Zonas 2 - NYANMIƐN NDƐ'N 1998

Zonas i Nyanmiɛn srɛlɛ

¹ Kɛ ɔ ´yo sɔ'n, wuun Anannganman ɔ'a sunman jue dan kun kɛ ɔ wa mɛn Zonas. Ɔ man Zonas trannin jue'n klun lɔ cɛn ba klonglo nsan .

² Kɛ Zonas o jue'n i klun lɔ'n , ɔ srɛli Anannganman i Nyanmiɛn'n seli kɛ:

³ «Anannganman, kɛ sa kekle dan'n tɔli min su'n, n kpan flɛli wɔ yɛ a tɛli min su. Blɛ bɔ n jrali n juli blɔlɔ lɔ'n, n kpan flɛli wɔ, yɛ a tili min aniɛn'n sakpa.

⁴ A to min yili jenvie'n nun, a to min yili nzue dan sɔ'n i bunman'n nun, yɛ ɔ kpalo min kɔ wa, ɔ kpalo min kɔ wa.

⁵ Min klun wa min waan: ‹B'a kan mín bo ɔ wun mmua. Sanngɛ n waan n ´wun ɔ sua'n b'ɔ ti ɔ liɛ klonglo'n ekun.›

⁶ Nzue'n ju min kɔmin nun, jenvie'n kata min su kplu! Nyanman nga be o jenvie'n bo lɔ'n be blabla mín ti'n wun.

⁷ N jrali lele n juli kan oka'm be bo'n fin lɔ'n. Blɔlɔ lɔ anuan dan'n nyinnin min su mlɔnmlɔn. Sanngɛ Anannganman min Nyanmiɛn, wɔ man n fin ngblɔn sɔ'n nun n fiteli sa bɔ cɛ, like fi sa ɔ'a yo-man min.

⁸ Blɛ bɔ n wuli wieli'n, bɔ wunmiɛn fi nun-man min nun kun'n, mín nyin kpɛnnin wɔ su. Ɔ kusu, kɛ a o ɔ́ sua'n b'ɔ ti ɔ liɛ klonglo'n nun lɔ'n, a tili min srɛwa'n.

⁹ Sran nga amuɛn bɔ be bɔn-man like'n yɛ be sɔ be'n, be bɔbɔ man a kwla si-man be aunnvuɛ.

¹⁰ N liɛ'n kɛ n ´to ɔ manmanlɛ jue'n, wuun n ´yi sraka m ´man wɔ. Yɛ ndɛ nga n kannin'n, n wa yiɛ i nuan. Nanwlɛ, delɛ'n fin Anannganman'n.»

¹¹ Kɛ ɔ yoli sɔ'n yɛ Anannganman man jue'n fili Zonas guali cenje'n su-ɔ.