Zeremi 8 - NYANMIƐN NDƐ'N 1998

¹ Anannganman waan: «I blɛ sɔ nun'n, be ´tu Zida famiɛn mun nin famiɛn'm be awlo lɔ sran dandan mun, nin min nyrun jranfuɛ mun, nin min nuan ijɔfuɛ mun, ɔ nin Zerizalɛmfuɛ nga be sieli be'n be owie'n.

² Be ´fa be yi gua'n su, wia'n i bo. Anglo nin nzraama'm be ´ta be su. Afin be kloli ninnge sɔ mun, be suli be, be suli be su, be fali bé wun mantannin be, be kotoli bé bo. Be su yiayia-man be owie sɔ'm be su. Be su sie-man be ndia nun. Be ´kaci kɛ angrɛ yɛ b'a fa guɛ i asiɛ'n nun sa.

³ Sran tɛ akpasua sɔ'n, be onga nga be ´ka lɛ'n, lika nga n ´fuan be kɔ'n, sɛ be wuli bɔbɔ'n, ɔ flunman tra kɛ be nyin wo su'n.» Anannganman b'ɔ sie mɛn wunmuan'n yɛ ɔ kan sɔ-ɔ.

Izraɛlfuɛ'm be anwlɛn ketelɛ'n

⁴ «Se be kɛ: ‹Anannganman'n wan yoo: ?Nan be tɔ-ɔ be jaso-man? ?Nan be ´kɔ lika nan be mlin'n, be sa-man be sin?

⁵ ?Yɛ ɔ yo sɛ ti yɛ Zerizalɛmfuɛ'm be nyin kekleke'n ti tantrantan sa-a? B'a fa bé wun b'a mantan ato ninnge mun saa, nán bé wun kpɔcilɛ yɛ be ko kpɔci-ɔ.

⁶ N sie mín su kpa n ti nga be kan'n. N wun kɛ ɔ ti-mɛn i su. Be nun kun sa koko-mɛn i sa tɛ'n ti, ɔ se-man kɛ: ?Nguɛ sa yɛ n yo i sɔ-ɔ? Be kwlaa be wanndi kɔ be nyrun ndɛnman su kɛ nnɛn kpanngɔ wie b'ɔ su wanndi kɔ alɛ kunlɛ sa.

⁷ Anunman'n bɔbɔ b'ɔ tu sin'n, ɔ si i bo tulɛ blɛ. Crikoli, nin alialia'n, ɔ nin nannin anunman'n, be kusu be sie lika'n nzɔliɛ, be si be sin salɛ blɛ, sanngɛ min sran'm be si-man min Anannganman min mmla mun.› »

Be nga be tɔn be wun suɛn kɛ be ti ngwlɛlɛfuɛ'n

⁸ «An tɔn amún wun suɛn se kɛ: ‹E si ngwlɛlɛ. Anannganman i mmla'n, é sa nun yɛ ɔ wo-ɔ.› Kusu wuun mmla'n i klɛfuɛ'm b'a kpɛ i wun lele siɛn'n ɔ'a kaci ato .

⁹ Ngwlɛlɛfuɛ'm b'a wun nyannzuɛn. Srɛ'n ɔ'a kun be kpo, b'a mian. Yɛlɛ kɛ be yoli Anannganman i ndɛ'n i finfin. ?Yɛ wuun kɛ ɔ o lɛ'n, be si ngwlɛlɛ?»

Be nga be waan sa fi su ju-man'n

¹⁰ «I sɔ'n ti n ´fa bé yi mun m ´man sran uflɛ. N ´fa be fie mun m ´man be mɛn'n i fafuɛ mun. I sran bɔ be lɛ nyrun o, be bɔ be lɛ-man nyrun o, be kwlakwla'n, be bɔbɔ be like liɛ nyanlɛ akunndan cɛ yɛ be bu-ɔ. Be nga be tɔn be wun suɛn kɛ be ti min nuan ijɔfuɛ mun o, be nga be tɔn be wun suɛn kɛ be ti min nyrun jranfuɛ mun o, be kwlakwla be ti ato buafuɛ kpan.

