Zonas 1 - NYANMIƐN NDƐ'N 1998

Zonas i Anannganman bo wanndilɛ

¹ Cɛn kun Anannganman kannin ndɛ yɛ'n kleli Amitai i wa Zonas. Ɔ seli i kɛ:

² «Jaso kɔ Niniv, kɔ klɔ dan sɔ'n su lɔ. Kan ndɛ cinnjin ng'ɔ o yɛ'n weiin kle lɔfuɛ mun: Ninivfuɛ'm be nzuɛn tɛ'n ɔ'a flan min.»

³ Sanngɛ Zonas ´kunndɛ wanndi Anannganman bo ´kɔ Tarsis. Ɔ ko juli Zafo, ɔ ´nian-an, mmeli kun su kɔ Tarsis. Ɔ tuali mmeli'n i kalɛ, nan ɔ'a wlu nun yɛ fuauun, ɔ nin be bɔ be ´kɔ Tarsis'n be kɔlɛ nun-ɔn . I waan ɔ wanndi Anannganman i bo.

⁴ Anannganman man aunngban dan kun fitali jenvie'n su, kɛ e ´ijɔ wa-a jenvie'n yɛ ɔ su bo yɛ. Nzue'n su wa bubu mmeli'n nun.

⁵ Mmeli'n i kanfuɛ'm be klun titili be kpa. Ɔ lɛ-man be nun kun bɔ ɔ'a jrɛn-mɛn i amuɛn'n su-ɔ. Trɔ nga be o mmeli nun'n, be to be guali nzue'n nun kɛ ɔ ´yo nan mmeli'n ɔ'a yo fokofoko'n ti. Kɛ ɔ ´yo sɔ'n, wuun Zonas ɔ'a jra mmeli'n i bo mmua lɔ ɔ'a lafi kpa bliin.

⁶ Yɛ mmeli i su kpɛn'n wunnge i wun lɛ-ɔ. Ɔ usali Zonas kɛ: «Ai! ?Ɔ yo sɛ yɛ a su lafi yɛ? Jaso jran wɔ amuɛn'n su, sɛ ɔ ´jran é sin nan e ko wu-man o!»

⁷ Yɛ mmeli'n i kanfuɛ'm be seli bé wun kɛ: «Amun man e tu fɔtɔ, nan e wun sran nga ti yɛ man sa kekle yɛ'n ɔ'a nyan ye'n.» Be ´tu fɔtɔ nin-ɔn ɔ'a tɔ Zonas su.

⁸ Yɛ mmeli'n i kanfuɛ'm be usali Zonas kɛ: «?Nja, wɔ bɔ yɛ man sa kekle nga ɔ'a tɔ e su'n, a su kɔ nguɛ yolɛ? ?A ti nvle onin nunfuɛ? ?Be flɛ ɔ mɛn'n sɛ?»

⁹ Zonas tɛli be su kɛ: «N ti Ebre, n su Anannganman b'ɔ ti nglo lɔ Nyanmiɛn'n. I yɛ ɔ boli jenvie'n nin asiɛ nin-ɔn.»

¹⁰ Kɛ ɔ kɛnnin i kɛ ɔ su wanndi Anannganman'n i bo'n bɔ mmeli'n i kanfuɛ'm be tili'n, srɛ dan kpa kunnin be. Be seli kɛ: «Cuekee! W'a yo-mɛn i kpa mlɔnmlɔn!»

¹¹ Kɛ ɔ ´yo sɔ'n, wuun jenvie'n bo-man aɔwi. Yɛ be usali Zonas kɛ: «?E `yo wɔ sɛ nan jenvie'n ɔ'a go nun?»

¹² Zonas waan: «Sɛ amun ´wun kɛ jenvie'n ´go nun'n, san amu'an fa min b'a to b'a yi nun. Afin n si jrɛin kɛ min ti yɛ aunngban dan nga su kle amun yalɛ lɛ-ɔ.»

¹³ Mmeli'n i kanfuɛ'm be waan wuun be kan mmeli'n be ko si ce'n bo lɔ. Sanngɛ be ju lɔ-ɔ ɔ ju-man, afin kɛ ɔ ´yo sɔ'n, wuun blɛli yɛ b'a se kɛ jenvie'n bo kekle kpa-a.

¹⁴ Yɛ be kpan flɛli Anannganman kɛ: «Anannganman, nán e yɛ e yoli-ɔ. E ´srɛ wɔ kpa ti-ɔ, nán nian kɛ y'a kun bian nga bɔ ɔ'a yo-man e sa yɛ'n ti man e wu. Yɛlɛ kɛ nga bɔ ɔ waan a ´yo'n yɛ a yoli-ɔ.»

¹⁵ Kɛ ɔ yoli sɔ'n, yɛ be mannin Zonas su nan b'a to i b'a yi i jenvie'n nun. Kpɛkuun bliin, jenvie'n kali lɛ jrannin, i kejelɛ'n dan'n wieli.

¹⁶ Srɛ dan kpa kunnin mmeli'n i kanfuɛ mun Anannganman ti nan b'a yi sraka b'a mɛn i nan b'a ta nda kɛ be ´yo like be mɛn i.