Zeremi 9 - NYANMIƐN NDƐ'N 1998

Nvle nga ato'n ɔ'a kun i nunfuɛ mun kpo'n

¹ Sɛ n kwla nyan min lika wie aawlɛ flɛnnɛn nun lɔ kɛ lika nga lika kɔfuɛ'm be fia nun sa'n, wuun n ´yaci min nvle'n wa n ´kɔ mmua. Yɛlɛ kɛ sɛ e ´kwla se'n, be kunndɛ bian bé wun bo. Sɛ a lafi be su-ɔ, a lafi asiɛ wun.

² «B'a sa cɛiin ato bualɛ'n ti kɛ ta bɔ b'a cuɛn nun bɔ be su wa to'n sa. Kwlalɛ nga be kwla'n, nán nanwlɛ'n i fanngan nun-ɔn, ato'n i fanngan nun-ɔn. Sa tɛ nga be yo'n, be si-mɛn i nuan. Be si-man min.» Anannganman'n yɛ ɔ kan sɔ-ɔ.

³ «An `nian amún wun amun janvuɛ'm be lika. Nán an fa amún wla gua amun niaan'm be wie fi su. Aniaan'm be kwlaa be ti lakadi kɛ Zakɔb sa. Janvuɛ'm be kwlaa be ti sran suɛn tɔnfuɛ .

⁴ Be lakalaka be wiengu. Be di-man nanwlɛ. Ato bualɛ'n yɛ be suan-an. B'a yo sa tɛ'n lele ɔ'a flan be bɔbɔ siɛn'n.

⁵ Sa tɛ'n mantan sa tɛ'n su. Ato'n mantan ato'n su. Min silɛ'n ti-man be ndɛ.»

⁶ I sɔ'n ti Anannganman b'ɔ sie mɛn wunmuan'n wan yoo: «N wa yi be nun fiɛn'n kɛ sika tɔnfuɛ'n fa yo'n sa. N ´sa be n ´nian. Afin be sa tɛ'n ti san i sɔ like cɛ yɛ n ´fa yo be-ɔ.

⁷ Bé nuan'n ti kɛ cua bɔ duwlɛ wo i ti'n sa. Gblɛ ndɛ mun yɛ be kan-an. Be fa bé nuan'n be fa fɔnvɔ be wiengu mun. Kusu wuun be bu bé wun akunndan tɛ be sua-suali be wun aya.»

⁸ Anannganman'n usa kɛ: «?Sran kɛ nga sa'n, nán nun yialɛ cɛ yɛ e nin be e ´yia-a? ?Nvle kɛ nga sa'n, nán min klunngbɔ cɛ yɛ n ´tu i be su-ɔ?»

Sunlɛ nin ngwlɛ yilɛ blɛ

⁹ «N ´tike mín ti n ´sun oka'm be su. N ´yi ngwlɛ mɛn'n nun nnɛn'm be didiwlɛ'm be ti, yɛlɛ kɛ b'a yra, sran fi sin-man lɔ kun. Be ti-man nnɛn'm be kpankpanlɛ lɔ kun. I anunman o, i nnɛn o, be kwlaa b'a wie wanndi.»

¹⁰ Anannganman waan: «N ´yo man Zerizalɛm nunnun mlɔnmlɔn. Ɔ ´yo nsoso'n be lawlɛ. N ´yo man Zida klɔ'm be tɔ srololo. Sran fi su tran-man be su kun.»

¹¹ Sran ng'ɔ si ngwlɛlɛ'n b'ɔ wun sa sɔ'm be wlɛ'n, man ɔ kan. Sran nga Anannganman'n kannin ndɛ kleli i'n, man ɔ kan sa ti bɔ mɛn'n sacili'n, b'ɔ man ɔ'a tɔ srolo'n, bɔ sran fi sin-man nun'n.

¹² Anannganman'n waan: «Be yili mmla nga n fa mannin be'n i ase'n ti-ɔ. B'a tie-man min aniɛn'n ti-ɔ. B'a nian-man su b'a nanti-man'n ti-ɔ.

¹³ Baal bɔ bé si'm be kleli be'n, be waan i su cɛ yɛ be ´su-ɔ.»

