Zoɛl 1 - NYANMIƐN NDƐ'N 1998

¹ Ndɛ nga bɔ Anannganman'n fa wlɛli Pɛtiɛl i wa Zoɛl i nuan kɛ ɔ kan'n yɛ:

Kakaa'm be bolɛ bɔ be boli'n, ɔ nin lika'n i kee wulɛ

² Ngbɛn mun, an `tie, amun kwlaa nga amun o Zida mɛn'n nun'n, amun `sie amún su be `tie ndɛ. ?Sa kɛ nga sa ɔ'a yo amun nyrun le? ?Sa kɛ nga sa ɔ'a yo amun nannan'm be nyrun le?

³ An `kan kle amun mma mun nan amun mma'm be `kan kle be mma liɛ mun, kpɛkuun, man be kusu be kan kle be nga be wa wu be mun.

⁴ Like nga ndro'm be dili be yacili i onga'n, lalo'm be wa dili. Like nga lalo'm be dili be yacili i onga'n, klannan'm be wa dili. Like nga klannan'm be dili be yacili i onga'n, aɛcɛ'm be wa dili.

⁵ Nzannunmunfuɛ mun, an `tinnge nan amun `sun! Nzan nɔnfuɛ mun, amun ngba an `koko, afin vinyi mma nzue'n ɔ'a wie. Amun su nyan-man nzan lɔflɛ be ko nɔn-mɛn i kun.

⁶ Kakaa'm be akpasua kun ɔ'a de e mɛn'n. Be yo wlɛ, be sɔnnin kpa. Be je'm be ti kɛ asɔmɔli je sa. Be je dandan'm be ti kɛ asɔmɔli bla'm be liɛ'n sa .

⁷ Be wluli n vinyi fie'm be nun be sacili be mlɔnmlɔn, be sacili n figie fie mun wie. Be buli figie mun. Be kplokploli figie sɔ'm bé wun weiin, san be waka ufue ´cɛ yɛ be kali lɛ-ɔ .

⁸ Amun `la kondo kɛ talua kan wie b'ɔ o sɛ nun, b'ɔ su sun i wun b'ɔ jɛli i-ɔ, ɔ'a cɛ-man bɔ ɔ'a saci i sa nun'n sa.

⁹ Ninnge nga be fa ko man Anannganman i sua'n nun lɔ'n, ɔ nin nzan nga be guɛ i ase lɔ'n kwlaa ɔ'a wie siɛn'n. Ɔ man Nyanmiɛn nyrun jranfuɛ'm be o sɛ nun, Nyanmiɛn i sufuɛ nga be jrɛn i nyrun'n, be o sɛ nun.

¹⁰ Fie'm b'a saci, asiɛ'n ɔ'a di amlan, afin be nyan-man ble kun, be nyan-man vinyi mma nzue kun, ngo sɛ'n nun ɔ'a wu kee.

¹¹ Fie difuɛ'm bé wun ɔ'a fɔ, vinyi fie difuɛ'm be su fɛfɛ. Ble nin ɔrz bɔ b'a saci'n ti be su fɛfɛ. Like nga afuɛ nuan'n yiali bɔ be nyɛnnin i fie su lɔ'n, i sɔ like'n kwlaa sacili.

¹² Vinyi'm b'a wu kee, figie'm b'a glɔ. I grenadie o, i nglesia o, i pɔmun waka o, i sɔ waka liɛ'n kwlaa bɔ be tali be'n, be kwlaa b'a kpese kpan. Ɔ man aklunjuɛ nun-man klɔ sran'm bé sa nun kun.

Nglɛmun cilɛ ndolo nin Anannganman i kpatalɛ tantrantan

¹³ Nyanmiɛn nyrun jranfuɛ mun, an `wla bajɛ tralɛ, amun `koko. Amun bɔ be jran Nyanmiɛn nyrun'n, an `bo awuyomo. Nyanmiɛn i junman difuɛ mun, an `tran awlaboɛ nun kɔnguɛ lele man aliɛ'n cɛn amun. Yɛlɛ kɛ like nga be fa ko mɛn i i sua nun lɔ'n, ɔ nin nzan nga be guɛ i ase be mɛn i'n, ɔ nun-man nun sɔ kun.

¹⁴ Amun `kle nglɛmun cilɛ blɛ kun. Amun `flɛflɛ amun wun nan an `yia anyia dan kpa kun. Amun `yia ngbɛn mun ɔ nin klɔ'n su sran'm be kwlaa Anannganman i sua'n nun lɔ nan an `srɛ tantrantan kpa kɛ ɔ ´de amun.

Anannganman i ya cɛn'n

¹⁵ Cuekee! Nguɛ cɛn liɛ yɛlɛ nga! Anannganman i ya cɛn'n yɛ ɔ'a mantan yɛ. Cɛn sɔ'n ´ba, Anannganman'n b'ɔ kwla like kwlaa yo i ninnge'm be sacilɛ b'ɔ guguli kɛ ɔ ´saci be'n yɛ be ´ba-a .

¹⁶ I liɛ'n, kɛ e aliɛ'm be ´saci'n, é nyin ´ta nun. Aunblibliɛ nin aklunjuɛ b'a tu Nyanmiɛn i sua'n nun lɛ.

¹⁷ Ninnge nga be luali'n, be kplɔli asiɛ'n nun. Ble'n ɔ'a wie, tanngannin'm b'a ka ngbɛn, like siewlɛ'm b'a saci.

¹⁸ An `tie nnɛn'm be kplinlɛ bɔ be ´kplin-ɔn! An `nian nnɛn'm be wlanlɛ bɔ be ´wlan lika'n nun daan sa-a. Be lɛ-man ijre be di-mɛn i kun, boli mun nin bua mun be ngba be su yo kokloo.

Zoɛl i srɛlɛ b'ɔ srɛli'n

¹⁹ Anannganman, n sun n flɛ wɔ. Aawlɛ b'ɔ ti nnɛn'm be didiwlɛ'n, sin'n yrɛli i ngba. Sin'n yrali fie'm be nun waka'm be kwlaa.

²⁰ Blo nnɛn'm be kwlaa bé nyin ta ɔ́ nyin bo, afin nzue ba'm b'a wie nun, yɛ aawlɛ bɔ ti nnɛn'm be didiwlɛ'n, sin'n yrɛli i ngba.