¹¹ Be fa min nvlefuɛ'm bé kannin'n i fualɛ'n fa yo ngowa. Be waan: ‹Sa fi su ju-man. Lika'n ti fɔun.› Kusu wuun lika'n ti-man fɔun.

¹² Sa tɛtɛ nga be yoli'n, kɛ ɔ `yo be ya'n, nán be-ɔ! Like nga be flɛ i nyannzuɛn'n, be si-mɛn i. I sɔ'n ti kusu sran nga be ´tɔ'n, be nin be yɛ be ´tɔ-ɔ. Blɛ nga e nin be e ´nyɛn i'n, be ´fin ase.»

Akunndan sannganlɛ ndɛ (Anannganman waan)

¹³ «N klo kɛ n ´nunnun be. N nian-nian vinyi'n su, n wun-mɛn i mma. Man nian figie'n su, n wun-mɛn i mma. I nnya'n ɔ'a blo. M'an fa m'an man sran nga be sin mun .»

(Izraɛlfuɛ'm be waan)

¹⁴ ?Ɔ yo sɛ ti yɛ e titi ase-ɔ? Amun man e yia e wlu klɔ nga be si bé wun'n be nun. E `ko wu lɔ. Afin Anannganman e Nyanmiɛn'n waan san wulɛ yɛ e ´wu-ɔ. Ɔ'a man e nzue nga duwlɛ o nun'n kɛ e `nɔn, sa tɛ bɔ e yoli i'n i dunman nun ti.

¹⁵ E waan wuun lika'n ´tɔ fɔun o, kannzu sa tɛ'n yɛ ɔ su ju-ɔ. E waan wuun e su wa yo juejue o, kannzu sa sroesroe yɛ ɔ su ju-ɔ.

¹⁶ E kpɔfuɛ'm be nnɛn kpanngɔ'm be nganniɛn'n yɛ ɔ ´tɛ Dan lɔ lɛ-ɔ. Kɛ be nnɛn kpanngɔ'm be kpan sa'n, asiɛ wunmuan'n keje. B'a ba lɔ ninnge'n kwlaa nunnunlɛ: mɛn'n nin i nun ninnge mun o, klɔ'n nin i nun sran mun o, b'a ba be nunnunlɛ.

(Anannganman waan)

¹⁷ «N wa fa wuo bɔ be lɛ bɔyre kpa'n n ´to amun lɔ. Wuo wlɛfuɛ nga be kan be nun ngowa-a ɔ yo-man ye, be wa ka amun.» Anannganman'n yɛ ɔ kan sɔ-ɔ.

Zeremi i ndɛ ya (Zeremi waan)

¹⁸ Min akunndan ɔ'a sanngan. N wun-man min wun yowlɛ kunngba. Mín sa sin ɔ'a bubu min.

¹⁹ Ee, min nvlefuɛ'm be o mɛn wie nun mmua lɔ be sun se kɛ: «?Nan Anannganman'n nun-man Siɔn wa kun? ?Siɔn i famiɛn'n nun-man wa kun?» « ?Ɔ yo sɛ ti yɛ be fa be amuɛn'm be fɔkɔ min anwlɛn nin-ɔn, ɔliɛ like finfin sɔ'n bɔ be fin mɛn uflɛ nun'n?»

(Anannganman waan) (Zeremi waan)

²⁰ Alie fitelɛ blɛ'n ɔ'a sin. Wawa'n ɔ'a wie. Sanngɛ e nian nyan-man é ti.

²¹ Kannin ng'ɔ tuli min nvlefuɛ mun'n ɔ'a bo min wla dan. N wo afɛ nun. N wun-man min wun fɛ kun.

²² ?Kannin ayre nun-man Galaad lɔ kun? ?Dɔɔtrɔ nun-man lɔ? ?Ɔ yo sɛ ti yɛ min nvle'n i kannin'n tɛ didi tɛ kɔ kploun sɔ-ɔ ?

²³ Ɔo, sɛ ɔ ti kɛ mín ti'n ɔ ti nzue ngunmin'n, sɛ ɔ ti kɛ min nyinma'n ɔ ti nyinmuɛn nzue bla'n, wuun n ´sun min nvlefuɛ nga be wuli'n kɔnguɛ nin wia su.