Zoɛl 2 - NYANMIƐN NDƐ'N 1998

Nyanmiɛn i cɛn'n ɔ'a mantan koko

¹ An `bo awɛ Siɔn lɔ, an `bo ndolo min oka'n su lɔ. Mɛn nga nunfuɛ mun, an `usu, afin Anannganman'n i cɛn'n wo balɛ, ɔ'a mantan koko .

² Cɛn sɔ'n ɔ ´yo aosin tritritri, cɛn sɔ'n ɔ ´yo nzue mlanlɛ lika sa tuun yɛ ɔ yo bɔlɛ ufue lika sa munnduun. Kakaa fa fa nga be ba'n, be sɔnnin kpa, be yo wlɛ. Kɛ be ´ba'n, lika'n lu kɛ sɛnzɛ'n su tɔ oka'm be su sa. I sɔ like liɛ'n, be nian wun-man wie asiɛ'n su le, i kusu be su ko wun-man wie asiɛ'n su le mlɔnmlɔn kun.

³ Like kwlaa nga be to i'n, be saci i, kpɛkuun bé sin wa lika wlolo'n ngbɛn yɛ ɔ ka lɛ kɛ sin wie bɔ ɔ'a yra lika ɔ'a sin'n sa. I blɛ nga bɔ be nian sin-man'n, asiɛ'n su lika'n ɔ ti bo kɛ Edɛni liɛ'n sa. Sanngɛ kɛ be sinnin'n, be sin wa'n ɔ yoli nyrɛnnɛn ngbɛn. Afin lika ng'ɔ kali bé sin, ɔ yoli kɛ aawlɛ flɛnnɛnnɛn sa. B'a yaci-man like fi lɛ.

⁴ Be bɔbɔ wunmuan'n be ti kɛ nnɛn kpanngɔ sa cɛ. Be wanndi kɛ alɛ kunfuɛ yɛ be ti nnɛn kpanngɔ su be su kɔ sa.

⁵ Be fin oka kun su be tu be kpɛn kun su. A ti be ngan sa-a, ɔ waan wuun alɛ kunlɛ kakaklolo mun yɛ be su kpla-a, annzɛ sin wie yɛ ɔ'a tɔ ijre kee wie nun yɛ ɔ su tɛtɛ-ɔ. Kɛ be ´ba sa-a ɔ waan wuun alɛ kunfuɛ kpakpa'm wie bɔ b'a lɔngɔ su be su kɔ alɛ kunlɛ-ɔ .

⁶ Kɛ be ´ba'n, sran'm be usu sa tutututu, kpɛkuun be nyrun'n ɔ ka lɛ kacili srɛ bɔ kun be'n ti.

⁷ Be wanndi kɛ safunyrɛn'm be sa, be fu klɔ'n wun talɛ'n su kɛ alɛ kunfuɛ mun sa. Nga fɛ i nyrun atin liɛ trele, nga fɛ i nyrun atin liɛ trele, be kpaci-man.

⁸ Wie fi su-mɛn i wiengu bo, sran nga nanti i atin liɛ'n su, nga nanti i atin liɛ'n su. Lika nga be sin nun lɛ-ɔ ɔ yo-man ye'n, be fa bé wun be tin lɛ fii be sin, like fi kwla jran-man be.

⁹ Be sanndi klɔ'n nun. Be fu klɔ'n i wun talɛ'n su be wanndi su. Klɔ'n wun talɛ'n, be fu su. Be wluwlu sua'm be nun, be sin fenɛtri'm be nun kɛ awiefuɛ'm be sa.

¹⁰ Kɛ be ´ba'n, asiɛ'n keje, nyanmiɛn'n b'ɔ la nglo lɔ plaii yo kɛ ɔ su wa bu tɔ sa, wia'n kpan-man kun, anglo kusu ta-man kun, be wun-man nzraama'm be wun kun .

¹¹ Kan bɔ Anannganman i alɛ mma'm be sin lɛ'n, ɔ kpan dun mmua be nyrun. Alɛ mma sɔ mun bɔ like nga i waan be `yo'n yɛ be yo'n, be sɔnnin, be kunngba'n be yo sro ekun. Anannganman i cɛn sɔ'n ti kekle kpa, ɔ yo sro. ?Wan yɛ ɔ kwla suɛn i bo-ɔ ?

Anannganman waan Izraɛlfuɛ'm be `kaci be nzuɛn'n

¹² Anannganman wan yoo: «An `sa amun sin bla mín sin. Kɛ ɔ o yɛ'n, i blɛ nian sin-man. Amun `tu amun klun bla, an `ci nglɛmun, an `sun, yɛ an `kpata min.»

¹³ Amún wun tralɛ'm be nun titilɛ'n ti ngbɛn, amun anwlɛn ba'n yɛ ɔ fata kɛ an `kaci i-ɔ. An `kaci i nan an `sa amun sin Anannganman amun Nyanmiɛn'n i sin. I klun ti ufue, ɔ si aunnvuɛ. Ɔ fa-man ya ndɛndɛ. I klun-ufue liɛ'n gua lɛ ngbɛn yɛ be isa-a. Kɛ ɔ ko fua kɛ ɔ fa nyrɛnnɛn yi sran kun su'n, kpɛkuun i kunngba'n i sa sin ɔ'a bubu i, ɔ yo-mɛn i kun.

