Zonas 4 - NYANMIƐN NDƐ'N 1998

Anannganman i aunnvuɛ silɛ'n i bo

¹ I sɔ'n ɔ'a jɔ-man Zonas klun mlɔnmlɔn. Ɔ fali ya dan kpa.

² Yɛ ɔ srɛli Anannganman-an. Ɔ seli kɛ: «?Ee, Anannganman, nán nga bɔ n wo min mɛn'n nun lɔ n kannin'n cɛ yɛ ɔ o yɛ? I sɔ'n bɔ min waan nán ɔ ju'n i ti yɛ min waan n ´wanndi n kɔ Tarsis nin-ɔn. Afin n si kɛ a ti Nyanmiɛn kun bɔ a ti kpa, a si aunnvuɛ, a fa-man ya finfin, ɔ klun-ufue'n ti dan. Sɛ a gugu kɛ a ´yo sa yaya wie'n, ɔ cɛ-man nan w'a kaci aniɛn .

³ Nga kwlaa ti kpɛ kpo kun min kpɛkun. Kɛ n ko tran nguan nun'n, ɔ flunman kɛ n wu .»

⁴ Anannganman'n usɛli i kɛ: «?Ya nga a fɛ i yɛ'n ɔ ti i su?»

⁵ Zonas fiteli nan ɔ'a ko tran klɔ'n i wia afiliɛ lɔ. Ɔ kplannin i kpata kun, ɔ trannin i fɔnvɔ'n bo. I waan ɔ ´tran lɛ nian sa ng'ɔ wa ju klɔ'n su'n.

⁶ Anannganman man waka wie fifili lɛ, ɔ man Zonas nyannin fɔnvɔ. I waan ɔ ´yo sɔ nan wia'n ɔ'a bo-man Zonas i ti'n su nan i ya'n ɔ'a jɔ'n ti. Waka sɔ'n man Zonas i klun jɔli dan kpa.

⁷ I aliɛ'n b'ɔ ´cɛn'n, Nyanmiɛn man kakaa kun ɔ wa sannin waka'n nan waka'n ɔ'a wu.

⁸ Wia'n fili, Anannganman man aunngban wie fitali. Aunngban sɔ'n fin wia afiliɛ lɔ, i sɔ'n ti ɔ lo kɛ sin sa. Wia sɔ'n boli Zonas kekle kpa. Ɔ ka kaan nan i nyrun ɔ'a ´blu. Yɛ Zonas waan: «Kɛ n ko tran nguan nun'n, ɔ flunman kɛ n `wu!»

⁹ Nyanmiɛn usali Zonas kɛ: «?Ya nga a fɛ i waka'n ti yɛ'n, kɛ a nian'n ɔ ti i su?» Ɔ tɛli i su kɛ: «Ɛɛn! N kpa'n n waan n ´fa ya lele nan wie'n `kun min.»

¹⁰ Yɛ Anannganman'n seli i kɛ: «?Nian, waka bɔ w'a fɛ-mɛn i wun, bɔ nán wɔ yɛ a tali'n, b'ɔ fifili kɔnguɛ kun bɔ kpɛkuun kɔnguɛ kun ekun b'ɔ ´ju-ɔ ɔ'a wu'n, ɔ waan a ´koko i.

¹¹ Yɛ Niniv b'ɔ ti klɔ dan, bɔ sran akpi-akpi ya sran akpi-akpi ablaɔn (120.000) bɔ be wun-man sa wlɛ'n, be o su'n, ɔ nin nnɛn beblebe'n, yɛ min yɛ n ko si-man be aunnvuɛ-ɔ?»