¹⁴ I sɔ'n ti Anannganman b'ɔ sie mɛn wunmuan'n, b'ɔ ti Izraɛl Nyanmiɛn'n i waan: «N wa man nvle nga nunfuɛ'm be kondu man be di. N ´gua nzue nun duwlɛ n ´man be be ´nɔn.

¹⁵ N ´yo man be bo sanndi nvle nga bé si'm be bɔbɔ be si-man be'n, nan se kɛ be yɛ be ´si be'n, be nun. N ´fa alɛ'n n su be su lele san be ´wie nunnun.»

¹⁶ Anannganman b'ɔ sie mɛn wunmuan'n yɛ ɔ kan sɔ-ɔ. «An `bu bla nga sunlɛ yɛ ɔ ti be junman'n be ko flɛlɛ akunndan. An `ko flɛ be nga be si sun kpa'n man be bla.

(Izraɛlfuɛ'm be waan)

¹⁷ Man be kan bé wun be wa sun ye. Man e nyinmuɛn nzue'n jranjran é ti nun nan ɔ `bu puu!»

(Zeremi waan)

¹⁸ «Ngwlɛ yilɛ tɛ Siɔn lɔ: ‹Nguɛ nyrɛnnɛn liɛ yɛ e wun i sɔ-ɔ! Nguɛ nyannzuɛn liɛ yɛ e wun i sɔ-ɔ! E su tu é mɛn'n nun e ´kɔ. B'a bubu é sua mun.›

¹⁹ Bla mun, an `tie Anannganman i ndɛ'n. Man amún su'n ti ng'ɔ kan'n. An `kle amun mma bla'm be sunlɛ ng'ɔ o yɛ'n, amun `fa ngwlɛ yilɛ sɔ'n kle be wiengu kɛ:

²⁰ ‹Wie'n ɔ fu fenɛtri nun. Ɔ wlu é sua kpakpa'm be nun. Ɔ fin mantuan'm be ase akpɔ'n su. Ɔ fin gbanflɛn'm be ase gua'n su.› »

(Anannganman waan)

²¹ «Zeremi, se kɛ Anannganman'n wan yoo: ‹Fuɛn'm be ´gua asiɛ wun kɛ asiɛ'n i ye yolɛ like yɛ b'a guɛ i fie'n su sa. Be ´gua kɛ be su kpɛ ble nan be nyan-man sran isɛ-mɛn i ja mun nan ɔ tru bé sin'n sa.› »

Ngwlɛlɛ'n i kpa'n yɛlɛ Anannganman'n i silɛ'n

²² Anannganman'n wan yoo: «Nán ngwlɛlɛfuɛ'n fɛ i ngwlɛlɛ di i nuan. Nán wunmiɛnfuɛ'n fɛ i wunmiɛn'n di i nuan. Nán anyanbeunfuɛ fɛ i anyanbeun di i nuan.

²³ Sanngɛ sran ng'ɔ lɛ ngwlɛlɛ b'ɔ fa si min'n, bɔ si kɛ min yɛ n ti Anannganman nan n ti klun-ufuefuɛ'n, nan n yo sa i nuan su, n di nanwlɛ'n, i sɔfuɛ'n yɛ ɔ kwla di i nuan-an .» Anannganman'n yɛ ɔ kan sɔ-ɔ.

Be nga be tɔn be wun suɛn kɛ b'a wla be klɛn'n

²⁴ Anannganman'n waan: «Cɛn wie wa ju bɔ e nin be nga be wla be klɛn liɛ'n be wunnɛn nun ngbɛn'n e ´nyɛn i,

²⁵ sran sɔ mun be yɛ: Eziptfuɛ mun, Zidafuɛ mun, Edɔmfuɛ mun, Amɔnfuɛ mun, Moabfuɛ mun, ɔ nin aawlɛ flɛnnɛn'n nun lɔfuɛ bɔ akanza yilɛ'n ti be nzuɛn'n mun, afin nvle nga be o lɛ'n be wie fi wla-man klɛn. Izraɛlfuɛ'm be kusu sɛ e ´kwla se'n, b'a wla-man be anwlɛn'n i klɛn.»