¹⁴ Atrɛkpa-a, ɔ ´kwla kaci aniɛn, kpɛkuun ɔ ´yo amun ye. Kpɛkuun siɛn'n, an ´kwla fa ble nin nzan be ko mɛn i.

Anannganman waan Izraɛlfuɛ'm be `sun flɛ i

¹⁵ An `ko bo awɛ Siɔn lɔ be `flɛflɛ sran mun nan an `yia. An `yia nan an `sie nglɛmun cilɛ blɛ kun.

¹⁶ Amun `flɛflɛ mɛn mma'm be kwlaa nan an `yia Nyanmiɛn dunman nun. Kpɛnngbɛn mun o, gbanflɛn mun o, talua mun o, ba kanngan nga be tɛ nɔn nyɔnflɛn mun o, an `flɛ be kwlaa'n man be yia. Yasua nin bla nga blɛ yɛ b'a ja'n, man be fin be atɔnvlɛ sua'n nun be fite.

¹⁷ Man Nyanmiɛn nyrun jranfuɛ'm bɔ be jrɛn i nyrun'n, be sun i sua'n i nyrun gbaun'n nin i sɔwlɛ'n be afiɛn'n nun lɛ. Man be srɛ Nyanmiɛn se kɛ: «Anannganman, ɔ sran mun yɛlɛ ye, si e aunnvuɛ. Ɔ liɛ yɛlɛ ye, nán yo man e wun nyannzuɛn nan nvle kun'm be nunfuɛ'm be srisri e be se kɛ: ‹?Ai, be Nyanmiɛn liɛ kpa'n, ɔ o nin?› »

Anannganman tɛli be srɛlɛ'n su

¹⁸ Anannganman klo i mɛn'n dan, i sran'm be yo i annvɔ.

¹⁹ Ɔ tɛli be su seli kɛ: «N ´fa ble, nin nzan, ɔ nin ngo m ´blɛ amun ekun, yɛ be ´bobo amún su. N su yaci-man amun lɛ, amun sokpa-man nvle kun nga'm be nyrun kun.

²⁰ Amun kpɔfuɛ nga be fin mɛn'n i nglo lɔ be bali'n, n ´fuan be. N ´kankan be bo ´kɔ mmua, be ´kɔ aawlɛ flɛnnɛn'n i wun lɔ. Be nga be dun mmua be nyrun'n, n ´su be n ´guɛ i jenvie ng'ɔ ti njin nzue klakla'n nun. Be nga be o siɛn'n, n ´su be n ´guɛ i jenvie bɔ be flɛ i Mediterane'n nun. Be fuɛn'm be ´bɔn tɛ, be bɔnlɛ'n ɔ ´de lika'n kwlaa.» Be nga be kleli amun nyrɛnnɛn'n, kɛ be awieliɛ'n ɔ ´wie be kɛ nga sa .

²¹ Asiɛ'n sufuɛ mun, nán amun koko kun, man amun klun jɔ. Afin Anannganman'n su di junman dandan, i ti, man amún wun blibli amun.

²² Nnɛn mun, nán amun koko kun, aawlɛ'n nun lɔ ijre nga an di'n be su fu. Waka'm be su su mma, figie nin vinyi'm b'a su kpa.

²³ Siɔnfuɛ mun amun kusu, man amun klun jɔ, man amún wun blibli amun Anannganman amun Nyanmiɛn'n i dunman nun. Afin kɛ ɔ ko tɔ nzue nga amun fa di amun fie'm be su junman'n, bɔ wawa'n ju i kɔmin su'n, ɔ ´tɔ kɔnguɛ nzue'n ´man amun.

²⁴ Amun ´kpɛ ble'n lele ɔ ´yi amun kple mun. Amún kpankpan nga an gua be nun nzan nin ngo'm be kusu be ´yi wie.

²⁵ Anannganman'n waan: «Amun ninnge nga be sacili'n, n ´sie be osu. Amun fie su ninnge nga ndro'm be dili, nga lalo'm be wa sacili be'n, nga klannan nin aɛcɛ mun be dili'n, i sɔ ninnge liɛ nga kakaa fa ɔklɔɔ nga n sunmannin be'n be wa sacili be'n, n ´sie be kwlaa be osu.

²⁶ Amun ´di like lele amun ku'n ´yi. Amun ´manman min Anannganman bɔ n ti amun Nyanmiɛn bɔ n yo like kpakpa m man amun'n. Kɛ ɔ fin ndɛ'n, min sran'm be nyin su gua-man ase kun.

²⁷ Ɔ man amun wa wun i wlɛ jrɛin kɛ e nin amun Izraɛlfuɛ mun e o nun, nan Anannganman amun Nyanmiɛn'n yɛlɛ min, nan like wie fi nun-man mín sin kun. Kɛ ɔ fin ndɛ'n, min sran'm be nyin su gua-man ase kun.»