ'n ɔ nin be nga be o Dɔr lika bɔ o nzue nuan lɔ'n i wia afiliɛ lika lɔ'n nun bé sin. Dɔr klɔ'n wo oka-oka lika'm be nun.

³ Ɔ wunnin Kanaanfuɛ nga be o Zurdɛn'n i lika ng'ɔ kpɛ wia afiliɛ nin i lika ng'ɔ kpɛ wia atɔliɛ lɔ'n bé wun. Amɔrfuɛ, nin Ɛtfuɛ, nin Ferezfuɛ, nin Zɛbisfuɛ nga be tran oka-oka lika'm be nun'n, ɔ nin Evfuɛ nga be tran Ɛrmɔn bo lɔ Mizpa lika nun lɔ'n, ɔ wunnin be wun ekun.

⁴ Famiɛn sɔ'm be nin be alɛ kunfuɛ'm be sɔnnin kɛ jenvie nuan aunnyan sa, yɛ be nnɛn kpanngɔ nin be kakaklolo'm be sɔnnin kpa.

⁵ Be kan boli nun nan b'a ko bo be nanmue Merɔm nzue ti wun lɛ, be waan be nin Izraɛlfuɛ'm be ´kun.

⁶ Anannganman seli Zozie kɛ: «Nán sro be, ainman dɔ kunngba nga su'n, wuun m'an yi be kwlaa m'an man wɔ, wuun Izraɛlfuɛ'm bé sa ɔ'a kan be, be lɛ-man nguan. Kpɛ be nnɛn kpanngɔ'm be ja nun ndin'm be nun! Wɔ be kakaklolo'm be nun!»

⁷ Zozie nin i sonja'm be ko fuli be nun Merɔm nzue ti wun lɔ.

⁸ Anannganman fali be wlali Izraɛlfuɛ'm bé sa nun, be kwlali be, be suli be su lele juli Sidɔn klɔ dan'n i nglo lɔ, ɔ nin Misrɛfɔt Maim lɔ, ɔ nin Mizpa kongo nun lɔ wia afiliɛ lika'n nun lɔ. Be kwlali be mlɔnmlɔn, b'a yaci-man sran ba kun sa lɛ.

⁹ Nga Anannganman kan kleli Zozie'n yɛ ɔ yoli-ɔ. Ɔ kpɛli nnɛn kpanngɔ'm be ja nun ndin'm be nun, yɛ ɔ wɔli kakaklolo'm be nun.

Azɔr klɔ'n i falɛ

¹⁰ Kɛ Zozie ´sɛ i sin'n, ɔ fali Azɔr b'ɔ ti mɛn nga be o nglo lɔ lika nun'n be famiɛn klɔ'n. Ɔ kunnin i su famiɛn'n.

¹¹ Yɛ ɔ man be nunnunnin klɔ'n sufuɛ'm be ngba, sran ba kun sa ɔ'a ka-man lɛ, yɛ be wɔli Azɔr klɔ'n nun.

¹² Zozie kwlali famiɛn nga be ju guɛli i su'n be kwlakwla. Ɔ fali be klɔ mun. Ɔ kunnin famiɛn mun nin klɔfuɛ mun kɛ Moiz b'ɔ ti Anannganman i sufuɛ'n seli be kɛ be yo'n sa.

¹³ Sanngɛ Izraɛlfuɛ'm b'a wɔ-man klɔ nga be o kpɔlɛ'm be su'n be nun san Azɔr. I liɛ'n Zozie man be wɔli nun.

¹⁴ Izraɛlfuɛ'm be fali ninnge ɔ nin nnɛn nga be wunnin i klɔ sɔ'm bé su'n, sanngɛ be kunnin klɔ'n sufuɛ mun, sran fi a ka-man.

¹⁵ Alɛ nun'n, ndɛ nga Anannganman kan kleli Moiz'n, Zozie niannin su yoli i kɛ ɔ fata'n sa.

¹⁶ Zozie fali be mɛn sɔ'n i ngba: oka-oka lika nin o, ngua lɔ lika nin o, Gozɛn lɔ lika nin o, lika kpɛtɛkplɛɛ nin o, Zurdɛn i kongo lika nun lɔ nin o, ɔ nin nglo lɔ lika kpɛtɛkplɛɛ nin o, nin nglo lɔ oka-oka lika nin o.

¹⁷ Ɔ kwlali famiɛn nga bé mɛn'n wo oka ti su trɔnmintrɔnmin ɔ nin Baal-Gad lika'm be afiɛn nun'n. Oka sɔ'n mantan Seir lika'n b'ɔ o ngua lɔ'n. Baal-Gad kusu o Liban kongo nun lɔ, Ɛrmɔn oka'n i bo ngua nglo lɔ lika'n nun lɔ. Ɔ kunnin i sɔ famiɛn liɛ'm be kwlakwla.

¹⁸ Alɛ ng'ɔ nin be kunnin'n ɔ cɛli.

¹⁹ Alɛ kunlɛ nun yɛ be kwlali klɔ nga be o lɛ'n be kwlakwla-a, san Evfuɛ nga be tran Gabaɔn lɔ'n be yɛ be nin Izraɛlfuɛ'm be dili anuansɛ-ɔ.

²⁰ Afin Anannganman man mɛn sɔ nunfuɛ'm be waan san alɛ yɛ be nin Izraɛlfuɛ'm be ´kun-ɔn. I sɔ'n ti, Izraɛlfuɛ'm be kusu be kunnin be kwlakwla kɛ Anannganman fa kan kleli Moiz'n sa.

²¹ I blɛ kunngba'n nun, Zozie nin Anakfuɛ nga be tran oka'm be su Ebrɔn lɔ'n, nin Debir lɔ'n, ɔ nin Anab lɔ'n, nin Zida'n, ɔ nin Izraɛl oka-oka lika'm be nun'n be kunnin. Ɔ nunnunnin be klɔ'n mlɔnmlɔnmlɔn.

²² Anakfuɛ ba kun sa ɔ'a ka-man Izraɛl mɛn'n nun san Gaza, nin Gat, ɔ nin Asdɔd lɔ yɛ wie kali-ɔ.

²³ Wafa nga Anannganman kan kleli Moiz kɛ ɔ `fa mɛn sɔ'n, i su yɛ Zozie nian fali-ɔ. Ɔ fa cɛcɛli Izraɛl akpasua'm be kwlaa, i sin yɛ Izraɛlfuɛ'm be deli wunmiɛn alɛ kunlɛ nun-ɔn.