Zozie 1 - NYANMIƐN NDƐ'N 1998

Zozie i Moiz kacilɛ ndɛ

¹ Kɛ Anannganman i sufuɛ Moiz wuli'n , Anannganman seli Nɛn i wa Zozie b'ɔ ti Moiz i gbanflɛn'n kɛ:

² «Min sufuɛ Moiz yɛ ɔ'a wu yɛ. I ti, siesie ɔ wun nan a nin Izraɛl nvle'n amun `kpɛ Zurdɛn nzue'n b'ɔ o yɛ'n, amun `wɔ mɛn nga n su wa fa man Izraɛlfuɛ mun'n i nun.

³ Lika kwlaa nga bɔ amún ja tia lɛ'n, n ´fa man amun kɛ n kan kleli Moiz'n sa.

⁴ Amun lika'n ɔ ´fɛ i aawlɛ flɛnnɛn b'ɔ o ngua wa yɛ'n lele ´fa ju Liban b'ɔ o nglo lɔ lika'n nun'n i nun. Ɔ ´sin nzue ba dan bɔ be flɛ i Efrat i nuan wia afiliɛ lɔ ´fa sin Ɛtfuɛ'm be mɛn'n nun lele ´fa ju wia atɔliɛ lɔ jenvie dan, bɔ be flɛ i Mediterane'n i nuan. I kwlaa ng'ɔ o lɛ'n ti amun liɛ.

⁵ Sran fi su kwla jran-man ɔ nyrun lele san ɔ́ wie. N wa jran ɔ́ sin kɛ n jrannin Moiz i sin'n sa. N su kpɔci-man wɔ le. N ´jran ɔ́ sin titi.

⁶ Jran kekle, yo yakpafuɛ, afin wɔ yɛ man nvle ng'ɔ wa nyan like nga m boli amun nannan'm be kasiɛ kɛ n ´fa man be nin-ɔn.

⁷ Jran kekle, ?A ti? Yo yakpafuɛ. Nian mmla nga min sufuɛ Moiz fa mannin wɔ'n i kwlaa su. Nán nian bɛ, nán nian fama. Sɛ a yo sɔ'n, like kwlaa nga bɔ a yo'n ɔ ´yo ye.

⁸ Mmla ng'ɔ ti klɛwa fluwa nga nun'n, kan flan nun. Bu i akunndan wia su nin kɔnguɛ, kɛ ɔ ´yo nan w'a fa su sɛsɛsɛ'n ti. Sɛ a yo sɔ'n yɛ like nga a yo'n ɔ ´yo ye-ɔ.

⁹ Nán ɔ́ wla fi ndɛ nga n kan kleli wɔ'n su: jran kekle, yo yakpafuɛ, nán srɛ kun wɔ, nán ɔ klun titi wɔ, afin min Anannganman ɔ Nyanmiɛn'n lika kwlaa nga a ´kɔ'n n jin ɔ́ sin.»

Zozie boli Izraɛlfuɛ'm be sielɛ bo

¹⁰ Yɛ Zozie seli sonja kpɛnngbɛn mun kɛ

¹¹ be `wlan nanmue nun be `se Izraɛlfuɛ'm be kɛ: «Amun `tɔn aliɛ be sie, afin ɔ ka le nsan amun wa kpɛ Zurdɛn'n, amun ´ko fa mɛn nga Anannganman amun Nyanmiɛn'n waan ɔ ´fa man amun'n.»

¹² Yɛ Zozie seli Ribɛn akpasua sufuɛ mun nin Gad akpasua sufuɛ mun'n, nin Manase akpasua'n i bue kun sufuɛ mun be kɛ:

¹³ «Man amun wla kpɛn su kɛ Anannganman i sufuɛ Moiz seli amun kɛ: ‹Anannganman amun Nyanmiɛn'n fali mɛn ng'ɔ o yɛ'n mannin amun kɛ amun tran nun.›

¹⁴ Amún yi mun, amún bo mma mun, amun nnɛn'm be wa ka lika nga Moiz mannin amun Zurdɛn i bue kun wa'n nun. Sanngɛ amun kwlaa nga b'a jran alɛ kunlɛ'n, amun `fa be alɛ ninnge mun, amun `dun amun niaan'm be nyrun nan amun `uka be,

¹⁵ lele san be ´fa mɛn nga Anannganman fa man be nzue i bue kun lɔ'n. Bé wun ´jɔ be wie kɛ amun sa ka nan amu'an sa be sin mɛn nga Anannganman i sufuɛ Moiz fa mannin amun Zurdɛn'n i bue nga su'n nun.»

¹⁶ Be tɛli Zozie su kɛ: «Ndɛ kwlaa nga a kan'n, e ´fa su. Kan kwlaa nga a sunman ye'n, e ´kɔ.

¹⁷ Kɛ é nyin fa yili Moiz'n, yɛ é nyin ´fa yi wɔ-ɔ. Nga e srɛ'n, yɛlɛ kɛ man Anannganman ɔ Nyanmiɛn'n jran ɔ́ sin kɛ ɔ jrannin Moiz sin'n sa.

¹⁸ Sran kwlaa ng'ɔ yo nyin kekle ɔ su'n, bɔ a se i sa-a, ɔ ti-man'n, e ´kun i. Ɔ li, jran kekle, yo yakpafuɛ.»